ជាតិ
សង្គមជាតិ
សហព័ន្ឋស្រូវអង្ករកម្ពុជា៖ មិនមានវត្តមានអង្ករប្លាស្ទិកនៅក្នុងទីផ្សារកម្ពុជាទេ
× ប្រធានសហព័ន្ធស្រូវអង្ករកម្ពុជា បានបញ្ជាក់ថា រហូតមកទល់ពេលនេះ មិនមានវត្តមានអង្ករប្លាស្ទិកនៅក្នុងទីផ្សារកម្ពុជាទេ។ ការអះអាងនេះ គឺបានធ្វើឡើងបន្ទាប់ពី សហព័ន្ឋស្រូវអង្ករកម្ពុជា បានធ្វើការពិសោធន៍ទៅលើ គំរូអង្ករ ដែលអះអាងថាជាអង្ករប្លាស្ទិក កាលពីរសៀលថ្ងៃទី១៤ខែកក្កដា ។ ការពិសោធន៍ សហព័ន្ឋស្រូវអង្ករកម្ពុជា បានបញ្ជាក់ថា អង្ករទាំងនោះ គឺជាអង្ករ ដែលអ្នកលក់បានដាក់លាយចូលគ្នា រវាងអង្ករស្រូវថ្មី និងអង្ករស្រូវចាស់ និងប្រភេទពូជផ្សេងគ្នាតែប៉ុណ្ណោះ។
មានសំឡេង៖
នេះគឺជាលើកទី១ហើយ ដែលសហព័ន្ឋស្រូវអង្ករកម្ពុជា(ស.អ.ក) បានរៀបចំឲ្យមានការពិសោធន៍ទៅលើគុណភាពអង្ករដែលមានកំពុងមានវត្តមាននៅលើទីផ្សារក្នុងប្រទេសកម្ពុជា។
ការពិសោធន៍នេះ បានធ្វើឡើង បន្ទាប់ពីបណ្តាញសង្គមនានា និងសារព័ត៌មានក្នុងស្រុកមួយចំនួន បានចុះផ្សាយនិងអះអាងថា អង្ករប្លាស្ទិកកំពុងមានវត្តមាននៅក្នុងទីផ្សារកម្ពុជា។ ការពិសោធន៍ដោយផ្ទាល់ទៅលើគុណភាពអង្ករនេះ បានធ្វើឡើងនៅថ្ងៃទី១៤ ខែកក្កដា ដោយសហព័ន្ឋស្រូវអង្ករកម្ពុជា បានចុះទៅប្រមូលគំរូអង្ករ ដែលអះអាងថាជាអង្ករប្លាស្ទិកនោះ មកពិសោធន៍។
យោងតាមសេចក្តីប្រកាសព័ត៌មានរបស់សហព័ន្ធស្រូវអង្ករកម្ពុជា នៅថ្ងៃទី១៥ខែកក្កដានេះ បានបញ្ជាក់យ៉ាងច្បាស់ថា អង្ករទាំងនោះជាអង្ករពិតប្រាកដ មិនមែនជាអង្ករផ្លាស្ទិកនោះទេ។ សហព័ន្ឋស្រូវអង្ករកម្ពុជា ក៏បានបញ្ជាក់ទៀតថា អង្ករទាំងនោះ គឺជាអង្ករ ដែលអ្នកលក់បានដាក់លាយចូលគ្នា រវាងអង្ករស្រូវថ្មី និងអង្ករស្រូវចាស់ និងប្រភេទពូជផ្សេងគ្នាតែប៉ុណ្ណោះ។
លោក សុខ ពុទ្ធិវុធ ប្រធានសហព័ន្ធស្រូវអង្ករកម្ពុជា បានមានប្រសាសន៍បញ្ជាក់ដែរថា៖« មកទល់ពេលនេះ មិនមានវត្តមានអង្ករប្លាស្ទិកនៅកម្ពុជានោះទេ ហើយការពិសោធន៍នេះ គឺបានបញ្ជាក់កាន់តែច្បាស់ថែមទៀត អំពីគុណភាពអង្ករនៅកម្ពុជា»។
ប្រធានសហព័ន្ធស្រូវអង្ករកម្ពុជារូបនេះ ក៏បានប្រាប់ប្រជាពលរដ្ឋ កុំឲ្យបារម្ភចំពោះអង្ករដែលមានវត្តមាននៅលើទីផ្សារកម្ពុជា និងអំពាវនាវដល់ពួកគាត់កុំជឿលើព័ត៌មានទាំងឡាយ ដែលគ្មានមូលដ្ឋាន ព្រមទាំងស្វាគមន៍រាល់ការផ្តល់ព័ត៌មាន ឬករណីសង្ស័យ ទាក់ទងនឹងគុណភាពអង្ករកម្ពុជា៕
© រក្សាសិទ្ធិដោយ thmeythmey.com