ជាតិ
សង្គមជាតិ
CATAចុះអប់រំពលរដ្ឋកំពង់ឃ្លាំងឲ្យយល់ដឹងពីបញ្ហាបរិស្ថាន
× សៀមរាប៖ សមាគមទីភ្នាក់ងារទេសចរណ៍កម្ពុជា ដែលហៅកាត់ថា (CATA) នឹងចុះធ្វើសកម្មភាពអប់រំមួយដល់ពលរដ្ឋនៅភូមិកំពង់ឃ្លាំង ស្រុកសូទ្រនិគម ខេត្តសៀមរាប ជុំវិញបញ្ហាអនាម័យ និងការចោលសំរាម។ សកម្មភាពនេះ ធ្វើឡើងក្នុងបំណងបំផុសឲ្យអ្នកភូមិទាំងនោះ យល់ដឹងពីអត្ថប្រយោជន៍នៃការថែរក្សាបរិស្ថាន ក៏ដូចជាគុណវិបត្តិនៃការចោលសំរាមពាសវាលពាសកាល។
នេះជាលើកទី២ហើយ ដែលសមាគមទីភ្នាក់ងារទេសចរណ៍កម្ពុជា CATA បានចូលរួមសម្អាតបរិស្ថានជាមួយអ្នកភូមិកំពង់ឃ្លាំង។ លើកទី២នេះ ធ្វើខុសពីលើកមុន ដោយ CATA នឹងមានសកម្មភាពមួយចំនួន ដើម្បីអប់រំអ្នកភូមិកំពង់ឃ្លាំង ឲ្យចេះអនាម័យបរិស្ថានដោយខ្លួនឯង ផលប្រយោជន៍ដើម្បីសុខភាព និងទាញចំណូលពីវិស័យទេសចរណ៍នៅទីនោះផង។ នេះជាការលើកឡើងរបស់លោក ផាវ ព្រឿន តំណាង CATA ប្រចាំខេត្តសៀមរាប ដែលបានផ្តល់បទសម្ភាសន៍ជាមួយសារព័ត៌មានថ្មីៗ ។
បើតាមលោក ផាវ ព្រឿន នឹងមានអ្នកចូលរួមប្រមាណ៥០០នាក់ ច្រើនជាងលើកទី១ ប្រមាណ២០០នាក់ ដែលអ្នកទាំងនោះមកពីតាមបណ្តាសណ្ឋាគារ និងក្រុមហ៊ុនឯកជនមួយចំនួនក្នុងខេត្តសៀមរាប។ លោក ព្រឿនពន្យល់ថា មូលហេតុដែល CATA ជ្រើសរើសកំពង់ឃ្លាំងជាគោលដៅដើម្បីចុះអប់រំបញ្ហាអនាម័យ ព្រោះថាតំបន់នោះ គឺជាគោលដៅទេសចរណ៍ថ្មីសម្រាប់ភ្ញៀវទេសចរ តែទាស់ថា ការចោលសំរាម ឫថង់ប្លាស្ទិក នៅជាបញ្ហា ដែលធ្វើឲ្យអ្នកទេសចរខ្លះ មិនសូវចង់ទៅតំបន់នោះ។
ភូមិកំពង់ឃ្លាំង ជាគោលដៅទេសចរណ៍ថ្មី ហើយវាស្រដៀងទៅនឹងតំបន់កំពង់ភ្លុកដូច្នោះដែរ។ តែកំពង់ឃ្លាំងសម្បូរដោយដើមឈើចម្រុះ ហើយអ្នកទេសចរចូលចិត្តសម្រាកពេលយប់នៅទីនោះ ដើម្បីស្វែងយល់ពីជីវភាពរស់នៅរបស់អ្នកភូមិ។ ប្រជាជនភាគច្រើនជាអ្នកនេសាទ ហើយមួយចំនួនតូចជាកសិករ។ គេក៏អាចហៅភូមិកំពង់ឃ្លាំង ថាជាភូមិលិចទឹកមួយបានដែរ ព្រោះកម្ពស់ទឹកនៅទីនោះ មានរហូតដល់ទៅ១៥ម៉ែត្រ ក្នុងរដូវវស្សា។
«តំបន់ដែលយើងចុះទៅនោះ គឺសុទ្ធសឹងសំរាម។ អ្វីដែលយើងបារម្ភនោះ នៅពេលទឹកលិចមក ហើយស្រកទៅវិញ វាទាញសំរាមទៅជាមួយ ហើយវាបានបំពុលទាំងទឹក ទាំងត្រី និងដោយទាំងមនុស្សផង»។ នេះជាបញ្ជាក់បន្ថែមរបស់លោក ព្រឿន។ លោក ព្រឿន រំពឹងថា ផលជំនាញជាច្រើនដែលអ្នកភូមិកំពង់ឃ្លាំងនឹងទទួលបាន ប្រសិនបើបញ្ហាអនាម័យនៅទីនោះ ត្រូវបានធានា។ ដោយសារជាតំបន់ដែលមានសក្កានុពលទេសចរណ៍ខ្ពស់ នោះអ្នកទេសចរនឹងបង្វែរទិសដៅទៅទីនោះកាន់តែច្រើន។
គួរបញ្ជាក់ថា កម្មវិធីអប់រំអនាម័យនៅភូមិកំពង់ឃ្លាំង គ្រោងធ្វើនៅថ្ងៃទី១៩ កក្កដានេះ៕
© រក្សាសិទ្ធិដោយ thmeythmey.com