ជាតិ
សង្គមជាតិ
«សាសា-សុខ ប៊ុន» ទទួលបានការចាប់អារម្មណ៍ជាងសំណុំរឿង «ព្រំដែន» និង«ច្បាប់អង្គការ»
× «ព្រំដែនកម្ពុជា-វៀតណាម» ដ៏ក្តៅគគុក «ការអនុម័តច្បាប់គ្រប់គ្រងអង្គការសង្គម-ស៊ីវិល» ដ៏ចម្រូងចម្រាស «បេសកកម្មសត្វកណ្តុរពីអាហ្វ្រិកមកដោះមីននៅកម្ពុជា» ជារឿងដែលគួរឲ្យចាប់អារម្មណ៍? ទេមិនមែនទេ រឿងដែលវាយលុកបណ្តាញព័ត៌មានអន្តរជាតិអស់រយៈពេលមួយសប្តាហ៍កន្លងមកនេះ គឺជាសំណុំហិង្សារវាងអ្នកមានទ្រព្យ លោក ប៊ុន សុខ និងអតីតពិធីការិនីទូរទស្សន៍ កញ្ញាសាសា ឈ្មោះដើម ឯក សុជាតា។
គិតត្រឹមថ្ងៃអាទិត្យចុងសប្តាហ៍នេះ គ្រាន់តែចូលវាយពាក្យ «Cambodia» នៅក្នុងផ្នែកព័ត៌មាន (News) របស់ Google យើងនឹងឃើញព័ត៌មានសំបូរបែបទាក់ទងនឹងសំណុំរឿង «សាសា-សុខ ប៊ុន» ជុំវិញករណីហិង្សាដែលបានកើតឡើងនៅភោជនីយដ្ឋានជប៉ុនមួយក្នុងបរិវេណមជ្ឈមណ្ឌលកោះពេជ្រ កាលពីយប់ថ្ងៃទី២ ខែកក្កដា ដោយសារព័ត៌មានក្នុងស្រុកដែលសរសេរជាភាសាអង់គ្លេស រួមទាំងទីភ្នាក់ងារសារព័ត៌មានបារាំង AFP និងទីភ្នាក់ងារសារព័ត៌មានអាមេរិក AP គឺជាប្រភពដ៏សំខាន់។
សំណុំរឿង «សាសា-សុខ ប៊ុន» ទទួលបានការចាប់អារម្មណ៍ខ្លាំង ក្រោយពីការស្រែកព្រមានរបស់លោកនាយករដ្ឋមន្ត្រី ហ៊ុន សែន ឲ្យលោក សុខ ប៊ុន ចូលមកតទល់ជាមួយតុលាការ និងដំណាក់កាលដែល សុខ ប៊ុន ត្រូវបានចៅក្រមស៊ើបចេញបទចោទប្រកាន់ជាផ្លូវការ នៅចំថ្ងៃដែលលោកវិលមកពីប្រទេសសឹង្ហបុរីវិញនាព្រឹកថ្ងៃទី១៨ ខែកក្កដា។
ABC Online របស់អូស្ត្រាលី បានបង្ហាញសកម្មភាពរបស់លោក សុខ ប៊ុន តាមរយៈកាម៉េរ៉ាសុវត្ថិភាព (CCTV) ដែលប្រើអំពើហិង្សាលើកញ្ញា សាសា បន្ទាប់ពីនាងបានរារាំង បុរសអ្នកមានទ្រព្យសម្បត្តិរូបនេះ មិនឲ្យយកមិត្តភ័ក្ត្រជនជាតិជប៉ុនរបស់នាង និងជាម្ចាស់ហាង ចេញទៅក្រៅ។ ABC ក៏បានចាប់ អារម្មណ៍សំដី កញ្ញាសាសា ដែលបានអះអាង អង្គរក្សរបស់ សុខ ប៊ុន ពិតជាបានប៉ុនប៉ងបាញ់ទៅលើរូបនាង។
BBC, Sky News, Belfast Telegraph, Deutsche Welle និងសារព័ត៌មានផ្សេងទៀត បានសរសេរថា សកម្មភាពហិង្សារបស់លោក សុខ ប៊ុន លើ សាសា បានបញ្ឆេះកំហឹងសាធារណជន នៅកម្ពុជា ដែលជាប្រទេសពោរពេញទៅដោយវប្បធម៌និទណ្ឌភាព ពោលគឺអ្នកធំ និងអ្នកមានទ្រព្យសម្បត្តិតែងតែគេចផុតពីសំណាញ់ច្បាប់។
ទោះបីជាយ៉ាងណាក៏ដោយ គេហទំព័រព័ត៌មាន VideoNewsUs បានមើលឃើញភាពវិជ្ជមានមួយចំនួនរបស់អាជ្ញាធរកម្ពុជានារយៈពេលចុងក្រោយនេះ ដោយរាប់បញ្ចូលទាំងការចាប់ខ្លួនលោក ថោង សារ៉ាត់ ក្នុងសំណុំរឿងឃាតកម្មលើលោក អ៊ឹង ម៉េងជី និងកិច្ចសហការចាប់បញ្ជូនខ្លួនមហាសេដ្ឋីរុស្ស៊ី Sergei Polonsky ទៅប្រឈមជាមួយតុលាការក្រុងមូស្គូ។
សារព័ត៌មានជាច្រើនដូចជា USA Today, South China Morning Post, London Evening Standard, The Malay Mail, Bangkok Post, Asia Times, Independent, Sentinel Republic, Gulf Times, The Inquisitr, Saudi Gazette, Mirror, Rappler រួមទាំង Yahoo News ផងដែរនោះ បានចុះផ្សាយអត្ថបទទាំងស្រុងរបស់ AFP និង AP ។
សារព័ត៌មានដែលសរសេជាបារាំង រួមមាន Le Parisien, Le Soir, RFI, Aufeminin.com ក៏ចាប់អារម្មណ៍លើសំណុំរឿង «សាសា-សុខ ប៊ុន» ផងដែរ។ Le Parisien បានចាត់ទុកថា ការប្រើហិង្សារបស់សេដ្ឋីអចលទ្រព្យ លើតារាសម្តែង គឺជារឿងអាស្រូវមួយនៅកម្ពុជា ដោយដកស្រង់ព័ត៌មានដែលផ្សាយដោយ AFP កាសែត Le Parisien ក៏បានបង្ហាញឃ្លីបនៃបទសម្ភាសរវាងសាសា និងទូរទស្សន៍ PNN ផងដែរ។
ដោយឡែក Le Figaro ដាក់ជាសំណួរថា «តើវាជាសំណុំរឿង Nabilla កម្ពុជាមែនទេ?»។ សំណួរនេះគឺចង់ប្រៀបធៀបករណីរបស់ សាសា ទៅនឹងករណីអ្នកបង្ហាញម៉ូតបារាំង Nabilla Benattia។ ប៉ុន្តែតាមពិតទៅវាជារឿងខុសគ្នា ដោយ សាសា គឺជាជនរងគ្រោះ រីឯ Nabilla គឺជាជនសង្ស័យក្នុងសំណុំរឿងបង្ករបួសស្នាមលើមិត្តប្រុសកាលពីអំឡុងខែវិច្ឆិកា ឆ្នាំ២០១៤ ។
ងាកទៅទូរទស្សន៍ TF1 ដ៏ល្បីរបស់បារាំង អ្នករាយការណ៍ព័ត៌មានរៀបរាប់ពីរឿងអាស្រូវដែលកើតឡើងនៅកម្ពុជានេះ ប៉ុន្តែនៅលើអេក្រង់ទូរទស្សន៍បែរជាសរសេរថា «រឿងអាស្រូវនៅជប៉ុន» ទៅវិញ។ នេះប្រហែលកំហុសបច្ចេកទេសតែប៉ុណ្ណោះ ពីព្រោះទូរទស្សន៍មួយនេះ ក៏ធ្លាប់រាយការណ៍ករណីកុមារី Autumn Allen និងទូរទស្សន៍ MyTV នាទិវាមាតាផងដែរ។
រឿងអាស្រូវនេះ ក៏ត្រូវទូរទស្សន៍មួយរបស់ហុងកុង បង្កើតជាសកម្មវិអេដូតុក្កតា ដើម្បីធ្វើត្រាប់សកម្មភាពហិង្សារបស់លោក សុខ ប៊ុន និងក្រុមអង្គរក្សទៅនាង សាសា ផងដែរ។
ក្រោយការបែកធ្លាយសកម្មភាពនៃការប្រព្រឹត្តអំពើហិង្សារបស់ខ្លួន លោក សុខ ប៊ុន បានប្រកាសលាលែងពីតំណែងទាំងអស់នៅក្រុមហ៊ុន រួមទាំងងារជាឧកញ៉ា ហើយបានសម្តែងការសុំទោស និងសន្យាសងជំងឺចិត្ត១០ម៉ឺនដុល្លារអាមេរិកដល់កញ្ញាសាសា ប៉ុន្តែភាគី សាសា ប្រកាសមិនទទួលយកនោះឡើយ។
ក្រោយការប្រកាសចាប់ខ្លួនពីភ្នាក់ងារប៉ូលិសអាំងទែរប៉ូល លោក សុខ ប៊ុន បានវិលមកពីប្រទេសសឹង្ហបុរីវិញកាលពីថ្ងៃទី១៨ ខែកក្កដា ហើយលោកត្រូវបានបញ្ជូនទៅសាកសួរភ្លាមៗនៅសាលាដំបូងរាជធានីភ្នំពេញ។ ក្រោយការសាកសួរជាង៤ម៉ោង លោកត្រូវបានបញ្ជូនទៅឃុំខ្លួនបណ្តោះអាសន្ននៅពន្ធនាគារព្រៃសរ ដើម្បីរង់ចាំការកាត់ទោស។
រយៈពេលមួយសប្តាហ៍កន្លងមកនេះ សារព័ត៌មានបរទេសចាប់លើប្រធានបទធំៗបួននៅកម្ពុជា ក្នុងនោះរួមមាន ករណីវិវាទព្រំដែនកម្ពុជា-វៀតណាម សកម្មភាពតវ៉ាប្រឆាំងនឹងច្បាប់គ្រប់គ្រងអង្គការដែលអនុម័តដោយសភាជាតិ និងវត្តមានសត្វកណ្តុរពីអាហ្វ្រិកមកជួយដោះមីននៅកម្ពុជា។ ប៉ុន្តែសំណុំរឿង «សាសា-សុខ ប៊ុន» មានភាពលេចធ្លោរជាងគេ៕
© រក្សាសិទ្ធិដោយ thmeythmey.com