ជាតិ
សង្គមជាតិ
លោក ប៉ាវ ស៊ីណា ថា សមាគមរោងចក្រកាត់ដេរមិនយល់ពីតម្រូវការកម្មករ
× សមាគមរោងចក្រកាត់ដេរនៅកម្ពុជា (GMAC) ថ្កោលទោសចំពោះមេដឹកនាំសហជីពចលនាកម្មករលោក ប៉ាវ ស៊ីណា ដែលបាននឹងកំពុងដឹកនាំកូដកម្មមិនគោរពតាមនីតិវិធីច្បាប់ និងស្នើឲ្យរដ្ឋាភិបាលចាត់វិធានការ ចំពោះការទាមទារលោក ប៉ាវ ស៊ីណា ដែលមិនមានមូលដ្ឋានច្បាប់ច្បាស់លាស់នេះ។ លោក ប៉ាវ ស៊ីណា យល់ថា GMAC មិនយល់ពីការទាមទាររបស់កម្មករ ហើយការចោទប្រកាន់របស់ GMAC នាពេលនេះ គឺមិនបានឆ្លុះបញ្ចាំងពីតម្រូវការរបស់កម្មករឡើយ។
សូមស្ដាប់ពត៌មានលម្អិត៖
លោក ប៉ាវ ស៊ីណា ប្រធានចលនាកម្មករ ដែលរងការចោទប្រកាន់ពីខាងសមាគមរោងចក្រកាត់ដេរនៅកម្ពុជា យល់ថា ភាគីសមាគមរោងចក្រកាត់ដេរ (GMAC) កំពុងចោទប្រកាន់រូបលោកដោយមិនយល់ច្បាស់ពីការទាមទាររបស់កម្មករ ដែលគ្រាន់តែចង់បានសំណងពីនិយោជកនៅពេលដែលផ្ដាច់កិច្ចសន្យាការងារប៉ុណ្ណោះ។ មេដឹកនាំសហជីពរូបនេះ បន្ថែមថា ការដឹកនាំកម្មករទាមទារនេះ ដោយសារតែរូបលោកបានរកឃើញថា ខាងភាគីរោងចក្រមួយចំនួនបានប្រើប្រាស់កិច្ចសន្យារយៈពេលខ្លីជាមួយកម្មករ ដែលធ្វើឲ្យកម្មករជាអ្នកខាតបង់ផលប្រយោជន៍។
ប្រធានចលនាកម្មកររូបនេះ បានបញ្ជាក់យ៉ាងដូច្នេះថា៖«ការលើកឡើងរបស់GMACនេះ មើលទៅដូចជាយកចិត្តទុកដាក់ដល់កម្មករណាស់ ហើយមើលមកខ្ញុំកំពុងធ្វើខុសអ៊ីចឹង។ តាមពិតGMAC ខ្លួនឯងទេមិនយល់ ព្រោះកន្លងមករោងចក្រជាច្រើនបានប្រើប្រាស់កិច្ចសន្យាការងាររយៈពេលខ្លីត្រឹម៣ទៅ៦ខែ ជាមួយកម្មករជាច្រើនមកហើយ។ ដូចនេះគឺក្នុងនាមខ្ញុំជាសហជីព ក៏ដូចជាកម្មករមានសិទ្ធិក្នុងការទាមទារ ក្នុងការទាសំណងផ្ដាច់កិច្ចសន្យាការងារនេះ»។
សេចក្ដីថ្លែងការណ៍សមាគមរោងចក្រកាត់ដេរនៅកម្ពុជា ចុះថ្ងៃទី២០ កក្កដា ចោទប្រធានសហជីពចលនាកម្មករលោក ប៉ាវ ស៊ីណា ដែលបានទាមទារឲ្យរោងចក្រធ្វើការផ្លាស់ប្តូរកិច្ចសន្យាការងារមានថិរវេលាមិនកំណត់ ទៅជាកិច្ចសន្យាការងារមានថិរវេលាកំណត់ និងទាមទារឱ្យនិយោជកធ្វើសំណង ហាក់បីដូចជានិយោជកជាអ្នកផ្តើមគំនិតផ្តាច់កិច្ចសន្យា។ ចំពោះសកម្មភាពទាមទារនេះបានបង្ហាញពីការមិនយល់ដឹងផ្នែកផ្លូវច្បាប់ទាល់តែសោះ តែជាការបំផ្លាញផលប្រយោជន៍កម្មករនិយោជិតក្នុងរយៈពេលវែង។
សមាគមរោងចក្រកាត់ដេរនៅកម្ពុជា (GMAC) អំពាវនាវ ដល់រាជរដ្ឋាភិបាលកម្ពុជា និងស្ថាប័នពាក់ព័ន្ធទាំងឡាយឲ្យធ្វើការពិនិត្យ និងចាត់វិធានការសមស្រប ណាមួយចំពោះការទាមទារដែលមិនមានមូលដ្ឋានច្បាប់ច្បាស់លាស់ និងមិនមានទស្សនៈវិស័យវែងឆ្ងាយចំពោះផលប្រយោជន៍កម្មករក្នុងរយៈពេលវែង។ បន្ថែមពីនេះ សមាគមក៏អំពាវនាវដល់ លោក ប៉ាវ ស៊ីណា ឲ្យបញ្ឈប់ការទាមទារបែបនេះ ព្រោះវាបានបង្ហាញពីការដើរថយក្រោយនៃការការពារផលប្រយោជន៍ស្របច្បាប់របស់កម្មករនិយោជិត។
កម្មករកាត់ដេរមកពីរោងចក្រអេឃិនថិច(AkeentexPte Ltd) ១និង២ ក្នុងរាជធានីភ្នំពេញ នៅព្រឹកថ្ងៃអង្គារនេះនាំគ្នាតវ៉ាជាថ្មីនៅមុខក្រសួងការងារ ដើម្បីទាមទារឲ្យក្រសួងការងារអន្តរាគមន៍ទៅថៅកែរោងចក្រឲ្យគោរពលក្ខខណ្ឌការងារ។
កម្មកររោងចក្រអេឃិនថិច១ និងអេឃិនថិច២ បានចាប់ផ្ដើមតវ៉ាចាប់ពីថ្ងៃទី១០ ខែកក្កដា ដើម្បីទាមទារលក្ខខណ្ឌការងារ៩ចំណុចដូចជា សុំឲ្យក្រុមហ៊ុនផ្តាច់កិច្ចសន្យាទូទាត់សំណងតាមផ្លូវច្បាប់៥ភាគរយ មិនត្រូវកាត់លុយពេលកម្មករធ្វើកូដកម្ម មិនត្រូវបង្ខំកម្មករឲ្យធ្វើការថែមម៉ោង សុំបន្ថែមថ្លៃបាយក្នុង១ថ្ងៃចំនួន២០០០រៀល សុំដំឡើងប្រាក់ធ្វើដំណើរ៧ដុល្លារបន្ថែម ជាដើម៕
© រក្សាសិទ្ធិដោយ thmeythmey.com