ជាតិ
សង្គមជាតិ
កម្ពុជានឹងជួបវិបត្តិខ្វះចុងភៅប្រសិនបើគ្មានការបណ្តុះបណ្តាលបន្ថែម
× សៀមរាប៖ អ្នកវិភាគសេដ្ឋកិច្ចធ្លាប់បាននិយាយហើយថា កម្ពុជាអាចនឹងជួបវិបត្តិខ្វះធនធានមនុស្ស នៅពេលទីផ្សារអាស៊ានចូលមកដល់ក្នុងពេលឆាប់ៗខាងមុខនេះ។ ជំនាញចុងភៅ គឺជាជំនាញមួយយ៉ាងសំខាន់ក្នុងវិស័យទេសចរណ៍ ហើយបច្ចុប្បន្នតម្រូវការលើជំនាញនេះមានច្រើន។ ដោយសារកំណើនសណ្ឋាគារ និងភោជនីយដ្ឋាន ធ្វើឲ្យរដ្ឋមន្ត្រីក្រសួងទេសចរណ៍ព្រួយបារម្ភចំពោះវិបត្តិចុងភៅ។ បើតាមលោករដ្ឋមន្ត្រី កម្ពុជាអាចនឹងជួបវិបត្តិខ្វះចុងភៅ ប្រសិនបើពុំមានការបណ្តុះបណ្តាលបន្ថែម ហើយមនុស្សមួយចំនួនបាន មើលរំលងនឹងជំនាញមួយនេះ។
ថ្លែងនៅចំពោះមុខក្រុមចុងភៅក្នុងសមាគមចុងភៅកម្ពុជាប្រមាណ៥០នាក់ រដ្ឋមន្ត្រីក្រសួងទេសចរណ៍ លោក ថោង ខុន បាននិយាយថា ចុងភៅគឺដើរតួយ៉ាងសំខាន់ក្នុងការលើកស្ទួយវិស័យទេសចរណ៍កម្ពុជា។ ក្រៅពីសេវាស្នាក់នៅដែលឈរនៅលេខមួយ ក្នុងនោះសេវាម្ហូបអាហារ បានឈរនៅលេខរៀងទី២ ក្នុងវិស័យឧស្សាហកម្មទេសចរណ៍។
ក្នុងពិធីចែកបណ្ណសរសើរដល់សមាគមចុងភៅក្នុងសណ្ឋាគារ អង្គរភែលេស រីស៊ត និងស្ប៉ា លោក ថោង ខុន បញ្ជាក់ថា បច្ចុប្បន្នកម្ពុជាមានសាលាបណ្តុះបណ្តាលជំនាញចុងភៅតិចតួចនៅឡើយ ក្នុងនោះមានអង្គការភាពញញឹមនៃកុមារ (PSE) សាលាផ្ទះបាយ និងសាលាប៊ុយណឺប្រ៊ុល នៅសៀមរាប។ ដែលបញ្ហានេះ ធ្វើឲ្យលោករដ្ឋមន្ត្រី ព្រួយបារម្ភថា កម្ពុជាអាចនឹងជួបវិបត្តិខ្វះចុងភៅ ប្រសិនបើទីផ្សារសណ្ឋាគារ និងភោជនីយដ្ឋាន មានកំណើននៅឆ្នាំទៅមុខ។
សូមស្តាប់ការលើកឡើងរបស់លោក ថោង ខុន
លោក ឡង់ បូរ៉ា អនុប្រធានសមាគមចុងភៅកម្ពុជា បានឲ្យដឹងថា លោកអាចប៉ាន់ស្មានបានថា នៅខេត្តសៀមរាប មានចុងភៅទាំងអស់មិនក្រោម១ពាន់នាក់នោះទេ។ លោក បូរ៉ា ពន្យល់ថា នៅខេត្តសៀមរាប មានសណ្ឋាគារប្រមាណ១៨០ ហើយក្នុងមួយសណ្ឋាគារតម្រូវការចុងភៅមានពី ៣០ទៅ៥០នាក់ និងភោជនីយដ្ឋានតម្រូវការចុងភៅមានពី ១០ទៅ២០នាក់។ យ៉ាងណាមិញ អនុប្រធានសមាគមចុងភៅកម្ពុជា បានយល់ស្របចំពោះវិបត្តិខ្វះចុងភៅទៅថ្ងៃអនាគត។ លោក ឡង់ បូរ៉ា បញ្ជាក់ថា៖« តាមគំនិតខ្ញុំ ក្នុងមួយឆ្នាំៗ យើងត្រូវការចុងភៅយ៉ាងតិច១០០នាក់ ដើម្បីអាចទប់ទាល់នឹងកំណើនសណ្ឋាគារ និងភោជនីយដ្ឋាន ដែលចេះតែកើនរាល់ឆ្នាំនេះ»។
គួរបញ្ជាក់ថា ចុងភៅប្រមាណ៥០នាក់ បានទទួលបណ្ណសរសើរពីរដ្ឋមន្ត្រីក្រសួងទេសចរណ៍ ក្រោយពេលពួកគេបានបំបែកឯកគ្គតកម្មធ្វើនំអន្សមយក្ស ក្នុងព្រឹត្តិការណ៍អង្គរសង្ក្រាន្តក្នុងឆ្នាំ២០១៥កន្លងទៅ៕
© រក្សាសិទ្ធិដោយ thmeythmey.com