សាលារាជធានីអនុញ្ញាតចរាចរលើផ្លូវក្រោមដីតិចណូ ចាប់ពីថ្ងៃ២៥ កក្កដានេះ

ជាតិ

សង្គមជាតិ

សាលារាជធានីអនុញ្ញាតចរាចរលើផ្លូវក្រោមដីតិចណូ ចាប់ពីថ្ងៃ២៥ កក្កដានេះ

24, Jul 2015 , 3:31 pm

រូបភាព

ដោយ:

ផ្លូវក្រោមដីតិចណូដែលបានបើកការដ្ឋានសាងសង់ជាង ១០ខែមកហើយនោះ គឺចាប់ពីថ្ងៃទី៩ ខែកញ្ញាឆ្នាំ២០១៤ បានស្ថាបនារួចរាល់ហើយ។ សាលារាជធានីភ្នំពេញ នឹងដាក់ឲ្យប្រើប្រាស់ ផ្លូវក្រោមដីតិចណូជាបណ្តោះអាសន្ន ចាប់ព្រឹកថ្ងៃទី២៥ ខែកក្កដានេះ។

សាលារាជធានីភ្នំពេញ បានផ្សាយលើទំព័រហ្វេសប៊ុកផ្លូវការថា ផ្លូវក្រោមដីតិចណូនេះ បើកសម្រាប់ចរាចរជាផ្លូវឯកទិស មួយគន្លងសម្រាប់រថយន្ត និង មួយគន្លងទៀត សម្រាប់ ទោចក្រយានយន្ត ដែលធ្វើចរាចរពីរង្វង់មូលទួលគោកនៃមហាវិថីគីម អ៊ីលស៊ុង ត្រូវចូលគន្លង កណ្តាលជាប់អ័ក្សផ្លូវ ដោយចុះជម្រាលផ្លូវក្រោមដី ហើយបត់ឆ្វេងរួចឡើងតាមមហាវិថី សហព័ន្ឋរុស្ស៊ី ឆ្ពោះទិសទៅភ្លើងស្តុបបេកាសេ។ ការដាក់ឲ្យប្រើប្រាស់ផ្លូវក្រោមដីតិចណូ ដែលមានប្រវែង ៣៣៣ម៉ែត្រ មានទទឹងពី ៦ម៉ែត្រទៅ ៧.៥ម៉ែត្រនេះ ដើម្បីសម្រួលដល់ការធ្វើដំណើររបស់ប្រជាជន។

ជាមួយគ្នានេះ សាលារាជធានីក៏បានដាក់បម្រាមមួយចំនួន រួមមាន ហាមដឹកទំនិញ សំពីងសំពោង បើកបរក្នុងល្បឿនមិនលើសពី ២០គីឡូម៉ែត្រក្នុង១ម៉ោង ហាមជិះវ៉ាប្រជែងគ្នា និងហាមការជិះបព្ច្រាសទិសជាដាច់ខាត ព្រមទាំងហាមការឈប់សំចតនៅផ្លូវក្រោមដី។

សូមបញ្ជាក់ផងដែរ សាលារាជធានីភ្នំពេញបានបិទចរាចរណ៍មួយចំហៀងផ្លូវ នៃមហាវិថីសហព័ន្ធរុស្ស៊ី រយៈពេលជាង២ខែមកហើយ ពោលគឺចាប់ពីថ្ងៃទី២៣ខែឧសភាមកម្លេះ ដើម្បីជំរុញឲ្យការស្ថាបនាផ្លូវ ក្រោមដីតិចណូបញ្ចប់ទៅតាមគម្រោង។ គម្រោងសង់ស្ពានអាកាសនិងផ្លូវក្រោមដីតិចណូនេះ ចំណាយថវិការដ្ឋជាង ១៤លានដុល្លារអាមេរិក ហើយនឹងបញ្ចប់ជារួចរាល់ នៅដើមខែមករា ឆ្នាំ២០១៦ខាងមុខ៕