ជាតិ
បទយកការណ៍ / បទសម្ភាសន៍
សង្គមជាតិ
សមណនិស្សិត ខិន ហន សិក្សាអនុបណ្ឌិតជំនាញកសាងសន្តិភាព និងការអភិវឌ្ឍនៅអឺរ៉ុប
× ភ្នំពេញ៖ ព្រះតេជគុណ ខិន ហន ព្រះជន្ម ២៨វស្សា បានទទួលអាហារូបករណ៍កម្មវិធីផ្លាស់ប្តូរសិក្សា ក្នុងគម្រោងអាហារូបករណ៍ Erasmus+ របស់សហភាពអឺរ៉ុប រយៈពេល ៦ខែ ក្នុងថ្នាក់អនុបណ្ឌិត ជំនាញសន្តិភាព និងការអភិវឌ្ឍ នៅ Masaryk University ក្នុងសាធារណរដ្ឋឆែក។ ព្រះអង្គជាសមណនិស្សិតថ្នាក់អនុបណ្ឌិត នៅក្នុងសាកលវិទ្យាល័យបញ្ញាសាស្ត្រកម្ពុជា។ ព្រះអង្គគង់ក្នុងវត្តព្រះពុទ្ធមានបុណ្យ ក្នុងខណ្ឌ៧មករា ហើយបានសាងផ្នួស ជាង ១៦វស្សាហើយដែរ។ ព្រះតេជគុណនឹងមន្តទៅសិក្សាបន្ថែមទៀត ពីជំនាញនេះ ដើម្បីយកមកបង្រៀនចែករំលែកដល់សិស្ស និស្សិត និងអង្គការក្រៅរដ្ឋាភិបាល មួយក្នុងខេត្តព្រៃវែង ដែលព្រះអង្គអ្នកប្រឹក្សាផង។ ព្រះអង្គចង់កសាងសន្តិភាព និងថែរក្សាសន្តិភាពជូនសង្គម។ ដោយឡែក ក្រោយបញ្ចប់ថ្នាក់អនុបញ្ឌិតព្រះអង្គ នឹងមិនទាន់ប្រាកដថា នឹងលាចាកសិក្ខាបទ ឬយ៉ាងណានោះទេ ដោយព្រះអង្គ មានសង្ឃដីកាថា «អាស្រ័យលើនិស្ស័យ និងការតាំងចិត្ត»។
ជាបន្តសូមស្តាប់បទសម្ភាសន៍រវាងលោក រឿន ភារុន អ្នកសារព័ត៌មានអេឡិចត្រូនិចថ្មីៗ និងព្រះតេជគុណ ខិន ហន ៖
គួរបញ្ជាក់ថា សមណនិស្សិត ១អង្គ និស្សិត និងបុគ្គលិកសិក្សាខ្មែរចំនួន ៦៤នាក់ បានទទួលអាហារូបករណ៍ពីសហភាពអឺរ៉ុប (EU) ប្រចាំឆ្នាំ ២០១៥ ក្រោមគម្រោងកម្មវិធីអាហារូបករណ៍ Erasmus Mundus និង Erasmus+ ក្នុងរយៈពេលផ្សេងៗគ្នាចន្លោះពី ៦ខែ ទៅ ៤ឆ្នាំ ដើម្បីទៅសិក្សានៅទ្វីបអឺរ៉ុប។
និស្សិតទទួលបានអាហារូបករណ៍នឹងបន្តការសិក្សាតាមសាកលវិទ្យាល័យចំនួន ២៧ ក្នុងប្រទេសចំនួន ១៦ ដែលជារដ្ឋសមាជិកសហភាពអឺរ៉ុប ក្នុងនោះ រួមមាន ប្រទេសបារាំង ប្រទេសអូទ្រីស ប៊ែលហ្ស៊ិក ប៊ុលហ្ការី សាយប្រឺស សាធារណរដ្ឋឆែក អាល្លឺម៉ង់ អេស្តូនី បារាំង អៀរឡង់ អ៊ីតាលី ហុងគ្រី ហូឡង់ ព័រទុយហ្កាល់ រ៉ូម៉ានី អេស្ប៉ាញ និងប្រទេសស៊ុយអែត។
អាហារូបករណ៍ Erasmus Mundus និង Erasmus+ ចែកចេញជាកម្រិតសិក្សាផ្សេងៗគ្នា ដូចជា កម្រិតកម្មវិធីផ្លាស់ប្តូរការសិក្សារយៈពេលខ្លី កម្រិតថ្នាក់បរិញ្ញាបត្រ បរិញ្ញាបត្រជាន់ខ្ពស់ បណ្ឌិត និងថ្នាក់ក្រោយបណ្ឌិត។ និស្សិតនឹងទៅសិក្សាលើឯកទេសផ្សេងៗគ្នា រួមមាន កសិកម្ម បរិស្ថាន ធុរកិច្ច អប់រំ វិស្វកម្ម សេដ្ឋកិច្ច សុខាភិបាល ជលផល ព្រៃឈើ ភូគព្ភសាស្ត្រ ព័ត៌មានវិទ្យា គ្រប់គ្រង និងអភិវឌ្ឍន៍ជនបទជាដើម៕
© រក្សាសិទ្ធិដោយ thmeythmey.com