ជាតិ
សង្គមជាតិ
×![]()
ដោយ: ថ្មីៗ
ការប្រឡងសញ្ញាបត្រមធ្យមសិក្សាចំណេះទូទៅ និងបំពេញវិជ្ជា នឹងប្រព្រឹត្តឡើងនៅថ្ងៃទី២៤ ខែសីហា ឆ្នាំ២០១៥ខាងមុខ។ សម័យប្រឡង ក្រសួងមិនអនុញ្ញាតឲ្យបេក្ខជន ប្រើប្រាស់ម៉ាស៊ី នគិតលេខក្នុងពេលប្រឡងឡើយ ដោយក្រសួងអប់រំ យុវជន និងកីឡា លើកហេតុផលមិន អនុញ្ញាតប្រើម៉ាស៊ីនគិតលេខនេះ គឺដើម្បីធានានូវសមភាព និងយុត្តិធម៌សម្រាប់បេក្ខជនទាំងអស់។ ក្នុងករណីក្រសួងរកឃើញបេក្ខជនប្រើប្រាស់ឬលាក់ទុកឧបករណ៍អេឡិចត្រូនិចត្រូវបានកំណត់ឲ្យធ្លាក់ដោយស្វ័យប្រវត្តិតែម្តង។
«ការរៀបចំនូវវិញ្ញាសានីមួយៗ បានគិតគូរយ៉ាងល្អិតល្អន់ ដោយផ្អែកទៅតាមពេលវេលា កំណត់។ម៉ាស៊ីនគិតលេខមានច្រើនប្រភេទរាប់មិនអស់ មានមុខងារប្រើប្រាស់តិចឬច្រើនទៅ តាមតម្លៃខ្ពស់ ឬទាប ដែលពុំមានសមធម៌ និងយុត្តិធម៌សម្រាប់បេក្ខជនទាំងអស់។ ការគិត លេខដោយខួរក្បាល នឹងបង្កើនភាពរួសរវើកធ្វើឲ្យមានការចងចាំបានល្អ»។ នេះ គឺជា ហេតុផលចម្បង ដែលក្រសួងមិនអនុញ្ញាតឲ្យប្រើម៉ាស៊ីនគិតលេខ អំឡុងពេលបេក្ខជន ប្រឡង។
ជាមួយគ្នានេះ ក្រសួងអប់រំនឹងធានាថា វិញ្ញាសាប្រឡងបាក់ឌុបក្នុងឆ្នាំ ២០១៥ នឹងបែកធ្លាយមុនឡើយ។ នៅចុងសប្តាហ៍ កន្លងទៅ រដ្ឋមន្ត្រីក្រសួងអប់រំ លោក ហង់ ជួន ណារ៉ុន បានប្រាប់អ្នកសារព័ត៌មានថា វិញ្ញាសាប្រឡង នឹងមិនអាចបែកធ្លាយឡើយ«អ្នកណាថាវិញ្ញាសា បែកធ្លាយនោះ នឹងត្រូវទទួលខុសត្រូវ ចំពោះមុខច្បាប់»។ នេះជាប្រសាសន៍បញ្ជាក់របស់លោករដ្ឋមន្ត្រី ដែលមានបំណងរឹតបន្តឹងការប្រឡង ដើម្បីពង្រឹងគុណភាពភាពអប់រំកម្ពុជា។
អ្នកនាំពាក្យក្រសួងអប់រំ លោក រស់ សាលីន បានប្រាប់សារព័ត៌មានថ្មីៗថា សម័យប្រឡងក្នុងឆ្នាំ២០១៥នេះក្រសួងចំណាយថវិកាជាង៣លានដុល្លារអាមេរិកដើម្បីរៀបចំការប្រឡងដែលចំនួននេះតិចជាង ១លានដុល្លារអាមេរិក បើប្រៀបធៀបទៅនឹងឆ្នាំ ២០១៤ កន្លងទៅ។ថវិកានឹងយកទៅចំណាយបេសកកម្មមន្ត្រីអប់រំ និងសម្ភារនានាដែលបម្រើឲ្យការប្រឡង។
ការប្រឡងសញ្ញាបត្រមធ្យមសិក្សាទុតិយភូមិចំណេះទូទៅនិងបំពេញវិជ្ជាក្នុងឆ្នាំ២០១៥នេះ នឹងប្រព្រឹត្ដទៅនៅថ្ងៃទី២៤ ខែសីហាឆ្នាំ២០១៥ ខាងមុខ។ ទាំងថ្នាក់វិទ្យាសាស្ដ្រនិងថ្នាក់វិទ្យាសាស្ដ្រសង្គម មានបេក្ខជនប្រឡងសរុបចំនួន ៨៨,៤៨៨នាក់និងមានមណ្ឌលប្រឡង១៤៩មណ្ឌល ចែកជា ៣,៥៧៦បន្ទប់ នៅរាជធានីខេត្ដទាំង ២។បេក្ខជនធ្លាក់បាក់ឌុបឆ្នាំមុនជាង១ម៉ឺននាក់ក៏នឹងចូលរួមប្រឡងក្នុងឆ្នាំ ២០១៥ម្តងទៀតដែរ។
លទ្ធផលប្រឡងឆ្នាំនេះ ក្រសួងនឹងប្រកាសនៅរសៀលថ្ងៃទី១៥ ខែកញ្ញាឆ្នាំ២០១៥ សម្រាប់មណ្ឌលប្រឡងនៅរាជធានីភ្នំពេញ និងនៅថ្ងៃទី១៦ កញ្ញា សម្រាប់មណ្ឌលប្រឡងនៅ តាមបណ្តាខេត្តទាំង ២៤។
គួរបញ្ជាក់ផងដែរថា សម័យប្រឡងឆ្នាំ២០១៥នេះ ក្រសួងពុំមានគោលការណ៍រៀបចំការប្រឡងលើកទី២ ដូចឆ្នាំមុនទៀតឡើយ៕
Tag:
អប់រំ
© រក្សាសិទ្ធិដោយ thmeythmey.com
