ពីនេះ ពីនោះ
កំណាព្យ៖ ជំងឺល្មោភស្រា
× ជំងឺល្មោភស្រា
នៅទីក្រុងខ្មែរ ឃើញមានហូរហែរ តែហាងលក់ស្រា
សម្បូរណ៍អ្នកផឹក ស្រវឹងឡូឡា ខ្មែរឆ្គួតនឹងស្រា
មិនតិចលាននាក់។
មុនផឹកល្អជា សុភាពឬកពារ គួររាប់រាក់ទាក់
លុះពេលស្រវឹង ប្រែក្លាយជាយក្ស ហក់លោតទាត់ធាក់
មិត្តភក្តិខ្លួនឯង។
អ្នកកាន់អំណាច ខ្លះស្រវឹងកាច បាញ់បោះឥតក្រែង
ល្មើសបំពានច្បាប់ សម្លាប់គ្នាឯង ខូចខ្លួនទាំងក្មេង
បើវង្វេងស្រា។
គ្មានចំណេញសោះ បានត្រឹមខូចឈ្មោះ អាប់យសសក្តា
ស្រវឹងជានិច្ច ភ្លេចរឿងខេមរា នឹកឃើញតែស្រា
ធ្វើការមិននឹង។
សង្គមប្រមឹក ខួរក្បាលស្ពោធស្ពឹក ភ្លេចអស់ព្រលឹង
គេធ្វើឲ្យខ្មែរ គិតតែស្រវឹង គួរតែខ្មែរប្រឹង
លះបង់ចោលចេញ។
ស្រវឹងដល់ណា ពេលនេះខេមរា កំពុងទោម្នេញ
យើងផឹកសប្បាយ នៅក្រុងភ្នំពេញ ឯនៅស្រែវិញ
មានអ្នកដាច់ពោះ។
© រក្សាសិទ្ធិដោយ thmeythmey.com