ជាតិ
សង្គមជាតិ
ក្រសួងអប់រំរំពឹងថា បេក្ខជនប្រឡងជាប់បាក់ឌុបឆ្នាំ២០១៥ នឹងមានចំនួនច្រើនជាងឆ្នាំទៅ
× តាមរយៈបទពិសោធន៍កំណែទម្រង់រឹតបន្តឹងការប្រឡងសញ្ញាបត្រមធ្យមសិក្សាទុតិយភូមិកាលពីឆ្នាំ២០១៤កន្លងទៅ ប្រធាននាយកដ្ឋានមធ្យមសិក្សាចំណេះទូទៅ លោក អ៊ឹង ង៉ោហុក កត់សម្គាល់ឃើញថា សិស្សានុសិស្សភាគច្រើន បានខិតខំប្រឹងប្រែងសិក្សាជាងមុន ស្របពេលក្រសួងអប់រំបានជួយជម្រុញបន្ថែម។ ហេតុនេះ ប្រធាននាយកដ្ឋានមធ្យមសិក្សាចំណេះទូទៅ រំពឹងទុកមុនថា បេក្ខជនប្រឡងជាប់បាក់ឌុបឆ្នាំនេះ នឹងអាចមានចំនួនច្រើនជាងសម័យកំណែទម្រង់ការប្រឡងលើកទីមួយ។
សំឡេងលោក អ៊ឹង ង៉ោហុក៖
លោកថ្លែងបែបនេះ ក្នុងសន្និសីទសារព័ត៌មានស្តីពី ការរៀបចំការប្រឡងសញ្ញាបត្រមធ្យមសិក្សាទុតិយភូមិចំណេះទូទៅ និងបំពេញវិជ្ជា ក្នុងឆ្នាំ២០១៥ នៅ ថ្ងៃទី២៧ ខែកក្កដានេះ នៅទីស្តីការក្រសួងអប់រំ។ លោក អ៊ឹង ង៉ោហុក បញ្ជាក់ថា ក្រសួងអប់រំអាចវាយតម្លៃបានថា លទ្ធផលប្រឡងបាក់ឌុបឆ្នាំនេះ បេក្ខជននឹងអាចទទួលបានខ្ពស់ជាងឆ្នាំមុន គឺអាចច្រើនជាង សម័យប្រឡងទាំងពីរលើក នៅឆ្នាំមុនទៅទៀត ដោយលោកសំអាងថា ក្រសួងបានរៀបចំ ឯកសារវិញ្ញាសារឲ្យមានលក្ខណៈ តាមលទ្ធភាពដែលសិស្សអាចធ្វើបានពីកម្រិតទាប មធ្យម រហូតដល់កម្រិតខ្ពស់។
សូមបញ្ជាក់ផងដែរ ការប្រឡងសញ្ញាបត្រមធ្យមសិក្សាទុតិយភូមិចំណេះទូទៅ និងបំពេញវិជ្ជាក្នុងឆ្នាំ២០១៥នេះ នឹងប្រព្រឹត្ដឡើងនៅថ្ងៃទី២៤ ខែសីហា ខាងមុខ។ ទាំងថ្នាក់វិទ្យាសាស្ដ្រ និងថ្នាក់វិទ្យាសាស្ដ្រសង្គម មានបេក្ខជនចុះឈ្មោះប្រឡងសរុបចំនួន ៨៨,៤៨៨នាក់ បូកទាំងបេក្ខជនធ្លាក់បាក់ឌុបឆ្នាំមុនជាង ៥ពាន់នាក់។ មណ្ឌលប្រឡង ១៤៩មណ្ឌល ចែកជា ៣,៥៧៦បន្ទប់ នៅរាជធានីខេត្ដទាំង ២៥។ ឆ្នាំនេះដែរ ក្រសួងពុំមានគោលការណ៍រៀបចំការប្រឡងលើកទីពីរដូចឆ្នាំមុនទេ វាលែងតែមានករណីប្រធានសក្តិ៕
© រក្សាសិទ្ធិដោយ thmeythmey.com