ជាតិ
សង្គមជាតិ
លោក ហោ ណាំហុង នឹងចូលរួមកិច្ចប្រជុំអាស៊ានរយៈពេល ៤ថ្ងៃ នៅម៉ាឡេស៊ី
× ភ្នំពេញ៖ រដ្ឋមន្ត្រីការបរទេស និងសហប្រតិបត្តិការអន្តរជាតិ លោក ហោ ណាំហុង នឹងដឹកនាំគណៈប្រតិភូទៅចូលរួមកិច្ចប្រជុំអាស៊ាន ដែលនឹងប្រព្រឹត្តទៅរយៈពេល ៤ថ្ងៃពីថ្ងៃទី៣ ដល់ថ្ងៃទី៦ ខែសីហា ឆ្នាំ២០១៥ នៅទីក្រុងគួឡាឡាំពួរ ប្រទេសម៉ាឡេស៊ី។ លោកនឹងជួបពិភាក្សាទ្វេភាគីផងដែរ ជាមួយរដ្ឋមន្ត្រីការបរទេសប្រទេសមួយចំនួន ក្នុងនោះ រួមមាន រដ្ឋមន្ត្រីការបរទេសវៀតណាម ចិន រុស្ស៊ី និងអូស្ត្រាលីជាដើម។
បើតាមសេចក្តីជូនព័ត៌មានរបស់ក្រសួងការបរទេស ចុះថ្ងៃទី២៨ ខែកក្កដានេះ ដំណើរនេះ រៀបចំឡើងតបតាមការអញ្ជើញរបស់រដ្ឋមន្ត្រីការបរទេសម៉ាឡេស៊ី លោក ដាតូ ស្រ៊ីអានីហ្វាស ហាជី អាមេន (Dato’ Sri Anifah Haji Aman) ។
លោក ហោ ណាំហុង នឹងចូលរួមកិច្ចរបៀបវារៈប្រជុំអាស៊ាននានា រួមមាន កិច្ចប្រជុំរដ្ឋមន្ត្រីការបរទេស អាស៊ានលើកទី ៤៨ សន្និសីទក្រោយកិច្ចប្រជុំរដ្ឋមន្ត្រីការបរទេសជាមួយដៃគូសន្ទនាទាំង១០ របស់អាស៊ាន កិច្ចប្រជុំរដ្ឋមន្ត្រីការបរទេសអាស៊ានបូក៣លើកទី១៦ កិច្ចប្រជុំកំពូលរដ្ឋមន្ត្រីការបរទេសអាស៊ី បូព៌ាលើកទី៥ កិច្ចប្រជុំវេទិកាតំបន់អាស៊ានលើកទី២២ កិច្ចប្រជុំគណៈកម្មការនៃតំបន់អាស៊ីអាគ្នេយ៍គ្មានអាវុធនុយក្លេអ៊ែរ និងជំនួបរវាងរដ្ឋមន្ត្រីការបទេសអាស៊ានជាមួយតំណាងគណៈកម្មការអន្តររដ្ឋាភិបាលអាស៊ានស្តីពី សិទ្ធិមនុស្ស។
ក្រៅពីកិច្ចប្រជុំអាស៊ាន លោក ហោ ណាំហុង នឹងចូលរួមកិច្ចប្រជុំថ្នាក់រដ្ឋមន្ត្រីនៃគំនិតផ្តួចផ្តើមមេគង្គក្រោមលើកទី៨ កិច្ចប្រជុំរដ្ឋមន្ត្រីការបរទេសមេគង្គ ជប៉ុនលើកទី៨ និងកិច្ចប្រជុំរដ្ឋមន្ត្រីការបរទេសមេគង្គ កូរ៉េលើកទី៥។
អំឡុងពេលស្នាក់នៅនៅម៉ាឡេស៊ី លោក ហោ ណាំហុង នឹងជួបជាមួយរដ្ឋមន្ត្រីការបរទេសអាស៊ានដទៃទៀត និងនាយករដ្ឋមន្ត្រីម៉ាឡេស៊ី លោក ណាជិប រ៉ាហ្សាក់។ បន្ថែមពីនេះ លោកនឹងជួបពិភាក្សាទ្វេភាគីផងដែរ ជាមួយរដ្ឋមន្ត្រីការបរទេសវៀតណាម លោក ផាម ប៊ិញ ម៉ិញ (Pham Binh Minh) រដ្ឋមន្ត្រីការបរទេសប៉ាពួញូហ្គីណេ លោក វ៉ាង យី (Wang Yi) រដ្ឋមន្ត្រីការបរទេសចិន លោក ស៊ែហ្គេយ ឡារ៉ូវ (Sergey Lavrov) រដ្ឋមន្ត្រីការបរទេសនៃសហព័ន្ធរុស្ស៊ី និងរដ្ឋមន្ត្រីការបរទេស អូស្ត្រាលី លោកជំទាវ ជូលី ប៊ីស្សប (Julie Bishop)៕
© រក្សាសិទ្ធិដោយ thmeythmey.com