ជាតិ
សង្គមជាតិ
×![]()
ដោយ: ម៉ៅ សុផា
លោក ហង់ជួនណារ៉ុន រដ្ឋមន្ត្រីក្រសួងអប់រំ យុវជននិងកីឡា បានបំពាក់គ្រឿងឥស្សរយសជាបន្តបន្ទាប់ជូនលោកគ្រូ អ្នកគ្រូ និងបុគ្គលិកសិក្សា រួមទាំងមន្ត្រីអប់រំដែលចូលនិវត្តន៍នៅក្នុងខេត្តបន្ទាយមានជ័យ និងខេត្តឧត្តរមានជ័យ កាលពីថ្ងៃទី២៨ ខែកក្កដា។
នាពិធីនៅពេលព្រឹក លោក ហង់ ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា បានបំពាក់គ្រឿងឥស្សរិយយសការងារជូនបុគ្គលិកអប់រំ នៅក្នុងខេត្តចំនួន ៤១៣រូប (ស្រី ៩៣រូប) ដែលក្នុងនោះមេដាយថ្នាក់អស្សឫទ្ធិចំនួន ០៧រូប មេដាយមាសចំនួន ១០៦រូប មេដាយប្រាក់ចំនួន ១២០រូប និងមេដាយសំរឹទ្ធចំនួន ១៨០រូប។ នៅពេលរសៀល លោកបានបំពាក់គ្រឿងឥស្សរិយយសការងារជូនបុគ្គលិកអប់រំ នៅក្នុងខេត្តឧត្តរមានជ័យចំនួន ២៨០រូប ដែលក្នុងនោះមានមេដាយថ្នាក់មហាសេនាចំនួន ០១ មេដាយថ្នាក់ធិបឌិនចំនួន ០១ មេដាយមាសចំនួន ៧៤ មេដាយប្រាក់ចំនួន ៧៨ មេដាយសំរឹទ្ធចំនួន ៩៩ និងប័ណ្ណសរសើរចំនួន ២។ ពិធីនេះ ប្រព្រឹត្តនៅនៅ សាលាខេត្តឧត្តរមានជ័យផ្ទាល់។
យោងតាមការផ្សាយរបស់ទីភ្នាក់ងារព័ត៌មាន AKP លោក ហង់ជួន ណារ៉ុនបានមានប្រសាសន៍ថា ការផ្តល់នូវគ្រឿងឥស្សរិយយសដល់លោកគ្រូ អ្នកគ្រូ មន្ត្រីនិងអតីតមន្ត្រីអប់រំ គឺជាប្រវត្តិសាស្ត្រដ៏មានសារសំខាន់បំផុតដើម្បីលើកទឹកចិត្ត និងនាំឲ្យពួកគេអនុវត្តនូវគំរូដ៏ល្អនេះបន្តទៀត។
លោករដ្ឋមន្ត្រី បានបញ្ជាក់យ៉ាងដូច្នេះថា៖«ក្រសួងអប់រំបានលើកទឹកចិត្តដោយបានធ្វើការបំពាក់គ្រឿងឥស្សរិយយស ការងារជូនដល់លោកគ្រូ និងអ្នកគ្រូ នាពេលនេះគឺដោយសាររយៈពេលកន្លងមកអស់លោក បានបំពេញភារកិច្ច កាតព្វកិច្ចនិងចេះស្រឡាញ់ គោរព វិជ្ជាជីវៈ ជាគ្រូបង្រៀនប្រកបដោយសេចក្ដីថ្លៃថ្នូរសីលធម៌ល្អ មានសាមគ្គីភាពផ្ទៃក្នុងល្អ មានទស្សនៈស្នេហាជាតិ មាតុភូមិខ្ពស់ហ៊ានទទួលខុសត្រូវក្នុងការផ្ទេរចំណេះដឹងប្រកបដោយបទពិសោធន៍ល្អៗដល់សិស្សានុសិស្សគ្រប់រូប»។
អ្នកនាំពាក្យក្រសួងអប់រំ លោក រស់ សាលីន បានមានប្រសាសន៍ថា ការបំពាក់នូវគ្រឿងឥស្សរយសជូនមន្ត្រីអប់រំនេះ គឺចាប់ពីបឋមសិក្សា រហូតដល់មធ្យមសិក្សា។ លោកបញ្ជាក់ថា៖ «ក្រសួងបានផ្តល់គ្រឿងឥស្សរយសដល់លោកគ្រូ អ្នកគ្រូទាំងអស់ចាប់ពីបឋមសិក្សា មធ្យមសិក្សាបឋមភូមិ និងមធ្យមសិក្សាទុតិយភូមិ។ ហើយសូម្បីតែមន្ត្រីអប់រំផ្នែករដ្ឋបាល និងរហូតដល់ប្រធាននិង អនុប្រធានមន្ទីរខេត្ត ក៏ត្រូវបានបំពាក់គ្រឿងឥស្សរិយយសជូនដែរ» ៕
Tag:
ក្រសួងអប់រំ ឥស្សរយស
© រក្សាសិទ្ធិដោយ thmeythmey.com
