ពីនេះ ពីនោះ
យុវជនសម័យថ្មីពូកែទ្រឹស្តីជាងអនុវត្តន៍
×
ក្នុងបរិបទដែលបច្ចេកវិទ្យាព័ត៌មានសម្បូរបែប ការផ្លាស់ប្តូរព័ត៌មានមានសភាពរហ័សទាន់ចិត្តរវាងពីទ្វីបមួយទៅកាន់ទ្វីបផ្សេងមួយទៀត។ ការទទួលព័ត៌មានបានមកពីគ្រប់ទិសទី ជាភាសាខ្មែរក៏មាន ជាភាសាអង់គ្លេសក៏មាន និងជាភាសាផ្សេងៗទៀតក៏មាន។ ដោយសារតែយុវជន យុវនារី ទទួលបានព័ត៌មានច្រើនសម្បូរបែបយ៉ាងនេះ ពួកគេក៏មានទ្រឹស្តីកាន់តែច្រើន។ ពេលខ្លះ ទ្រឹស្តីហូរហៀរដល់កែងជើងឯណោះក៏មានដែរ។
មនុស្សវ័យចំណាស់សង្កេតឃើញថា យុវជនជំនាន់ថ្មីពូកែតែទ្រឹស្តីទេ តែមិនសូវពូកែអនុវត្ត។ ពេលទៅដល់ស្រុកកំណើតម្តងៗ យុវជន យុវនារី បង្ហាញចំណេះដឹងដែលខ្លួនមាន លើកហេតុផលផ្សេងមកបង្ហាញ លើកទ្រឹស្តីអ្នកប្រាជ្ញនេះ ឬអ្នកប្រាជ្ញនោះ មកជម្រាបប្រាប់ឪពុកម្តាយរបស់ពួកគេ។ ប៉ុន្តែខ្លួនគេមិនបានធ្វើអ្វីទាំងអស់ ពេលដល់ម៉ោងត្រឡប់មកភ្នំពេញវិញ និស្សិត ឬយុវជនខ្លះ លាដៃសុំលុយពីឪពុកម្តាយដែលធ្វើការដោយកម្លាំងកាយយកមកចាយវិញ។ មនុស្សចាស់គ្មានទ្រឹស្តីមែន តែមានចំណេះធ្វើ។ យុវជនសម័យថ្មីមានទ្រឹស្តីច្រើន តែមិនសូវចង់ធ្វើ ចង់តែដើរកម្សាន្តលេងអត់ប្រយោជន៍៕
© រក្សាសិទ្ធិដោយ thmeythmey.com