ពីនេះ ពីនោះ
«ខ្ញុំចាស់ហើយមិនអាចទទួលចំណេះដឹងបានទៀតទេ» តើពិតមែនឬ?
× ពិតណាស់បើចង់ចេះត្រូវតែរៀន ហើយការរៀននោះទៀតសោត អ្នកអាចរៀននឹងទទួលចំណេះដឹងបានទាំងអស់ មិនប្រកាន់ថាទាល់តែសិក្សានៅសាលាតែម្យ៉ាងនោះទេ ចំណេះដឹងវាដូចទៅនឹងការសន្សំទ្រព្យអញ្ចឹង យើងត្រូវសន្សំបន្តិចម្តងៗ មានន័យថាត្រូវសន្សំទាំងនៅសាលា ពីអ្នកដទៃ និងឯកសារដែលពាក់ព័ន្ធទាំងអស់។ យើងអាចចម្រើនចំណេះដឹងគ្រប់ពេលវេលា គ្រប់ទីកន្លែងមិនថាចាស់ ឬក៏ក្មេងនោះទេ ឲ្យតែបើកគំនិតបើកចិត្តរបស់ខ្លួនឲ្យទូលាយ ដើម្បីទទួលយកនូវចំណេះដឹងទាំងនោះ។ តើទស្សនៈដែលលើកឡើងថា
« ខ្ញុំចាស់ហើយមិនអាចទទួលចំណេះដឹងបានទេ» ជាការពិតមែន ឬក៏អត់?
ទស្សនៈដែលលើកឡើងថា «ខ្ញុំចាស់ហើយមិនអាចទទួលចំណេះដឹងបានទេ» វាជាការយល់ខុស ព្រោះថាយើងអាចទទួលចំណេះដឹងរហូតមួយជីវិត លុះត្រាតែអ្នកបាត់បង់សតិលែងដឹងខុសត្រូវទើបមិនអាចទទួលចំណេះដឹងបាន ត្រឹមតែចាស់គ្មានរឿងអ្វីដែលមិនអាចទទួលបាននោះទេ។ ចំពោះទស្សនៈខាងលើនេះ វាគ្រាន់តែជាការលើកឡើងរបស់មនុស្សដែលអួតអាងថាខ្លួនចាស់ ខ្លួនមានចំណេះដឹងរឿងអ្វីទៅរៀនពីក្មេង ឬអ្នកណានោះទៀត នេះជាការចាក់សោរខ្លួនឯងតែប៉ុណ្ណោះ។ យើងមើលបណ្ឌិតទាំងឡាយលោកតែងតែសិក្សារៀនសូត្រពេញមួយជីវិតរបស់លោក ទោះស្ថិតនៅក្នុងសភាពបែបណាក៏ដោយ ការទទួលចំណេះដឹងរបស់លោកមិនដែលប្រកាន់ថាអ្នកនោះក្មេងជាងខ្លួន កម្រិតវប្បធម៌ទាបជាង ស្គាល់ឬមិនស្គាល់នោះទេក៏លោកអាចសទទួលចំណេះដឹងបានដែរ ( បន្ទាបខ្លួនទទួលចំណេះដឹងមិនថោកទាបទេ មនុស្សដែលលើកខ្លួនហួសពីអ្វីដែលខ្លួនមានទើបថោក )។
យើងត្រូវចងចាំថាការសិក្សារៀនសូត្ររបស់មនុស្សយើងមានពីរ គឺការសិក្សាក្នុងប្រព័ន្ធ នឹងការសិក្សាក្រៅប្រព័ន្ធ។ ការសិក្សាក្នុងប្រព័ន្ធជាការសិក្សានៅតាមសាលារៀន ហើយការសិក្សានេះត្រូវពឹងផ្អែកលើគ្រូស្ទើរទាំងស្រុង ចំណែកការសិក្សាក្រៅប្រព័ន្ធវិញ ជាការសិក្សាដែលមិនបាច់ចូលសាលារៀន តែត្រូវរៀនដោយខ្លួនឯង រៀនពីមនុស្សជុំវិញខ្លួន រៀនពីសង្គម រៀនពីពិភពលោក។ អាស្រ័យហេតុនេះហើយបានជាមានទ្រឹស្តីមួយថា «អី្វដែលនៅជុំវិញខ្លួនយើង ជាគ្រូរបស់យើង» ។
© រក្សាសិទ្ធិដោយ thmeythmey.com