ពីនេះ ពីនោះ
ស្រវឹងជោគយប់មិញ គួរធ្វើម៉េចទើបស្វាងវិញទៅ?
× ក្រោយពីចូលរួម ក្នុងពិធីជប់លៀង នៅយប់ថ្ងៃចុងសប្តាហ៍រួចមក ភាគច្រើន សុភាពបុរសតែងត្រឡប់មកផ្ទះវិញ ដោយអាការៈវិលមុខខ្លាំង ឈឺក្បាល ឈឺក្រពះ។ ដូច្នេះ តើគួរធ្វើដូចម្តេច ទើបអាចធូរស្រាល ពីការស្រវឹងយប់មិញបានទៅ? បើយោងទៅតាមការសិក្សាបានឲ្យដឹងថា ដើម្បីបង្ការការស្រវឹង អ្នកគួរតែយល់ដឹង ពីរបៀបដែលរាងកាយអ្នកផ្ទាល់ ប្រតិកម្មនឹងគ្រឿងស្រវឹងនោះ។ គ្រឿងស្រវឹង គឺជាភេសជ្ជៈងាយនឹងនាំឲ្យនោម ដូច្នេះ អ្នកអាចនឹងនោមកាន់តែច្រើន រហូតដល់ខ្សោះពីខ្លួនទៀតក៏មានដែរ។ ក្រៅពីនេះ សារធាតុផ្សេងៗរបស់គ្រឿងស្រវឹង នឹងធ្វើឲ្យអ្នកឈឺក្រពះ ហើយអាចរហូតដល់មានអារម្មណ៍ ចង់ចង្អោរទៀតផង។ ដើម្បីអាចបញ្ឈប់ការស្រវឹងបាន អ្នកគួរតែឈប់ផឹកគ្រឿងស្រវឹងនោះតែម្តង។ ដើម្បីព្យាបាល អ្នកគួរតែត្រូវចំណាយពេលពី ៨ ទៅ ២៤ ម៉ោង ទើបបាត់ទៅវិញ។
ដើម្បីព្យាបាល អាការៈឈឺក្បាល ចង្អោរ និងរោគសញ្ញាផ្សេងៗទៀត ចូរសាកល្បង តាមវិធីដូចខាងក្រោមនេះ ៖
ញ៉ាំទឹក
ការទទួលទានទឹក គឺជារឿងសំខាន់ណាស់ ដើម្បីបង្គ្រប់ជាតិទឹក ខណៈពេលដែលអ្នក ញ៉ាំគ្រឿងស្រវឹង។ ចូរទទួលទានទឹកឲ្យបានច្រើន នៅចន្លោះពេលញ៉ាំគ្រឿងស្រវឹង។ បើមិនដូច្នេះទេ អ្នកនឹងអាចមានអារម្មណ៍ដូចជា អស់កម្លាំង ឬមិនស្រួលខ្លួន នៅថ្ងៃបន្ទាប់ជាមិនខាន។ ការញ៉ាំទឹកបន្ថែម នឹងជួយបង្គ្រប់ជាតិទឹកផង ព្រមទាំងច្រោះសារធាតុផ្សេងៗ ដែលធ្វើឲ្យមានរោគសញ្ញាផង។
ញ៉ាំភេសជ្ជៈផ្សេងៗទៀត
ការញ៉ាំទឹកមិនគ្រប់គ្រាន់ទេ យកល្អ គួរតែញ៉ាំភេសជ្ជៈណា ដែលសម្បូរអេឡិចត្រូលីត្រ ដូចជា ភេសជ្ជៈសម្រាប់អ្នកហាត់កីឡា ទឹកដូង ឬទឹកស៊ុប។ ភេសជ្ជៈទាំងនេះ អាចជួយស្តារឡើងវិញ នូវជាតិអំបិល និងប៉ូតាស្យូម ដែលបាត់បង់ក្រោយពីញ៉ាំគ្រឿងស្រវឹងច្រើនបាន។
ញ៉ាំខ្លាញ់សិន មុនញ៉ាំគ្រឿងស្រវឹង
ការញ៉ាំប្រេងអូលីវមួយស្លាបព្រាបាយ មុនចូលរួមពិធីញ៉ាំគ្រឿងស្រវឹង ក្នុងកម្មវិធីជប់លាង អាចជួយបង្ការការស្រវឹងបាន។ ការញ៉ាំភីហ្សា ឬអាហារសម្បូរជាតិខ្លាញ់ផ្សេងទៀត គឺមានប្រសិទ្ធភាពដូចគ្នាអញ្ជឹង។ អាហារបែបនេះ នឹងជួយផ្តល់ភាពរំអិលដល់ពោះវៀន ដូច្នេះ គ្រឿងស្រវឹង នឹងត្រូវការពេលយូរទើបស្រូបចូលក្នុងរាងកាយបាន។
ញ៉ាំស្ករ ឬអាហារផ្អែម ក្នុងពេលញ៉ាំគ្រឿងស្រវឹង
ការសិក្សាបានឲ្យដឹងថា សារធាតុផ្អែម Fructose ប្រហែលជាជួយពន្យឺតការរំលាយអាហារ និងបន្ថយការប្រឈមនឹងស្រវឹងបាន។ ការញ៉ាំស្ករ ក្នុងពេលកំពុងផឹងគ្រឿងស្រវឹង ពិតជារឿងសំខាន់ណាស់។ ចូរព្យាយាមញ៉ាំទឹកក្រូចច្របាច់ស្រស់ នៅចន្លោះពេលញ៉ាំស្រាក្រឡុក។
ញ៉ាំអាហារពេលព្រឹក
ការញ៉ាំអាហារនៅពេលព្រឹក អាចជួយបន្ថយរោគសញ្ញា នៃការស្រវឹងបាន។ អេឡិចត្រូលីត្រក្នុងអាហារនឹងជួយជំនួសនូវការបាត់បង់ និងទទួលបានកាឡូរី ដល់រាងកាយវិញ។ បើសិនជាអ្នកស្រវឹង ចូរញ៉ាំអាហារណា ដែលងាយរំលាយបន្ថែមទៅ។
ទំពារខ្ញី
មនុស្សយើងប្រើខ្ញី ដើម្បីកាត់បន្ថយការក្អួត និងចង្អោរ។ ដូច្នេះ អ្នកក៏អាចសាកល្បងទំពារខ្ញីមួយដុំ ក្រោយពីស្រវឹងមួយយប់បានដែរ។ ការស្រាវជ្រាវបានឲ្យដឹងថា ការញ៉ាំខ្ញីលាយស្ករត្នោត មុនពេលផឹកគ្រឿងស្រវឹង នឹងកាត់បន្ថយការចង្អោ និងក្អួតបាន។
គេងឲ្យបានច្រើន
ការគេងមិនគ្រប់គ្រាន់ អាចធ្វើឲ្យរោគសញ្ញា នៃការស្រវឹងកាន់តែធ្ងន់ធ្ងរ ដូច្នេះ ចូរចំណាយពេលគេងថ្ងៃ ឲ្យបានយូរបន្តិចទៅ ព្រោះវាជាវិធី ជួយឲ្យអ្នកឆាប់ជាមកវិញ។
ចំពោះអ្នកក្អួតច្រើនដង
នេះគឺជាដំណើរការ ធម្មជាតិរបស់រាងកាយ ក្នុងការជំនះជាតិពុល ក្នុងគ្រឿងស្រវឹង។ ទោះបីជាយ៉ាងណាក៏ដោយ ការក្អួត អាចនាំឲ្យគ្រោះថ្នាក់ ដល់ជីវិតធ្ងន់ធ្ងរបាន ដូចជា ខ្សោះជាតិទឹក និងអតុល្យភាពអេឡិចត្រូលីត្រ។ បើសិនជាអ្នក កំពុងតែមានអារម្មណ៍ចង់ក្អួតហើយនោះ ចូរឈប់ការផឹកគ្រឿងស្រវឹង និងចាប់ផ្តើមញ៉ាំទឹកធម្មតា ឲ្យច្រើនវិញទៅ។
សន្លប់ឈឹង
បើសិនជាមនុស្សម្នាក់ ផឹកគ្រឿងស្រវឹងច្រើន សន្លប់ និងបាត់ស្មារតី ដោយសារគ្រឿងស្រវឹងនោះ ចូរនាំគេទៅមន្ទីរពេទ្យ ដែលនៅជិតបំផុតទៅ ព្រោះពួកគេអាចស្ថិតនៅក្នុង ស្ថានភាពគ្រោះថ្នាក់ នៃការខក់ដោយសារកំអួតខ្លួនឯង ឬទៅជាហ្សុក៕
ត្រួតពិនិត្យដោយ www.health.com.kh
© រក្សាសិទ្ធិដោយ thmeythmey.com