សាស្ត្រាចារ្យសារព័ត៌មានអាមេរិកធ្វើបាឋកថានៅសារព័ត៌មានថ្មីៗ

ជាតិ

សង្គមជាតិ

សាស្ត្រាចារ្យសារព័ត៌មានអាមេរិកធ្វើបាឋកថានៅសារព័ត៌មានថ្មីៗ

11, Aug 2015 , 1:56 pm

រូបភាព

ដោយ: ថ្មីៗ

លោកស្រីសាស្ត្រាចារ្យ Janet Steele កំពុងបំពេញទស្សនកិច្ច១សប្តាហ៍នៅក្នុងប្រទេសកម្ពុជាដើម្បីចែករំលែកពិសោធន៍ផ្នែកព័ត៌មានដល់អ្នកកាសែតកម្ពុជា។ ក្នុងចំណោមអង្គភាពសារព័ត៌មានមួយចំនួន លោកស្រីសាស្ត្រាចារ្យបានទស្សនកិច្ចសារព័ត៌មានអេឡិចត្រូនិកថ្មីៗ និងបានធ្វើបាឋកថារយៈពេល២ម៉ោងដល់អ្នកកាសែតថ្មីៗនៅព្រឹកថ្ងៃទី១១សីហានេះ។

ប្រធានបទសំខាន់ពីរដែលលោកស្រីសាស្ត្រាចារ្យបានលើកយកពិភាក្សាជាមួយអ្នកសារព័ត៌មានថ្មីៗ៖ ធ្វើការងារសារព័ត៌មានដ៏ល្អក្នុងយុគសម័យនៃសារព័ត៌មានអេឡិចត្រូនិក និងសារសំខាន់នៃសារព័ត៌មានឯករាជ្យក្នុងដំណាក់កាលអន្តរកាលឆ្ពោះទៅរកប្រជាធិបតេយ្យ។

លោកស្រី Janet Steele គឺជាសាស្ត្រាចារ្យផ្នែកសារព័ត៌មាននៃមហាវិទ្យាល័យសារព័ត៌មាន និងកិច្ចការសាធារណៈនៃសាកលវិទ្យាល័យ George Washington។
ទស្សនកិច្ចរបស់លោកស្រីសាស្ត្រាចារ្យនៅកម្ពុជា បានកើតឡើងតាមរយៈអញ្ជើញរបស់សា្ថនទូតអាមេរិកប្រចាំកម្ពុជា។ លោកស្រីធ្លាប់បានធ្វើការច្រើនឆ្នាំនៅក្នុងប្រទេសឥណ្ឌូនេស៊ី និងម៉ាឡេស៊ី និងជាវាគ្មិនពិសេសរបស់ក្រសួងការបរទេសអាមេរិកនៅក្នុងប្រទេសជាច្រើនក្នុងតំបន់អាស៊ី និងមជ្ឈឹមបូព៌ា។

អ្នកសារព័ត៌មានថ្មីៗ បានទទួលពិសោធន៍ និងចំណេះដឹងជាច្រើនពីលោកស្រីសាស្ត្រាចារ្យទាក់ទងនឹងស្ថានភាពសារព័ត៌មាននៅក្នុងប្រទេសឥណ្ឌូនេស៊ី ម៉ាឡេស៊ី និងនៅក្នុងសហរដ្ឋអាមេរិក។

សារព័ត៌មានអេឡិចត្រូនិកថ្មីៗ បានផ្តល់តម្លៃយ៉ាងខ្លាំងចំពោះការចែករំលែកពិសោធន៍ដើម្បីធ្វើអោយវិស័យសារព័ត៌មាននៅកម្ពុជាកាន់តែមានតម្លៃ និងឥទ្ធិពល៕