មិត្តភាពឧត្តមសង្គមត្រូវការ!
(បទពាក្យប្រាំពីរ)
១. បើកកំព្យូទ័រមើលរូបភាព
អារម្មណ៍ជ្រួលជ្រាបពេញឱរ៉ា
នឹកដល់មិត្តចាស់ធ្លាប់ចរចា
មិត្តថ្មីប្រឹក្សាផ្ដល់យោបល់។
២. ធ្លាប់លេងសម្ដែងថ្លែងគំនិត រៀបរាប់ផ្លូវចិត្តស្រាយកង្វល់
ប្រាប់រឿងផ្ទាល់ខ្លួនជួយដោះទាល់ ជួយស្រាយចម្ងល់គ្រូដាក់ឱ្យ។
៣. យើងមានអាហារញាំជុំគ្នា យើងជួយទុក្ខគ្នាពេលទន់ខ្សោយ
យើងដឹងធុរៈមិនបណ្ដោយ យើងជួយស្វែងឱ្យមានដំណោះ។
៤. យើងសាងសាមគ្គីដោយចិត្តស្ម័គ្រ ប្រៀបដូចច្រវាក់ដោយស្រួលស្រុះ
ជួយគិតជួយធ្វើមិនឱ្យទាស់ មិត្តភាពយើងស្មោះចំពោះគ្នា។
៥. នេះពិតជីវិតជានិស្សិត បញ្ជ្រាប់ខ្លួនពិតទស្សនវិជ្ជា
យកមូលដ្ឋានទន់ជាមាគ៌ា ដឹកនាំនាវាខ្សែជីវិត។
៦. យើងយកការគិតពិចារណា ពុទ្ធិបញ្ញាវិថីពិត
យកភាពស្មោះត្រង់ចងគំនិត មិត្តភាពយើងស្ថិតល្អប្រពៃ។
៧. ខុងជឺថ្លែងថាការរាប់មិត្ត យកសីលធម៌ពិតជាតម្លៃ
គុណធម៌ជាភពប្រសើរក្រៃ ស្មោះត្រង់ជូនជ័យមិត្តភាពល្អ។
៨. ពុទ្ធិបញ្ញាជាប្រធាន វិចារណញ្ញាណជាចលក
ជំរុញឆន្ទៈឱ្យសាងល្អ សាងមិត្តថ្លៃថ្នូរល្អត្រចង់។
៩. សូក្រាតឆ្លាតវៃស្ដីប្រាប់ជាក់ កសាងឆន្ទៈដោយផ្ចិតផ្ចង់
ប្រកាន់សច្ចគុណធម៌ត្រង់ ជីវិតឧត្តមមិត្តភាពថ្លៃ។
១០. ប្លាតុងស្យង់គិតគំនិតសូក្រាត គ្រូល្អសរស្អាតសច្ចគ្មានពីរ
មនុស្សពិតឧត្តមលើធរណី ដឹកនាំជីវីដោយសេចក្ដីពិត។
១១. អារីស្តូតលោកគិតពីតម្លៃ ថាមិត្តប្រពៃកើតពីចិត្ត
កុសលខ្ពង់ខ្ពស់ល្អប្រសិទ្ធ នាំមិត្តភាពស្ថិតក្នុងផ្លូវល្អ។
១២. ព្រះពុទ្ធយល់ជ្រៅនូវជីវី ស្គាល់ច្បាប់លោកីយក្រៃបវរ
ថែមច្បាប់ធម្មជាតិលាតជាធម៌ សាងស្ពានផ្លូវល្អជាប្រធាន។
១៣. ត្រូវប្រកាន់ភ្ជាប់នៅសីលធម៌ ចិត្តស្ងប់មិនញ័រប៉ងបំពាន
យកសីលសមាធិជាមេរៀន កសាងមិត្តមានដោយបញ្ញា។
១៤. បែបនេះទើបក្លាយជាសរសៃ ក្លាយពេជ្រចរណៃដ៏ភ្លឺថ្លា
ក្លាយជាបេះដូងជាតិខេមរា ក្លាយជាកាយានៃជាតិខ្មែរ។
១៥.ព្រោះជាតិមួយនេះមិនត្រូវការ ទំពាំងខេមរាដែលជាប់ក្អែល
រលួយពុកផុយស្រាលទទេ នាំសង្គមខ្មែរធ្លាក់អវសាន្ត។
១៦. ខ្មែរត្រូវការទំពាំងរឹងមាំ គុណធម៌ឧត្ដមជាត្រីមុខ
សីលធម៌បញ្ញាជាឃ្លាំងទុក សច្ចនាំសុខជូនជនប្រុសស្រី។
១៧. ជាទំពាំងស្រឡាញ់សន្តិភាព ស្រឡាញ់ជនជាតិលើទឹកដី
គឺផ្ដើមពីមិត្តភាពល្អប្រពៃ សង្គមជួបជ័យគ្រប់វេលា។
ដោយ៖ និស្សិតទស្សនវិជ្ជា ស៊ុំ សុជាតិ