ជាតិ
×![]()
ទីប្រឹក្សាពលករខ្មែរនៃស្ថានទូតកម្ពុជា ប្រចាំប្រទេសថៃ លោក ជៀម ឡាម៉ាទីន បានបញ្ជាក់ថា មិនមានពលករខ្មែរស្លាប់ ឬរងរបួស ដោយសារតែការបំផ្ទុះគ្រាប់បែក នៅក្នុងទីក្រុងបាងកក ប្រទេសថៃ កាលយប់ម្សិលមិញឡើយ។ មន្ត្រីរូបនេះ បន្ថែមថា ស្ថានទូតក៏បានផ្ដល់ព័ត៌មានដល់ពលករខ្មែរ កុំអោយដើរទៅទីប្រជុំជន និងដើរចល័តនៅកន្លែងទំនើបៗ ដែលនាំឲ្យអសន្តិសុខដល់ខ្លួន។
លោក ជៀម ឡាម៉ាទីន អះអាងថា កន្លែងបំផ្ទុះគ្រាប់បែកកាលពីយប់ម្សិលមិញ គឺនៅឆ្ងាយពីកន្លែងរស់នៅ និងកន្លែងធ្វើការរបស់ពលករខ្មែរ។ បើតាមទីប្រឹក្សាពលកររូបនេះ ពលករខ្មែរបាននាំគ្នាធ្វើការជាធម្មតា ដោយមិនការជ្រួលច្របល់ឡើយ។ ថ្លែងប្រាប់សារព័ត៌មានថ្មីៗ តាមរយៈទូរសព្ទនៅថ្ងៃអង្គារនេះ លោក ជៀម ឡាម៉ាទីន បញ្ជាក់យ៉ាងដូច្នេះ៖«យើងបានទាក់ទងទៅរោងចក្រគ្រប់ទីកន្លែងនៅប្រទេសថៃ ប្រាប់ដល់កម្មករខ្មែរឲ្យពួកគេចេញពីធ្វើការ នៅតែកន្លែងរស់នៅខ្លួនបានហើយ កុំឲ្យពួកគេដើរចល័តគ្រប់ទីកន្លែង ដែលនាំឲ្យអសុវត្ថិភាព និងកុំឲ្យអាជ្ញាធរថៃគេសង្ស័យ គេចាប់ខ្លួន ព្រោះគេកំពុងតាមដានករណីបំផ្ទុះគ្រាប់បែក»។
បើតាមមន្ត្រីខ្មែររូបនេះ អាជ្ញាធរថៃក៏បានហាមប្រជាពលរដ្ឋមិនឲ្យទៅកន្លែងទំនើបធំៗ នៅទីក្រុងបាងកកដែរ។
យ៉ាងហោចណាស់មានមនុស្សស្លាប់២២នាក់ ដោយសារការបំផ្ទុះគ្រាប់បែកនៅទីក្រុងបាងកក កាលពីយប់ម្សិលមិញ។ ក្នុងចំណោមអ្នកស្លាប់នោះមានជនជាតិហ្វីលីពីនម្នាក់ និងចិនពីរនាក់ផង ដែលពួកគេជាអ្នកទេសចរ។នេះបើតាមសារព័ត៌មានបាងកកប៉ុស្ដិ៍ថៃ។
រដ្ឋមន្ត្រីក្រសួងការពារជាតិថៃ Prawit Wongsuwan បានសន្និដ្ឋានថា ជនល្មើសយកជនបរទេសជាអ្នកទេសចរជាគោលដៅនៃការវាយប្រហារ ដើម្បីបំផ្លាញឧស្សាហកម្មទេសចរណ៍ថៃបច្ចុប្បន្ន។ នេះមានន័យថាវាជាសកម្មភាពបំភ័យអ្នកទេសចរណ៍មិនឲ្យមកទស្សនាប្រទេសថៃ។ យ៉ា ងណាក៏ដោយរបបសឹកនៅតែអះអាងថា ការបំផ្ទុះគ្រាប់បែកគ្មានពាក់ព័ន្ធបញ្ហានយោបាយ ឬមានពាក់ព័ន្ធក្រុមឧទ្ទាមឥស្លាមនៅភាគខាងត្បូងឡើយ៕
Tag:
ផ្ទុះគ្រាប់បែកនៅបាងកក
© រក្សាសិទ្ធិដោយ thmeythmey.com
