ជាតិ
សង្គមជាតិ
ក្រសួងមហាផ្ទៃ ចាត់វិធានការទប់ស្កាត់មន្ត្រីរាជការបើកប្រាក់ខែ ២ កន្លែង
×
រដ្ឋមន្ត្រីក្រសួងមហាផ្ទៃ លោក ស ខេង ប្រកាសចាត់វិធានការ ទប់ស្កាត់ មិនឲ្យមន្ត្រីរាជការស៊ីវិលក្រសួងមហាផ្ទៃ បើកប្រាក់ប្រចាំខែ និងប្រាក់បេសកកម្មពីរកន្លែងឡើយ។ លោក ព្រមានថា បើមានមន្ត្រីរាជការស៊ីវិលក្រសួងមហាផ្ទៃ បើកប្រាក់ប្រចាំខែ និងប្រាក់បេសកកម្មពីរកន្លែងទៀត ក្រសួងនឹងចាត់វិធានការផ្លូវច្បាប់ទៅលើបុគ្គលទាំងនោះ។ នេះបើតាមលិខិតក្រសួងមហាផ្ទៃ ចុះថ្ងៃទី២១ សីហា ប្រាប់ទៅប្រធានលេខាធិការដ្ឋានគណៈកម្មាធិការជាតិសម្រាប់ការអភិវឌ្ឍន៍តាមបែបប្រជាធិបតេយ្យនៅថ្នាក់ក្រោមជាតិ (គ.ជ.អ.ប) និងអង្គភាពចំណុះទីស្ដីការក្រសួង រាជធានី ខេត្ត។
លិខិតដដែលបន្ដថា ក្រសួងនឹងចាត់វិធានការឲ្យលេខាធិការដ្ឋាន (គ.ជ.អ.ប) អង្គភាពចំណុះទីស្ដីការក្រសួងមហាផ្ទៃ ត្រូវផ្សព្វផ្សាយ និងណែនាំបន្ទាន់ដល់មន្ត្រីរាជការស៊ីវិលក្រោមឱវាទរបស់ខ្លួនត្រូវមកបំពេញការងារជូនអង្គភាព និងត្រូវបំពេញបែបបទទទួលប្រាក់បៀវត្ស ឬប្រាក់បេសកកម្មតែមួយកន្លែង ដោយមិនត្រូវបន្តបើកប្រាក់បៀវត្សប្រចាំខែ ឬប្រាក់បេសកកម្ម២កន្លែងទៀតនោះឡើយ។ ហើយបញ្ហាទាំងនេះត្រូវចាត់វិធានការទប់ស្កាត់ ធ្វើយ៉ាងណាកុំឲ្យបញ្ហាទាំងនេះ កើតមានឡើងនៅក្នុងអង្គភាព។
បើតាមលិខិតខាងលើនោះ បើសិនជាមន្ត្រីទាំងនោះមិនព្រមអនុវត្តតាមការណែនាំ ហើយនៅតែបន្តបើកប្រាក់បៀវត្សប្រចាំខែ ឬប្រាក់បេសកកម្ម ២ កន្លែងទៀតនោះ ក្រសួងមហាផ្ទៃនឹងចាត់វិធានការនានាចំពោះសាមីខ្លួនស្របតាមច្បាប់ និងលិខិតបទដ្ឋានគតិយុត្តិ។
លិខិតរបស់ក្រសួងមហាផ្ទៃ បញ្ជាក់មូលហេតុថា កន្លងមកក្រសួងបានស្រាវជ្រាវរកឃើញថា មន្ត្រីរាជការស៊ីវិលមួយចំនួន បានទៅបម្រើការងារនៅស្ថាប័ន អង្គភាពផ្សេងៗ ក្រៅពីអង្គភាពរបស់ខ្លួន ដូចជានៅតាមអង្គការសង្គមស៊ីវិល និងវិស័យឯកជនជាដើម។ មន្ត្រីរាជការស៊ីវិលទាំងនោះ ទទួលបានប្រាក់បៀវត្សប្រចាំខែ២កន្លែង ដោយមានមន្ត្រីសាលាខេត្តខ្លះ ទូទាត់ថ្លៃបេសកកម្មពីរលើកនៅក្នុងការងារតែមួយ គឺទូទាត់ប្រាក់ក្រៅខេត្តផង និងក្នុងខេត្តផង នៅពេលបំពេញបេសកកម្មម្ដង៕
© រក្សាសិទ្ធិដោយ thmeythmey.com