ជាតិ
សង្គមជាតិ
ក្រោយគ្រោះថ្នាក់ចរាចរណ៍ គ្រូកីឡាម្នាក់ធ្លាក់ខ្លួនពិការ បាត់ប្រាក់ខែ គ្មានយុត្តិធម៌
×![]()
ដោយ: ថ្មីៗ
ជាគ្រូកីឡាម្នាក់ក្នុងវិទ្យាល័យក្រុងព្រះសីហនុ លោក អ៊ូ កែវ រកចំណូលបានត្រឹមតែប្រាក់ខែគោលរបស់គ្រូបង្រៀនម្នាក់ប៉ុណ្ណោះដែលពិការនឹងធ្វើឲ្យជីវភាពគ្រួសារលោកបានល្អប្រសើរ។ ប៉ុន្តែចាប់ពីខែមិនាឆ្នាំ២០១៣មក គ្រួសារគ្រូកីឡាម្នាក់កាន់តែជួបភាពដុនដាប។ បរទេសបានជិះម៉ូតូបុកម៉ូតូរបស់លោកគ្រូ នេះបើតាមការអះអាងរបស់លោកគ្រូ ហើយបានធ្វើឲ្យលោកគ្រូធ្លាក់ខ្លួនពិការដល់សព្វថ្ងៃនេះ ដោយមិនបានទទួលសំណងសោះឡើយ។ 
«ខ្ញុំកំពុងបើកបរតាមផ្លូវធម្មតា ពេលនោះជនបរទេសម្នាក់បានជិះម៉ូតូបុកខ្ញុំពេញទំហឹង យើងក៏ដួលទាំងអស់គ្នា។ មន្ត្រីប៉ូលីសបានទទួលសំណូក ហើយដោះលែងជនបរទេសនោះឲ្យរួចខ្លួន។ មិនមានជនណាចេញមុខទទួលខុសត្រូវលើឧបទ្ទវហេតុអាក្រក់មកលើរូបខ្ញុំនេះឡើយ»។ លោកគ្រូ អ៊ូ កែវ អាយុ៣៨ឆ្នាំ កំពុងរំឮកនិងរៀបរាប់បញ្ហារបស់លោកគ្រូ។
គ្មានសំណង គ្មានយុត្តិធម៌ លើសពីនេះលោកគ្រូត្រូវចំណាយថវិកាផ្ទាល់ខ្លួនអស់ជាច្រើនទៀតដើម្បីការព្យាបាលសង្គ្រោះជីវិតខ្លួនឯង។ ប៉ុន្តែថវិកាទាំងនោះមិនអាចជួយលោកគ្រូពីពិការភាពដែលមិនអាចធ្វើឲ្យលោកកម្រើកខ្លួនបាននោះឡើយ។ ធ្លាក់ខ្លួនពិការ ធ្វើការមិនបានចាប់តាំងពីថ្ងៃរងគ្រោះថ្នាក់មក ឈ្មោះលោកគ្រូត្រូវបានក្រសួងអប់រំប្តូរទៅជាមនុស្សចូលនិវត្តដែលមានប្រាក់ខែបន្តិចបន្តួច។ លោកស្រី ចាន់ធី ដែលភរិយាបានអំពាវនាវតាមរយៈសារព័ត៌មានថ្មីៗ ស្នើមិនឲ្យក្រសួងដាក់ឈ្មោះស្វាមីគាត់នៅជាអ្នកចូលនិវត្តន៍នោះទេ។ ហើយដោយសារតែបញ្ហាជីវភាពនេះហើយ គ្រូកីឡារូបនេះក៏បានសម្រេចចិត្តនាំភរិយា និងកូនអាយុ៤ឆ្នាំ ផ្លាស់ប្តូរមករស់នៅស្រុកកំណើតខាងភរិយាដែលស្ថិតនៅក្នុងស្រុកខ្សាច់កណ្តាល ខេត្តកណ្តាល។ នៅទីនេះ ភរិយារបស់លោកគ្រូត្រូវជាកម្មការិនី ដើម្បីស្វែងរកថវិកាចិញ្ចឹមគ្រួសារវិញម្តង។
សព្វថ្ងៃ មានសប្បុរសជន និងញាតិជិតខាងបានផ្តល់ជំនួយដល់គ្រួសារគ្រួកីឡារូបនេះខ្លះៗដែរ ប៉ុន្តែវាមិនអាចទ្រទ្រង់ជីវភាពបានគ្រប់គ្រាន់នោះទេ។ បើសង្ឃឹមលើសំណងដែលតុលាការរកឲ្យនោះ ក៏រឹតតែមិនសង្ឃឹមសម្រាប់គ្រួសារនេះ។ ប្រពន្ធលោកគ្រូ អ៊ូ កែវ បានបញ្ជាក់ថា៖ «តុលាការបានកោះហៅយើង ២ដងរួចមកហើយដើម្បីបំភ្លឺក្តី តែខ្ញុំគ្មានសង្ឃឹមទេ ព្រោះវាហាក់ដូចស្ងាត់ទៅៗ ហើយឥឡូវវាជាង ៣ឆ្នាំហើយគ្មានដែលឃើញលទ្ធផលនៅឡើយ»។
លេខទូរសព្ទរបស់គ្រួសារលោកគ្រូ អ៊ូ កែវ៖ ០៩៧ ៧២ ៧២ ៣៥៧ ប្រសិនបើសប្បុរសជនចង់ជួយឧបត្ថម្ភ
អត្ថបទ៖ សេង ធី
អត្ថបទ៖ សេង ធី
© រក្សាសិទ្ធិដោយ thmeythmey.com
