ពីនេះ ពីនោះ
ដើម្បីមានទំនាក់ទំនងល្អ នៅក្នុងក្រុមហ៊ុន តើអ្នកមិនគួរធ្វើអ្វីខ្លះ?
×
ក្រុមហ៊ុន ប្រៀបដូចជាកន្លែងចម្បាំង បើអ្នកមិនប្រុងប្រយ័ត្ន នោះអ្នកនឹងអាចស្លាប់គ្រប់ពេល ដោយសារតែទង្វើរបស់អ្នក។ ដូចនេះ ដើម្បីមានទំនាក់ទំនងល្អក្នុងក្រុមហ៊ុន តើអ្នកមិនគួរធ្វើអ្វីខ្លះ?
1. អ្នកមិនត្រូវលួចមើល ឯកសាររបស់មិត្តរួមការងាររបស់អ្នកឡើយ ហើយបើទូរស័ព្ទរបស់គេរោទិ៍ ឬមាននរណាផ្ញើសារមកគេ អ្នកមិនត្រូវសម្លឹងមើលទេ អ្នកគួរតែដាក់ភ្នែកចុះ នោះទើបអាចបញ្ជាក់បានថា អ្នកចេះគោរពគេ។
2. ការខ្ចីរបស់របរប្រើប្រាស់ផ្សេងៗ ពីមិត្តរួមការងាររួច មិនដាក់ទៅកន្លែងដើមឲ្យគេវិញ ធ្វើឲ្យគេស្អប់ខ្លាំងណាស់ នោះអ្នកនឹងក្លាយជាមនុស្ស ដែលគេស្អប់នៅក្នុងក្រុមហ៊ុន ហើយអ្នករាល់គ្នានឹងគិតថា អ្នកជាមនុស្សដែលគ្មានរបៀប។
3. អ្នកមិនត្រូវបាញ់ទឹកអប់ ដែលមានក្លិនធ្ងន់ពេកទេ ព្រោះវាប៉ះពាល់ដល់អារម្មណ៍ របស់មិត្តរួមការងារដទៃ ធ្វើឲ្យគេឈឺក្បាល គ្មានអារម្មណ៍ធ្វើការងារ។ ដូចនេះ អ្នកគួរតែចៀសវាងកុំធ្វើចំណុចនេះ បើអ្នកចង់មានទំនាក់ទំនងល្អ ជាមួយអ្នកដទៃ។
4. ក្រោយពេលដែលចេញពីធ្វើការហើយ អ្នកមិនត្រូវនៅតែទូរសព្ទ័ ទៅសួរមិត្តរួមការងារអ្នក ពីរឿងការងារទេ ព្រោះគេស្អប់ខ្លាំងណាស់ គេត្រូវការពេលវេលាផ្ទាល់ខ្លួនរបស់គេ ដូចនេះ ចូរអ្នកកុំរំខានគេឲ្យសោះ។
5. អ្នកមិនត្រូវនិយាយដើមរបស់មិត្តរួមការងារ ទៅប្រាប់ម្នាក់ទៀតទេ ព្រោះម្នាក់នោះ អាចទៅនិយាយត ចុងក្រោយ អ្នកនឹងស្លាប់ជាមិនខាន បើម្ចាស់ខ្លួនគេដឹង។
6. អ្នកមិនត្រូវរអ៊ូរទាំទេ ព្រោះវាស្តាប់ទៅទើសត្រចៀកខ្លាំងណាស់ ហើយធ្វើឲ្យគេធុញទៀតផង ដូចនេះ អ្នកត្រូវធ្វើការងារដោយស្ងប់ស្ងាត់ទើបល្អ មិនត្រូវយកមាត់ទៅនិយាយរឿង ដែលឥតបានការឡើយ។
7. នៅមុខចៅហ្វាយនាយ អ្នកមិនត្រូវធ្វើផ្សេង ហើយក្រោយធ្វើផ្សេងឡើយ ព្រោះបើអ្នកមានមុខពីរបែបនេះ ធ្វើឲ្យអ្នកនៅក្នុងក្រុមហ៊ុនស្អប់អ្នកណាស់៕
© រក្សាសិទ្ធិដោយ thmeythmey.com