អន្តរជាតិ
×![]()
ដោយ: ធីតា
នំ Cake ប្រវែង ១,៨ ម៉ែត្រ និងបង្កប់ដោយគ្រាប់ពេជ្រសុទ្ធចំនួន ៤ ០០០ គ្រាប់ គឺជានំដែលមានតម្លៃរហូតដល់ជិត ៧៥ លានដុល្លារ។ នំនេះត្រូវបានផលិតឡើងជាពិសេស សម្រាប់ពិធីខួបកំណើត និងពិធីភ្ជាប់ពាក្យរបស់កូនស្រីសេដ្ឋីម្នាក់រស់នៅក្នុងប្រទេសអារ៉ាប់រួម ដែលនឹងប្រារព្ធពិធីទាំងពីរនេះក្នុងពេលតែមួយ។
នំនេះផលិតឡើងដោយអ្នកច្នៃម៉ូដដ៏ឆ្នើមអាយុ ៣៣ ឆ្នាំគឺ លោកស្រី Debbie Wingham ដែលបានច្នៃរ៉ូបដ៏ថ្លៃបំផុតក្នុងពិភពលោកមានតម្លៃជិត ១៨ លានដុល្លារ។ រ៉ូបដ៏ប្រណីតនេះលម្អដោយពេជ្រខ្មៅ និងក្រហម។ សម្រាប់ការផលិតនំ Cake នេះវិញ លោកស្រីបានប្រើពេលជិត ៤៦ ថ្ងៃ ដោយតុបតែងនំតាមទិដ្ឋភាពនៃពិធីបង្ហាញម៉ូដសម្លៀកបំពាក់ ដែលមានអ្នកទស្សនាជាច្រើននៅអមសងខាងវេទិកា។ ក្នុងចំណោមអ្នកទស្សនាទាំងនោះ អ្នកខ្លះកាន់កាបូបប្រណីត ពាក់វែនតាខ្មៅ អ្នកខ្លះទៀតកាន់ទូរស័ព្ទដៃ និង Ipad ទំនើបៗជាដើម។នំ Cake ដ៏ថ្លៃនេះមានទម្ងន់ ៤៥០ គីឡូក្រោម វាប្រហាក់ប្រហែលនឹងទម្ងន់របស់សត្វខ្លាឃ្មុំនៅតំបន់ទឹកកកដែរ។ ក្រៅពីបង្កប់ដោយគ្រាប់ពេជ្រ នំនេះក៏មានលម្អដោយត្បូងកណ្តៀងពណ៌ស្វាយ និងត្បូងមរកតផងដែរ។
លោកស្រី Debbie បាននិយាយថា៖ « ខ្ញុំចូលចិត្តគម្រោងអស្ចារ្យបែបនេះណាស់ ហើយខ្ញុំចង់ផលិតនំពិសេសៗបែបនេះបន្តទៀត ដែលបង្កប់នូវសិល្បៈចំណីអាហារ »។ នំ Cake របស់លោកស្រីបានបំបែកឯតទគ្គកម្មនៃតម្លៃនំ Cake របស់លោក Tim Smith ដែលលក់ថ្លៃប្រមាណ ៥០ លានដុល្លារកាលពីឆ្នាំ ២០១៣ ៕
Tag:
ប្លែក
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
5 ថ្ងៃ
