ពីនេះ ពីនោះ
×![]()
ដោយ: ថ្មីៗ
នៅក្នុងសម័យកាលវិទ្យាសាស្ត្ររីកចម្រើន ភាពស្និតស្នាលនៅក្នុងគ្រួសារត្រូវបានកាត់ផ្ដាច់ ដោយវប្បធម៌រស់នៅថ្មី និងភាពអស្ចារ្យ នៃការផ្លាស់ប្ដូរបច្ចេកវិទ្យាទំនើប។ នៅពេលដែលគ្រួសារទាំងមូលត្រូវបានឃ្លាតឆ្ងាយ និងបាត់បង់ភាពស្និតស្នាល ដែលជាចំណុចស្នូលទៅរកសុភមង្គល និងភាពមិនស្ងប់សុខក្នុងចិត្ត អ្នកគ្រប់គ្នានឹងមានអារម្មណ៍ថាគ្មានទេសុភមង្គល។ ខាងក្រោមនេះ គឺជាវិធីងាយៗ ដើម្បីជួយផ្លាស់ប្ដូរសកម្មភាពប្រចាំថ្ងៃរបស់អ្នកឲ្យទទួលបានសុខសុភមង្គលនៅក្នុងគ្រួសារ៖
១/ បង្កើតអត្តសញ្ញាណគ្រួសាររបស់អ្នក៖ ការស្គាល់ពីគ្នា ជីវភាព ស្ថានភាពនៅក្នុងគ្រួសារ គឺជារឿងសំខាន់មួយ ដើម្បីបង្កើនការទទួលខុសត្រូវក្នុងគ្រួសារ។ សមាជិកគ្រួសារត្រូវតែដឹងថា បង្កើតគ្រួសារមកចង់ គ្រួសារក្លាយទៅជាគ្រួសារបែបណា? តើគ្រួសាររបស់អ្នកចូលចិត្តធ្វើ និងត្រូវធ្វើនៅថ្ងៃអនាគត?
២/ ធ្វើកិច្ចការជាមួយគ្នា៖ គ្រួសារដែលរីករាយ គឺអាស្រ័យលើការធ្វើការងារជាក្រុម។ ដូច្នេះ គ្រួសារនីមួយៗត្រូវចេះជួយកិច្ចការគ្នាទៅវិញទៅមក មិនត្រូវប្រកាន់ខ្លួនជាប្ដី ជាប្រពន្ធ ជាប្អូន ជាបង តែត្រូវគិតថា កិច្ចការនៅក្នុងគ្រួសារ គឺជាផ្នែកមួយដែលខ្លួនត្រូវតែចូលរួមធ្វើ។ គ្រប់សមាជិកទាំងអស់នៅក្នុងគ្រួសារ ត្រូវតែមានអារម្មណ៍ថា ខ្លួនមានទិសដៅចង់ឲ្យមានជីវិតគ្រួសារមួយនេះមានសុភមង្គល។
៣/ អប់រំចំណុចវិជ្ជមានដល់សមាជិកគ្រួសារ៖ តម្លៃសំខាន់បំផុត គឺសេចក្ដីស្រឡាញ់, បញ្ញា, វិន័យចំពោះខ្លួនឯង, សន្ដិភាពផ្លូវចិត្ត និងសុភមង្គល។ ត្រូវពន្យល់ណែនាំសមាជិកគ្រួសារពីអត្ថន័យ នៃសេចក្ដីស្រឡាញ់ ស្រឡាញ់ខ្លួនឯង ស្រឡាញ់គ្រួសារ និងស្រឡាញ់ពិភពលោកទាំងមូល ជាពិសេសកូនៗដែលទើបតែជាពន្លកថ្មី។
៤/ ត្រូវធ្វើឲ្យកូនៗរបស់អ្នកក្លាយជាអ្នកឈ្នះ៖ ត្រូវបង្ហាញពួកគេពីតម្លៃ នៃសេរីភាព ដើម្បីបង្កើតជម្រើស និងគិតពីខ្លួនរបស់គេ។ ត្រូវតែព្យាយាមបង្ហាញពីចំណុចល្អៗ ដើម្បីឲ្យកូនៗរបស់អ្នកបានសិក្សា ព្រោះវាមានឥទ្ធិពលខ្លាំងចំពោះសតិបញ្ញារបស់ក្មេង។
៥/ បង្កើតបរិយាកាសល្អ ដើម្បីបង្កើតភាពកកក្តៅក្នុងចិត្ត៖ សន្ដិភាពខាងក្នុងអារម្មណ៍ គឺមានសារៈសំខាន់ណាស់ចំពោះគ្រួសារទូទៅ។ ទាំងនេះ គឺអាចផ្ដើមចេញពីការញាំអាហារជុំគ្នា និយាយរឿងនិទាន អានសៀវភៅអប់រំចិត្ត ច្រៀងចម្រៀងជុំគ្នា និងហ្វឹកហាត់ធ្វើសមាធិចិត្ត និងគំនិត។ ធ្វើបែបនេះ ដើម្បីបង្កើនចំណងសាមគ្គី និងសេចក្ដីស្រឡាញ់គ្រួសារកាន់តែខ្លាំង។
៦/ បង្កើតវប្បធម៌ជជែកពិភាក្សា៖ មានគ្រួសារមួយចំនួនស្ទើរតែគ្មានទេ សកម្មភាពជជែកគ្នាជាលក្ខណៈបង្កើនភាពសប្បាយរីករាយក្នុងគ្រួសារ។ ដូច្នេះ នៅក្នុងគ្រួសារត្រូវតែមានការជជែកពិភាក្សាដោយគោលការណ៍ស្មោះត្រង់ សកម្មភាពវិជ្ជមាន និងបង្កើតភាពក្លាយហ៊ានក្នុងការបញ្ចេញគំនិត។ ការធ្វើបែបនេះ គឺជាវិភាគទានមួយក្នុងការបើកចំហរចិត្តទទួលយកការទូន្មានពីសមាជិកគ្រួសារ។
៧/ កាត់បន្ថយពាក្យសម្ដីមិនពិរោះស្ដាប់ឲ្យនៅតិចបំផុត៖ កំហឹង សម្ដីខឹងក្រោធរមែងតែងតែមាន តែដើម្បីឱ្យគ្រួសារមានសុខសុភមង្គល សមាជិកគ្រួសារចាំបាច់ត្រូវតែកាត់បន្ថយពាក្យពេជន៍ទាំងនោះឲ្យនៅមានតិចបំផុត។
៨/ គ្រប់គ្រងការប្រើប្រាស់ឧបករណ៍បច្ចេកវិទ្យា៖ កំព្យូទ័រ ទូរសព្ទទំនើប ទំនើបកម្មបណ្ដាញសង្គម ជាហេតុនាំឲ្យសកម្មភាពក្នុងគ្រួសារកាន់តែឃ្លាតឆ្ងាយពីគ្នា។ ហេតុនេះ អ្នកត្រូវកំណត់ពេលឲ្យបានច្បាស់សម្រាប់ការប្រើប្រាស់សម្ភារៈទាំងនេះ ដោយមើលទៅតាមកាលៈទេសៈ និងទីកន្លែងជាដើម។ ឧទាហរណ៍ មិនអាចពេលញាំអាហារក៏លេងហ្វេសប៊ុកដែរនោះឡើយ៕
© រក្សាសិទ្ធិដោយ thmeythmey.com
