កីឡាជាតិ
លោកអាជ្ញាកណ្ដាលកម្ពុជា ទុយ វិច្ឆិកា ទៅដឹកនាំការប្រកួតជម្រុះពានរង្វាន់ទ្វីបអាស៊ីនៅចិន
× លោក ទុយ វិច្ឆិកា អាជ្ញាកណ្ដាលបាល់ទាត់កម្រិតអន្តរជាតិ (FIFA) របស់កម្ពុជា ត្រូវធ្វើដំណើរចេញទៅដឹកនាំការប្រកួតក្នុងវគ្គជម្រុះពូល I នៃពានរង្វាន់បាល់ទាត់យុវជនក្រោមអាយុ១៦ឆ្នាំប្រចាំទ្វីបអាស៊ី AFC U-16 Championship 2016 ដែលរៀបចំនៅខេត្ត Yanji ប្រទេសចិន នៅពាក់កណ្ដាលខែកញ្ញា នេះ។
លោក ទុយ វិច្ឆិកា ទើបធ្វើដំណើរត្រឡប់មកពីប្រទេសកូរ៉េខាងត្បូង នោះទេ ក្នុងការងារធ្វើជាមន្ត្រីទី៤ ក្នុងប្រកួតរវាងម្ចាស់ផ្ទះកូរ៉េខាងត្បូង ជាមួយក្រុមឡាវ កាលពីថ្ងៃទី៣ ខែ កញ្ញា កន្លងទៅក្នុងវគ្គជម្រុះពូល G នៃពានរង្វាន់បាល់ទាត់ពិភពលោកប្រចាំទ្វីបអាស៊ី 2018 FIFA World Cup Russia។ កាលនោះអាជ្ញាកណ្ដាលលើទីលានក្នុងការប្រកួតគឺលោក Jumpei IIDA មកពីប្រទេសជប៉ុន ហើយជំនួយការអាជ្ញាកណ្ដាលគឺលោក Shinji OCHI និងលោក Hiroshi YAMAUCHI មកពីប្រទេសជប៉ុនដូចគ្នា។
សម្រាប់ វគ្គជម្រុះពូល I នៃវគ្គជម្រុះពានរង្វាន់ឈុតយុវជនប្រចាំទ្វីបអាស៊ី AFC U-16 Championship 2016 មានក្រុមចូលរួមចំនួន ៤ គឺ កូរ៉េខាងត្បូង ចិនតៃវ៉ាន់ ម៉ាកាវ និង ម្ចាស់ផ្ទះចិន។ ការប្រកួតចាប់ដំណើរការពីថ្ងៃទី ១៦ ដល់ ២០ ខែកញ្ញា ក្នុងកីឡដ្ឋាន Yanji People's Stadium ប្រទេសចិន។
លោក វិច្ឆកា មានវ័យ ៣៥ ឆ្នាំបានជាប់ឈ្មោះក្នុងបញ្ជីអាជ្ញាកណ្ដាលអន្តរជាតិ FIFA ប្រចាំនៅប្រទេសកម្ពុជា តាំងពីឆ្នាំ ២០១។ ក្រោយពេលជាប់ឈ្មោះជាអាជ្ញាកណ្ដាល FIFA លោកតែងតែចេញមុខទៅដឹកនាំការប្រកួតនៅក្រៅប្រទេសជាច្រើនទាំងក្នុងព្រឹត្តិការណ៍អន្តរជាតិប្រចាំតំបន់អាស៊ាន និង ទ្វីបអាស៊ីជាដើម។
សម្រាប់វគ្គជម្រុះនៃពានរង្វាន់ AFC U-16 Championship 2016 មានក្រុមចូលរួមចំនួន ៤៥ ប្រទេសនិងបែងចែកជា ១១ ពូលចាប់ផ្ដើមដំណើរការប្រកួតពីថ្ងៃទី២ រហូតដល់ថ្ងៃទី២០ ខែកញ្ញា ឆ្នាំ២០១៥ ដើម្បីស្វែងរកក្រុមខ្លាំងចំនួន ១៦ ឡើងទៅលេងជុំផ្ដាច់ព្រ័ត្រដែលរៀបចំនៅប្រទេសឥណ្ឌា ឆ្នាំ ២០១៦ ខាងមុខ៕
© រក្សាសិទ្ធិដោយ thmeythmey.com