ពីនេះ ពីនោះ
សម្រេចចិត្តត្រូវ គ្រឹះស្ថានអប់រំល្អ និស្សិតជោគជ័យការសិក្សា!
× អាជីវកម្មលើវិស័យអប់រំដោយខ្វះគុណភាពគឺ ជាគ្រោះថ្នាក់ធំសម្រាប់ប្រទេសជាតិមួយ។ កម្ពុជាពង្រឹងវិស័យអប់រំល្អ កែប្រែបទដ្ឋានវិន័យវិស័យអប់រំល្អ តែកម្ពុជានៅមានគ្រឹះស្ថានអប់រំឧត្ដមសិក្សាខ្វះគុណភាពជាច្រើន ដែលយុវជនត្រូវពិចារណាមុនឈានដល់ការសម្រេចចិត្តបន្តការសិក្សានៅគ្រឹះស្ថាននោះ។
នៅពេលមានការប្រលងបញ្ចប់មធ្យមសិក្សាទុតិយភូមិម្ដងៗគេតែងតែសង្គេតឃើញថាមានការចែកខិតប័ណ្ណផ្សព្វផ្សាយពីគ្រឹះស្ថានឧត្ដមសិក្សាជាច្រើននៅតាមមុខមណ្ឌលប្រឡងគ្រប់ទីកន្លែង មិនថាតែនៅក្នុងរាជធានីភ្នំពេញទេ នៅតាមបណ្ដាខេត្តក៏មានការចែកផ្សាយជូនដល់យុវសិស្សយ៉ាងសកម្មពីសំណាក់អ្នកទីផ្សារបស់ស្ថាប័នអប់រំទាំងនោះ។ ក្នុងរូបភាពផ្ដល់ជាអាហារូបករណ៍តាមនិទ្ទេស ផ្ដល់អាហារូបករណ៍និស្សិតក្រីក្រ ផ្ដល់វគ្គសិក្សាខ្លីៗដោយឥតគិតថ្លៃ ផ្ដល់ជូនវគ្គសិក្សាកំព្យូទ័រដោយឥតគិតថ្លៃ គ្រឹះស្ថានអាចជួយនិស្សិតក្នុងការស្វែងរកការងារធ្វើជាដើម។ មានសាលាឧត្ដមសិក្សាខ្លះ លទ្ធផលប្រលងរបស់សិស្សមិនទាន់ចេញលទ្ធផលផង មានអ្នកប្រាប់ដំណឹងថានិស្សិតនោះបានជាប់អាហារូបករណ៍ប៉ុណ្ណេះភាគរយ ប៉ុណ្ណោះភាគរយនៅក្នុងគ្រឹះស្ថានខ្លួន។
វាមិនមែនជារឿងអាក្រក់ទេប្រសិនបើគ្រឹះស្ថានឧត្ដមសិក្សាទាំងនោះអាចធ្វើបាន តែកន្លងទៅនិស្សិតដែលមកពីបណ្ដារខេត្តតែងតែទទួលរងផលអវិជ្ជមានពីគ្រឹះស្ថានទាំងនោះ ព្រោះមានគ្រឹះស្ថានឧត្ដមសិក្សាខ្លះមិនបានបំពេញតាមអ្វីដែលខ្លួនបានផ្សព្វផ្សាយជូនសិស្ស ហើយប្រើគ្រប់វិធីសាស្ត្រធ្វើយ៉ាងណាឲ្យសិស្សនិស្សិតចំណាយលុយលើស្ថាប័នខ្លួន ខ្លះទៀតបើកបានមួយឆ្នាំត្រូវបិទទ្វារ ខ្លះរចនាសម្ព័ន្ធគ្រប់គ្រងមិនច្បាស់លាស់ កម្មវិធីអប់រំគ្មានគុណភាព គ្រូឧទ្ទេសនាមខ្វះសមត្ថភាពពេលខ្លះជ្រើសរើសគ្រូជានិស្សិតដូចគ្នាមកបង្រៀនព្រោះតម្លៃជួលគ្រូទាប តម្លៃឯកសារថ្លៃ ខ្លះថាឲ្យអាហារូបករណ៍តែបែរជានិស្សិតបង់លុយពេញថ្លៃ រដ្ឋបាលក្នុងស្ថាប័នដើរយឺតក្នុងការផ្ដល់សេវាជូននិស្សិតជាដើម ទីបំផុតនិស្សិតបង្ខំចិត្តចាក់ចេញពីគ្រឹះស្ថានទាំងកណ្ដាលទី ហើយត្រូវខាតបង់ថវិការច្រើនតែមិនទទួលបានលទ្ធផលសម្រាប់ខ្លួន។
ហេតុនេះសម្រាប់យុវជនដែលទើបបញ្ចប់ការសិក្សាថ្នាក់ទី១២ ដែលគ្រោងបោះជំហានជីវិតលើវិស័យអប់រំថ្នាក់ឧត្ដមសិក្សាត្រូវតែមានការប្រុងប្រយ័ត្ន និងស្វែងរកការប្រឹក្សាយោបល់ឲ្យបានច្រើនមុននឹងធ្វើការសម្រេចចិត្តជ្រើសរើសយកស្ថាប័នណាមួយដើម្បីសិក្សា។ មានលក្ខណះវិនិច្ឆ័យចំនួន៣ដែលសិស្សនិស្សិតទាំងនោះត្រូវពិចារណាក្នុងការជ្រើសរើសស្ថាប័នឧត្ដមសិក្សានោះ៖ ទីមួយ អាយុកាលរបស់ស្ថាប័ន មានន័យថាបើសិនជាស្ថាប័នមួយល្អ ហើយរឹងមាំគឺអាចឈរជើងបានយូរ ទី២ ចំនួននិស្សិតដែលកំពុងសិក្សានៅក្នុងស្ថាប័ននោះ ព្រោះកាលណាស្ថាប័នណាមួយល្អ ច្បាស់ណាគឺប្រាកដជាមាននិស្សិតរៀនច្រើន ទី៣ ស្តង់ដាររបស់ស្ថាប័ន ទាំងកម្មវិធីសិក្សា សមត្ថភាពគ្រូឧទ្ទេសនាម ទីតាំងអគារ បរិស្ថានសាលា សន្តិសុខអប់រំ បណ្ណាល័យឯកសារ និងកេរ្តិ៍ឈ្មោះរបស់សាលា ជាចំនុចសំខាន់សម្រាប់សិស្សនិស្សិត ព្រោះគ្រឹះស្ថានអប់រំមួយដែលមិនមានស្ដង់ដាទទួលស្គាល់ដោយក្រសួងស្ថាប័ន ឬថ្នាក់ជាតិថ្នាក់តំបន់ គឺជាបញ្ហាប្រឈមខ្ពស់ចំពោះជោគវាសនារបស់និស្សិត។ ស្របពេលក្រសួងធ្វើកំណែរទម្រង់ប្រព័ន្ធអប់រំ គ្រឹះស្ថានអប់រំកាន់តែធំ កាន់តែល្បី គឺកាន់តែធានាបាននៅគុណភាពជូនសិស្សនិស្សិត។
© រក្សាសិទ្ធិដោយ thmeythmey.com