កីឡាជាតិ
×![]()
សប្ដាហ៍ទី ១៦ នៃពានរង្វាន់បាល់ទាត់មិត្តហ្វូនខេបូឌានលីក២០១៥ (Metfone Cambodian League នឹងបន្តប្រកួតនៅថ្ងៃព្រហស្បតិ៍ ទី ១៧ ខែ កញ្ញា នេះដោយក្រុមណាហ្គាវើល ជួបវេស្ទើន និងក្រុមស្វាយរៀងអែហ្វស៊ី ប៉ះអគ្គស្នងការដ្ឋាននគរបាលជាតិ (ប៉ូលិស) នៅពហុកីឡដ្ឋានស្របពេលបឹងកេតជួបបៀលប្រាយនៅស្ដាតចាស់។
*ជើងទី២ នេះតើវេស្ទើនអាចយកឈ្នះណាហ្គាវើល បានម្ដងទៀតទេ?
ណាហ្គាវើល ក្រោមការដឹកនាំរបស់លោក មាស ចាន់ណា ទើបតែប្រកួតស្មើគ្នាជាមួយក្រុមចំណូលថ្មីស៊ីម៉ាក់ ១ ទល់ ១ កាលពីចុងសប្ដាហ៍កន្លងទៅ។ ឆ្លងកាត់១៥ប្រកួតមកនេះណាហ្គាវើល ឈរចំណាត់ថ្នាក់លេខ៤ បណ្ដោះអាសន្នក្នុងនោះឈ្នះ ៨ លើកស្មើ ១ និងចាញ់ ៦ លើកមាន ២៥ ពិន្ទុ។ចំណែកវេស្ទើន វិញកំពុងតែត្រូវពិន្ទុគេចផុតពីតំបន់បាតតារាង ក្រោយប្រកួត១៥លើកឈ្នះ ៣ ស្មើ ១ និង ចាញ់ ១១ មាន ១០ ពិន្ទុឈរនៅចំណាត់ថ្នាក់លេខ ១១ ។
គេនៅចាំបានថាកាលពីជើងទី១ ក្រុមវេស្ទើន បានយកឈ្នះណាហ្គាវើល ១ ទល់ ០ លើទីលានស្មៅសប្បនិមិត្តរបស់ខ្លួន ដោយថ្វីជើងកីឡាករជនជាតិនីហ្សេរីយ៉ា Tijani Mohamed នៅក្នុងម៉ោងបន្ថែម ៩០+៤ ចុងតង់ទី២ ។ ចំណែកការប្រកួតនៅល្ងាចនេះនឹងចាប់ផ្ដើមនៅវេលាម៉ោង ៣:៣០ នាទីរសៀល លើទីលានពហុកីឡដ្ឋានជាតិ។
*កាលពីជើងទី១ បឹងកេត ឈ្នះបៀលប្រាយ ១ ទល់ ០ ។ ចុះជើងទី២ ល្ងាចនេះវិញ?
ក្រុមបឹងកេតអង្គរ ត្រូវប្រកួតជាមួយក្រុមបៀលប្រាយយូណាយធិត នៅវេលាម៉ោង ៣:៣០ នាទីលើទីលានកីឡដ្ឋានកងយោធពលខេមរភូមិន្ទ (ស្ដាតចាស់)។ បឹងកេត កំពុងឈរចំណាត់ថ្នាក់លេខ ២ បណ្ដោះអាសន្នតែនៅសល់២ប្រកួតក្នុងដៃ។ លោក ប្រាក់ សុវណ្ណារ៉ា បានដឹកនាំក្រុមមកពីខេត្តកំពង់ចាមមួយនេះមិនទាន់ស្គាល់ពាក្យថាបរាជ័យនៅឡើយនោះទេ។ ចំណែកបៀលប្រាយ វិញឈរចំណាត់ថ្នាក់លេខ ៨ បណ្ដោះអាសន្នមាន ១៧ ពិន្ទុក្នុងដៃ។
កាលពីជើងទី១ កីឡាករមកពីទ្វីបអាហ្វ្រិច Yemi Joseph រកគ្រាប់បាល់ជ័យជម្នះឱ្យបឹងកេតអង្គរ ក្នុង នាទី ២៧ លើក្រុមបៀលប្រាយយូណាធីត ខណៈការប្រកួតធ្វើឡើងនៅស្ដាតចាស់ដូចគ្នា។
*ស្វាយរៀង និង ប៉ូលិស ដណ្ដើមចំណាត់ថ្នាក់គ្នា
ត្រឹមសប្ដាហ៍ទី ១៥ នេះក្រុមស្វាយរៀងអែហ្វស៊ី និងក្រុមអគ្គស្នងការដ្ឋាននគរបាលជាតិ កំពុងតែមានពិន្ទុ ២៤ ស្មើគ្នាតែពេលគិតរូបមន្ត Head to Head ទៅស្វាយរៀង ត្រូវខាងលើអគ្គស្នង ការដ្ឋាននគរបាលជាតិ ព្រោះកាលពីជើងទី១ ស្វាយរៀង ឈ្នះ ២ ទល់ ០ លើអគ្គស្នងការដ្ឋាននគរបាលជាតិ។ ២ គ្រាប់របស់ស្វាយរៀង កាលពីជើងទី១ រកបានដោយកីឡាករ ផានី អ៊ីរដ្ឋា និង កីឡាករជនជាតិនីហ្សេរីយ៉ា Dzarma Bata។
ចំណែកការប្រកួតរវាងក្រុមស្វាយរៀងអែហ្វស៊ី និងក្រុមអគ្គស្នងការដ្ឋាននគរបាលជាតិ នៅល្ងាចនេះវិញនឹងធ្វើឡើងនៅវេលាម៉ោង ៦ ល្ងាច លើទីលានពហុកីឡដ្ឋានជាតិ។ ការប្រកួតនេះក៏មានផ្សាយផ្ទាល់នៅប៉ុស្ដិ៍ BTV ផងដែរ។
សម្រាប់លទ្ធផលប្រកួតសប្ដាហ៍ទី ១៦ ដូចគ្នាកាលពីម្សិលមិញមាន៖
-ក្រសួងការពារជាតិ ៣-០ ភ្នំពេញក្រោន
-ខេមបូឌានថាយហ្គឺរ ៣-១ គីរីវង់សុខសែនជ័យ
-ស៊ីម៉ាក់ ១-៣ អាស៊ីអឺរ៉ុប
Tag:
MCL2015
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
4 ថ្ងៃ
