ក្រុមកំពូលតារាងក្នុងពានរង្វាន់មិត្តហ្វូនខេមបូឌានលីក២០១៥ (Metfone Cambodian League 2015) ចំនួន២ គឺភ្នំពេញក្រោន និង បឹងកេងអង្គរ សុទ្ធតែជួបបរាជ័យជាលើកដំបូងក្រោយឆ្លងកាត់ ចន្លោះ ១៥ និង ១៦ ប្រកួតមកនេះ។ ប៉ុន្តែបរាជ័យមិនបានធ្វើឱ្យក្រុមទាំង២ ដាច់ពិន្ទុឆ្ងាយពីគ្នាប៉ុន្មាននោះទេ។
ក្រោយបរាជ័យក្រោមថ្វីជើងក្រុមក្រសួងការពារជាតិ ៣ ទល់ ០ កាលពីថ្ងៃពុធ លោកគ្រូបង្វឹក Sam Schweingruber បាននិយាយប្រាប់អ្នកគាំទ្រតាមរយៈទំព័រហ្វេសប៊ុកផ្លូវការរបស់ក្លិបថា៖« ខ្ញុំពិតជាសូមអភ័យទោសដល់អ្នកគាំទ្ររបស់ក្លិបទាំងអស់ដែលបានចំណាយពេល និងថវិកាតាមដានគាំទ្រក្នុងការប្រកួត។ យើងនឹងចំណាយពេលដើម្បីពិនិត្យមើលកំហុស ព្រមទាំងរកមូលហេតុថាហេតុអ្វីបានជាកីឡាករទាំងអស់លេងមិនបានល្អ»។
លោកគ្រូបង្វឹកជនជាតិស្វីសរូបនេះបន្ថែមថា នេះជាការប្រកួតមួយដែលអាចចាត់ទុកថាមិនល្អសម្រាប់ក្រុមភ្នំពេញក្រោន នៅរដូវកាលនេះ ហើយ កីឡាករជាច្រើនលេងមិនសូវបានល្អ។ លោកនឹងព្យាយាមកែសម្រួលរបៀបនៃការលេង និង ពិនិត្យកីឡាករជម្រើស ១១ នាក់ដំបូងឡើងវិញ ហើយសង្ឃឹមនឹងអាចលេងបានល្អជាងនេះនៅប្រកួតបន្ទាប់។
សម្រាប់លទ្ធផលប្រកួត ៣ គូចុងក្រោយនៅថ្ងៃព្រហស្បតិ៍ ទី ១៧ ខែកញ្ញា ឆ្នាំ ២០១៥ ម្សិលមិញនេះក្រុមបឹងកេតអង្គរ បានប្រកួតចាញ់ក្រុមបៀលប្រាយយូណាយធីត ៣ ទល់ ២ លើទីលានកីឡដ្ឋានស្ដាតចាស់។ កីឡាករ Joseph, រ៉ឹង ប៊ុនហៀង និងកីឡាករ Momoh ជាអ្នករកគ្រាប់បាល់ជ័យជម្នះ ឱ្យឱ្យបៀលប្រាយម្នាក់១ គ្រាប់ ។ ២ គ្រាប់របស់បឹងកេតអង្គរ រកបានដោយកីឡាករប្រធានក្រុម ឃួន ឡាបូរ៉ាវី នៅនាទី ៥២ ហើយខ្សែការពារ សុខ សុវណ្ណ រកគ្រាប់ចុងក្រោយនៅនាទី ៧។
ជុំវិញបរាជ័យលើកដំបូងដូចគ្នានេះដែរលោក បែ មករា អ្នកចាត់ការទូទៅក្រុមបឹងកេតអង្គរ បានសរសេរនៅលើគណនីហ្វេសប៊ុកផ្ទាល់ខ្លួនថា៖ «សុំទោសអ្នកគាំទ្រទាំងអស់ ថ្ងៃនេះពួកយើងធ្វើមិនបានល្អ ពួកយើងបានព្យាយាមហើយ ! សូមអរគុណ អ្នកទាំងអស់គ្នាដែលតែងតែគាំទ្រក្លិបបឹងកេត ។ ពួកយើងសន្យាថានឹងប្រឹងប្រែងបន្តទៀតដើម្បីអ្នកគាំទ្រជាទីស្រលាញ់របស់ពួកយើង»។
ម្សិលនេះដែរក្រុមណាហ្គាវើល បានយកឈ្នះក្រុមវេស្ទើនភ្នំពេញ ដោយលទ្ធផល ៨ ទល់ ២ លើទីលានពហុកីឡដ្ឋានជាតិ។ ៨គ្រាប់របស់ណាហ្គាវើលរកបាន ដោយកីឡាករ Alpha Oumar Lelouma Barry ៤គ្រាប់ម្នាក់ឯង កីឡាករ ឈឹម សំបូរ រកបាន២គ្រាប់ម្នាក់ឯង ហើយប្រធានក្រុម ស៊ុន សុវណ្ណរិទ្ធី និង ទៀង ទីនី រកបានម្នាក់ ១គ្រាប់។ ចំណែកក្រុមវេស្ទើន វិញវាយបកបាន ២ គ្រាប់ ដោយ មី ហុង និង នុត ស៊ីនួន។
ប្រកួតចុងក្រោយក្រុមស្វាយរៀងអេហ្វស៊ី បានប្រកួតស្មើគ្នា ១ ទល់ ១ ជាមួយក្រុមអគ្គស្នងការដ្ឋាននគរបាលជាតិ លើទីលានពហុកីឡដ្ឋានជាតិ ដូចគ្នា។ កីឡាករ ប្រាក់ មុន្នីឧត្តម បានរកគ្រាប់បាល់នាំមុខឱ្យក្រុមស្វាយរៀងអែហ្វស៊ី នៅនាទី ៣២ ប៉ុន្ដែខ្សែប្រយុទ្ធរបស់ក្រុមអគ្គស្នងការដ្ឋាននគរបាលជាតិ នួន បុរី បានរកគ្រាប់បាល់តាមស្មើនៅនាទី ៣។
សរុបតារាងចំណាត់ថ្នាក់បណ្ដោះអាសន្ន ប្រចាំប្រកួតទី ១៦ នៃពានរង្វាន់ MCL 2015 ក្រុមភ្នំពេញក្រោន ឈរកំពូលតារាងមាន ៣៩ ពិន្ទុ តាមពីក្រោយដោយក្រុមភ្នំពេញក្រោន មាន៣៨ ពិន្ទុតែសល់១ប្រកួតក្នុងដៃ។ លេខ ៣ ក្រុមខេមបូឌានថាយហ្គឺរ ហើយលេខ៤ ក្រុមណាហ្គាវើល។ ស្វាយរៀង លេខ៥ មាន ២៥ ពិន្ទុស្មើគ្នាជាមួយក្រុមលេខ ៦ អគ្គស្នងការដ្ឋាននគរបាលជាតិ ហើយលេខ៧ គឺក្រុមក្រសួងការពារជាតិ មាន២៣ ពិន្ទុ ហើយក្រុមបៀលប្រាយ នៅលេខ៨ មាន ២០ ពិន្ទុ ហើយក្រុមលេខ៩ អាស៊ីអឺរ៉ុប មាន១៤ពិន្ទុ និងក្រុមលេខ ១០ ស៊ីម៉ាក់ មាន ១១ ពិន្ទុ។ ចំពោះ២ក្រុមដែលនៅតំបន់គ្រោះថ្នាក់បាតតារាងមាន វេស្ទើនភ្នំពេញ ឈរលេខ ១១ មាន ១០ ពិន្ទុ ហើយក្រុមគីរីវង់សុខសែនជ័យ ចំណាត់ថ្នាក់លេខ ១២ មាន ៥ ពិន្ទុប៉ុណ្ណោះ៕