កីឡាជាតិ
ជាតិ
កម្ពុជាចូលរួមការប្រកួតដណ្តើមជើងឯកចំបាប់បែបបុរាណរបស់កូរ៉េនៅមីយ៉ាន់ម៉ា
×
អត្តពលិកចំបាប់កម្ពុជា៨រូប កំពុងត្រៀមខ្លួនសម្រាប់ប្រកួតដណ្តើមជើងឯកក្នុងព្រឹត្តិការណ៍ Asian Ssireum Championship លើកទី១ និង World Ssireum Championship លើកទី៥នៅកីឡដ្ឋាន Thuwunna National Indoor Stadium ក្នុងទីក្រុងយ៉ាំងហ្គោន ប្រទេសមីយ៉ាន់ម៉ា ចាប់ពីថ្ងៃអាទិត្យខាងមុខ។
អ្នកលេងចំបាប់កម្ពុជា ដែលមានកីឡាករ៦រូប និងកីឡាការិនី២រូប រួមទាំងប្រតិភូ បានចេញដំណើរទៅកាន់ទីក្រុងយ៉ាំងហ្គោន ប្រទេសមីយ៉ាន់ម៉ា កាលពីព្រឹកថ្ងៃសុក្រនេះ ដើម្បីចូលរួមប្រកួតក្នុងព្រឹត្តិការណ៍ Asian Ssireum Championship លើកទី១ និង World Ssireum Championship លើកទី៥នៅកីឡដ្ឋាន Thuwunna National Indoor Stadium នារយៈពេល៣ថ្ងៃ ដោយចាប់ផ្តើមពីថ្ងៃអាទិត្យខាងមុខនេះ។
Ssireum គឺជាប្រភេទកីឡាចំបាប់បែបបុរាណរបស់កូរ៉េ ដោយការប្រកួតធ្វើឡើងនៅខ្សាច់ ហើយកីឡាករ-កីឡាការិនី ត្រូវបានតម្រូវឲ្យចងក្រណាត់ភ្ជាប់ពីចង្កេះទៅភ្លៅខាងស្តាំ។ អ្នកដែលធ្វើឲ្យគូប្រកួតដួលផ្ញារក្រោយ ឬ លុតជង្គង់២ដង ជាអ្នកទទួលជ័យជម្នះ។
លោក Yang Sung Mo ប្រធានសមាគមកូរ៉េខាងត្បូងប្រចាំកម្ពុជា និង ជាគ្រូបង្វឹកកីឡា Ssireum ផងនោះបានប្រាប់អ្នកសារព័ត៌មានក្នុងពេលជូនដំណើរកីឡាករឡើងយន្តហោះថា កីឡាប្រភេទនេះជាកីឡាប្រពៃណីរបស់ជនជាតិកូរ៉េដែលមានប្រវត្តិជាង ៥.០០០ឆ្នាំមកហើយ ។
លោក ធិន វិចិត្រ អគ្គលេខាធិការសហព័ន្ធកីឡាចំបាប់កម្ពុជា បានថ្លែងប្រាប់សារព័ត៌មានថ្មីៗនៅមុនពេលចេញដំណើរទៅកាន់ទីក្រុងយ៉ាំងហ្គោនថា នេះជាឱកាសបង្ហាញខ្លួនជាលើកដំបូងរបស់កម្ពុជាក្នុងព្រឹត្តិការណ៍ចំបាប់បែបបុរាណរបស់កូរ៉េ។
សម្រាប់ព្រឹត្តិការណ៍ប្រកួតកម្រិតពិភពលោក World Ssrieum Championship លើកទី៥ នឹងមានអត្តពលិកមកពីប្រមាណ២០ប្រទេស ខណៈការប្រកួតកម្រិតអាស៊ីជាលើកដំបូង មានអត្តពលិកមកពីប្រទេសកម្ពុជា វៀតណាម ម៉ាឡេស៊ី ឥណ្ឌូនេស៊ី ឡាវ រួមទាំងម្ចាស់ផ្ទះមីយ៉ាន់ម៉ា។
ក្នុងចំណោមអត្តពលិកទាំង៨រូប កីឡាករ ឌន សៅ នឹងប្រកួតក្នុងទម្ងន់ក្រោម៩០គីឡូក្រាម កីឡាករ ងួន មករា ប្រកួតទម្ងន់៧៥គីឡូក្រាម ម៉ុល រស្មី ទម្ងន់៦០គីឡូក្រាម ឆាំ ពិស៊ិន និងជុន ធួន ទម្ងន់ក្រោម៧០គីឡូក្រាម រស់ ផល្លី ក្រោម៦០គីឡូក្រាម ហើយកីឡាការិនីពីរូបទៀត គឺ ជ័យ ច័ន្ទរស្មី និង នី សំណាង ប្រកួតក្នុងទម្ងន់៥១ និង៥៥គីឡូក្រាម។
លោក ធិន វិចិត្រ បន្ថែមថា ខាងភាគីកូរ៉េខាងត្បូងជាអ្នករៀបចំ ហើយក៏ជាអ្នករ៉ាប់រងសម្រាប់ការចេញទៅប្រកួតរបស់ក្រុមកម្ពុជា។ ថ្មីៗនេះខាងកូរ៉េត្បូង បានបញ្ជូនគ្រូបង្វឹកម្នាក់មកបង្ហាត់ដល់អត្តពលិករបស់កម្ពុជាបានប្រមាណជា ១០ ថ្ងៃដែរ ដើម្បីឲ្យបានដឹងពីរបៀបប្រកួត។ លោករំពឹងថាការចូលរួមជាលើកដំបូងនេះ អាចឱ្យកម្ពុជារៀនសូត្រពីគេបន្ថែម ដើម្បីយកបទពិសោធរៀបចំដ៏ល្អនោះមករៀបចំការប្រកួតចំបាប់បុរាណខ្មែររបស់យើងវិញម្ដង។
គួរបញ្ជាក់ថា សហព័ន្ធកីឡាចំបាប់កម្ពុជារៀបចំជារៀងរាល់ឆ្នាំនាពិធីបុណ្យភ្ជំបិណ្ឌនូវការប្រកួតចំបាប់បុរាណរបស់ខ្លួន។ លោក ធិន វិចិត្រ មិនហ៊ានដាក់ក្តីរំពឹងខ្ពស់នោះឡើយសម្រាប់ការបង្ហាញខ្លួនជាលើកដំបូងរបស់កម្ពុជាក្នុងការប្រកួតកីឡាចំបាប់បែបបុរាណរបស់កូរ៉េ ប៉ុន្តែអគ្គលេខាធិការរូបនេះ លើកឡើងថា នេះជាឱកាសដែលកម្ពុជាត្រូវដកស្រង់បទពិសោធន៍ និងស្វែងយល់ពីការរៀបចំប្រកួតចំបាប់បែបបុរាណដើម្បីធ្វើឲ្យមានការភាពល្អប្រសើរសម្រាប់ការរៀបចំនាពេលខាងមុខសម្រាប់ការប្រកួតចំបាប់ខ្មែរបុរាណ៕
© រក្សាសិទ្ធិដោយ thmeythmey.com