អន្តរជាតិ
ដៅចំណុចមូលខ្មៅមួយលើបាតដៃគឺជាសញ្ញាសុំជំនួយស្ងាត់ៗពីជនរងគ្រោះក្នុងអំពើហិង្សាក្នុងគ្រួសារ
×![]()
ដោយ: ធីតា
ស្ត្រីម្នាក់ក្នុងចំណោមស្ត្រីបួននាក់នៅសហរដ្ឋអាមេរិក សុទ្ធតែធ្លាប់ទទួលរងនូវអំពើហិង្សាពីសំណាក់ដៃគូដ៏ស្និទ្ធស្នាលរបស់ខ្លួន ខណៈដែលការសុំជំនួយគឺជារឿងប្រថុយនឹងគ្រោះថ្នាក់បំផុត។ នេះគឺជាគោលបំណងនៃយុទ្ធនាការ Black dot ដែលត្រូវបានបង្កើតឡើងនៅលើបណ្តាញសង្គម Facebook ។ យុទ្ធនាការនេះមានគោលដៅជំរុញឲ្យជនរងគ្រោះដោយសារអំពើហិង្សាក្នុងគ្រួសារ មិនថាជាបុរស ឬស្ត្រី ដៅសញ្ញាមូលពណ៌ខ្មៅមួយលើបាតដៃ ដើម្បីសុំជំនួយដោយស្ងាត់។
នៅពេលឃើញសញ្ញានេះ មិត្តភក្តិ បងប្អូន គ្រូពេទ្យ ឬក៏បុគ្គលិកនៃសេវាសង្គមណាមួយដែលជនរងគ្រោះទុកចិត្ត អាចសម្គាល់ដឹងភ្លាមថា អ្នកនោះកំពុងតែទទួលរងនូវអំពើហិង្សាក្នុងគ្រួសារ និងចង់ស្វែងរកជំនួយ។ យុទ្ធនាការនេះត្រូវបានបង្កើតឡើងមិនផ្លូវការដោយអតីតស្ត្រីរងគ្រោះក្នុងអំពើហិង្សាក្នុងគ្រួសារម្នាក់។ បើទោះបីជាសម្រាប់ពេលនេះ យុទ្ធនាការនេះមិនទាន់ទទួលបានការគាំទ្រ និងជំនួយជាផ្លូវការ តែគំនិតផ្តួចផ្តើមនេះមានអ្នកគាំទ្រលើបណ្តាញសង្គមដែលទើបតែបង្កើតឡើងក្នុងខែកញ្ញានេះ រហូតដល់ ៤,៨ លាននាក់។
ទន្ទឹមនឹងមានអ្នកគាំទ្រ ក៏មានអ្នករិះគន់ផងដែរ។ មនុស្សមួយចំនួនយល់ថា សញ្ញានេះហាក់ដូចជាស្រពេចស្រពិលពេក ហើយវាងាយនឹងច្រឡំជាមួយប្រជ្រុយធម្មជាតិទៀតផង។ អ្នកខ្លះទៀតពន្យល់ថា បើសិនជាប្តីដឹងពីអត្ថន័យនៃសញ្ញាលើបាតដៃរបស់ប្រពន្ធ បុរសនោះនឹងវ៉ៃប្រពន្ធជាការតបស្នងនឹងទង្វើសុំជំនួយនេះមិនខាន។ ឯអ្នកខ្លះទៀតងឿងឆ្ងល់ថា បើសមត្ថកិច្ចជំនាញមិនបានទទួលការអប់រំពាក់ព័ន្ធនឹងអត្ថន័យនៃសញ្ញាមូលពណ៌ខ្មៅនេះផង អ្នកទាំងនោះធ្វើម៉េចនឹងយល់អត្ថន័យទៅ។
ស្ថាបនិកនៃយុទ្ធនាការនេះដែលត្រូវបានសម្ភាសដោយគេហទំព័រ Huffington Post បានបកស្រាយថា ប្រាកដណាស់ នេះមិនមែនជាដំណោះស្រាយដ៏ល្អសម្រាប់ជនរងគ្រោះគ្រប់រូបទេ។ ប៉ុន្តែ គំនិតនៃការសុំជំនួយដោយស្ងាត់ៗនេះបានជួយស្ត្រី ៤៩ នាក់ឲ្យគេចផុតពីទំនាក់ទំនងដែលពោរពេញដោយអំពើហិង្សានេះរួចមកហើយ នេះបើតាមបណ្តាញព័ត៌មាន New Zealand Herald ៕
© រក្សាសិទ្ធិដោយ thmeythmey.com
