កីឡាជាតិ
ជាតិ
GMAC៖ និយោជកមិនទាន់កំណត់ប្រាក់ឈ្នួលអប្បរមាកម្មករ សម្រាប់ឆ្នាំ២០១៦
× ភ្នំពេញ៖ អនុប្រធានសហព័ន្ធនិយោជក និងសមាគមពាណិជ្ជកម្មកម្ពុជា (CAMFEBA) លោកស្រី សាន់ដ្រា ដាមីកូ បានបញ្ជាក់ពីជំហររបស់និយោជកលើប្រាក់ឈ្នួលអប្បបរមាក្នុងវិស័យកាត់ដេរ និងផលិតស្បែកជើងសម្រាប់ឆ្នាំ២០១៦ នាសន្និសីទកាសែតនៅថ្ងៃទី២២ ខែកញ្ញានេះថា និយោជិកមិនអាចត្រូវបានដំឡើងប្រាក់ឈ្នួលអប្បរមា លើសពីអត្រាអតិផរណា ដែលមានកម្រិតទាប ជាង ៣ភាគរយនោះទេ។
និយោជកមកពីវិស័យឧស្សាហកម្មវាយនភ័ណ្ឌ កាត់ដេរសំលៀកបំពាក់ និងផលិតស្បែកជើង ក្នុងប្រទេសកម្ពុជា បញ្ជាក់ពីគោលជំហររបស់ពួកគេ ទៅលើប្រាក់ឈ្នួលអប្បរមា នាសន្និសីទសារព័ត៌មាន រៀបចំដោយសហព័ន្ធនិយោជក និងសមាគមពាណិជ្ជកម្មកម្ពុជា (CAMFEBA) នៅថ្ងៃទី២២ ខែកញ្ញា ឆ្នាំ២០១។
លោកស្រី សាន់ដ្រា ដាមីកូ ថា កម្ពុជានៅមានផលិតភាពការងារ និងតម្លៃផលិតបន្ថែមទាប បើប្រៀបធៀបជាមួយប្រទេសដៃគូប្រគួតប្រជែងមួយចំនួនក្នុងវិស័យកាត់ដេរដូចគ្នា។ ហើយថា សព្វថ្ងៃនេះ ប្រាក់ឈ្នួលអប្បរមារបស់កម្មករកម្ពុជា មានចំនួនច្រើនរួចស្រេចទៅ បើប្រៀបធៀបជាមួយប្រទេសដែលមានការប្រកួតប្រជែង ដូចជា ប្រទេសបង់ក្លាដេសមានប្រាក់ឈ្នួលគោលតែ ៦៨ដុល្លារ ស្រីលង្កា៦៦ដុល្លារ និងផ្នែកខ្លះទៀតរបស់ប្រទេសវៀតណាម និងឥណ្ឌូណេស៊ី។
ក្រៅពីនេះ លោកស្រី សាន់ដ្រា ដាមីកូ ក៏លើកយកពីថ្ងៃសម្រាការងារនៅកម្ពុជាថា ជាប្រទេសមួយដែលមានថ្ងៃឈប់សម្រាកច្រើនជាង បណ្តាប្រទេសដៃគូប្រកូតប្រជែងដទៃទៀតផងដែរ។ «កម្ពុជាមានថ្ងៃឈប់សម្រាកថ្ងៃបុណ្យលើសប្រទេសដៃគូប្រ កួតប្រជែងពីជាង ៧០ភាគរយ ទៅ ២៤០ភាគរយ។ ចំណែកថ្ងៃឈប់សម្រាកប្រចាំឆ្នាំ កម្ពុជាមានពី៥០ភាគរយទៅ២៦០ភាគរយលើសប្រទេសដៃគូប្រ កួតប្រជែងផ្សេងទៀត»។ នេះជាការបញ្ជាក់របស់លោកស្រី ដាមីកូ។
ជាមួយគ្នានេះ លោកស្រីស្នើឲ្យរដ្ឋាភិបាល រដ្ឋាភិបាលត្រូវបន្តពិនិត្យលើឥទ្ធិពលនៃច្បាប់ស្តីពី ការជួលផ្ទះ ហើយត្រូវតែវិនិយោគ ហេដ្ឋានរចនាសម្ព័ន្ធសង្គមនានា ដើម្បីគាំទ្រដល់កម្មករនិយោជិត និងបរិយាកាសកន្លែងរស់ នៅជុំវិញរោងចក្រកាត់ដេរ សំលៀកបំពាក់ និងស្បែកជើង។ មួយវិញទៀត លោកស្រីថា ផលិតភាព និងការអភិវឌ្ឍន៍ជំនាញវិជ្ជាជីវៈ គឺជាតម្រូវការ ចាំបាច់បំផុតផងដែរ ដូច្នេះរដ្ឋាភិបាលគួរលើកទឹកចិត្តឲ្យមានការរៀនជំនាញបន្ថែមទៀត។
កញ្ញា សាន់ដ្រា ថា៖«អ្វីដែលនិយោជកត្រូវការ គឺ ១ ធានាថា ឧស្សាហកម្មវាយនភ័ណ្ឌ កាត់ដេរសំលៀកបំពាក់ និងផលិតស្បែកជើង រក្សាបាននូវឧត្តមភាពប្រកួតប្រជែង ២គឺ ធានាឲ្យមានការបង្កើតនូវឱកាសការងារ ទី៣,មានពេលវេលាគ្រប់គ្រាន់ក្នុងការធ្វើពិពិធកម្ម សេដ្ឋកិច្ច និងវិស័យឧស្សាហកម្មវាយនភ័ណ្ឌ កាត់ដេរសំលៀបំពាក់ និងផលិតស្បែកជើង ៤ ត្រូវផ្តោតលើផលិតភាព និងការអភិវឌ្ឍន៍ជំនាញ ៥ ត្រូវធានាថា សហជីពមានភាពរួបរួម និងមានភាពជាតំណាង ដើម្បីឲ្យការអនុវត្តអនុសញ្ញារួមមាន ប្រសិទ្ធភាពសម្រាប់សុខដុម និងការអភិវឌ្ឍនឲនៅព្រះរាជាណាចក្រកម្ពុជា»។
វិស័យកាត់ដេរនៅតែជាប្រភពដ៏ចំបងមួយ នៃការបង្កើតការងារសម្រាប់ប្រជាជន និងសេដ្ឋកិច្ច កម្ពុជា។ លោក វ៉ាន់ ស៊ុយអៀង ប្រធានសហព័ន្ធនិយោជក និងសមាគមពាណិជ្ជកម្មកម្ពុជា និងជាប្រធានសមាគមរោងចក្រកាត់ដេរកម្ពុជា និយាយពីស្ថានភាពវិស័យឧស្សាហកម្មកាត់ដេរនៅកម្ពុជាថា សហជីព និងអ្នកបញ្ជាទិញបានទាមទារឲ្យនិយោជកដំឡើងប្រាក់ឈ្នួល គោលបន្ថែមដល់កម្មករ ប៉ុន្តែលោកថាអ្នកបញ្ជាទិញមិនបានដំឡើងតម្លៃទំនិញដែលពួកគេបញ្ជាទិញពីរោងចក្រនោះទេ។ លោកសង្កត់ធ្ងន់ថា បួនខែកន្លងទៅនេះ សមាជិករបស់ GMACចំនួន៣៥ បានបិទរោងចក្ររបស់ពួកគេ ដោយគ្មានការបញ្ជាទិញពីខាងក្រៅ។ លោក វ៉ាន់ ស៊ូអៀង អះអាងថា ប្រសិនបើប្រាក់ឈ្នួលគោលឡើងកាន់តែខ្ពស់ការប្រកួតប្រជែងរបស់កម្ពុជាជាមួយប្រទេសដទៃទៀតនឹងមានការប្រឈមកាន់តែខ្លាំង ដែលលោកថានឹងអាចធ្វើឲ្យរោងចក្រនៅកម្ពុជាមួយចំនួនបន្ថែមទៀតនឹង ត្រូវបិទទ្វារដោយសារតែមិនអាចរកប្រាក់ចំណេញបាន ហើយកម្មករកម្ពុជាច្រើននាក់នឹងបាត់បង់ការងារ។
លោកថា សព្វថ្ងៃនេះ កម្មករក្នុងវិស័យវាយនភ័ណ្ឌ និងផលិតស្បែកជើងរបស់កម្ពុជាអាចរកប្រាក់ចំណូលបានប្រហែលជា ២០៦ដុល្លារក្នុង១ខែ ដោយបូកជាមួយប្រាក់ថែមម៉ោង និងប្រាក់អត្ថប្រយោជន៍ផ្សេងទៀត។ លោក វ៉ាន់ ស៊ូអៀង បញ្ជាក់ថា មកទល់ពេលនេះ ភាគីនិយោជកមិនទាន់កំណត់ប្រាក់ឈ្នួលអប្បបរមា សម្រាប់ឆ្នាំ ២០១៦ ពិភាក្សាជាមួយភាគីសហជីព តំណាងកម្មករនិយោជិត និងភាគីពាក់ព័ន្ធនៅឡើយ។
«យើងមិនអាចមើលស្រាលពីសារៈសំខាន់ នៃការរក្សាទុកនូវនិរន្តភាពនៃ វិស័យឧស្សាហកម្មមួយនេះទេ ដែលជាង ៩០ភាគរយនៃការវិនិយោគមានប្រភពពីការ វិនិយោគពីបរទេស។ សន្តិភាពផ្នែកឧស្សាហកម្មមានភាពចាំបាច់ណាស់ ដើម្បីឲ្យមាន ពិពិធកម្ម និងការអភិវឌ្ឍន៍វិស័យឧស្សាហកម្មវាយនភ័ណ្ឌ កាត់ដេរសំលៀកបំពាក់ និងផលិត ស្បែកជើង ក៏ដូចជាការទាក់ទាញវិស័យផ្សេងទៀត ដែលមានតម្លៃបន្ថែមខ្ពស់ និងបង្កើត ការងារកម្ពុជា»។ នេះជាការសង្កត់ធ្ងន់របស់លោក វ៉ាន់ ស៊ូអៀង។
គួរបញ្ជាក់ថា កាលពីខែសីហា ឆ្នាំ២០១៥ កន្លងទៅ សមាគមរោងចក្រកាត់ដេរកម្ពុជាតំណាងឲ្យរោងចក្រនាំចេញផលិតផលកាត់ ដេរចំនួន ៥៦០ និងរោងចក្រស្បែកជើងចំនួន ៥៦ បានស្ទង់មតិក្នុងចំណោមរោងចក្រជាង ២០០អំពីការដំឡើងប្រាក់ឈ្នួល ឲ្យកម្មករនៅឆ្នាំ២០១៦ ដោយបន្ថែមលើប្រាក់ឈ្នួលគោលបច្ចុប្បន្ន១២៨ដុល្លារ ។ ជាលទ្ធផល មានរោងចក្រជាង៦០ភាគរយបញ្ជាក់ថា ពួកគេគ្មានលទ្ធភាពដំឡើងប្រាក់ ខែឲ្យកម្មករនោះទេ ប៉ុន្ដែមានរោងចក្រ២៦ភាគរយ ឯកភាពដំឡើងប្រាក់ឈ្នួលឲ្យកម្មករចាប់ពី ១ដុល្លារដល់ ៥ដុល្លារសម្រាប់ឆ្នាំ ២០១៦ ។
គួរបញ្ជាក់ផងដែរ វិស័យកាត់ដេរសំលៀកបំពាក់ និងផលិតស្បែកជើងនៅកម្ពុជា ដើរតួនាទីយ៉ាងសំខាន់ក្នុង សេដ្ឋកិច្ចកម្ពុជា។ វិស័យនេះ តំណាងឲ្យ ៨០ភាគរយ នៃទំនិញនាំចេញសរុបរបស់កម្ពុជា (GMAC, 2015a) ដែលមានតម្លៃរហូតដល់ ៥,៥ ពាន់លានដុល្លារអាមេរិកក្នុងឆ្នាំ ២០១៤ (BFC, 2014)។ នេះបើតាមរបាយការណ៍ស្រាវជ្រាវ របស់មូលនិធិក្រុមប្រឹក្សាការងារ។ វិស័យនេះ បានផ្តល់ការងារដល់កម្មករនិយោជិតប្រមាណ ៧០ម៉ឺននាក់ ក្នុងសហគ្រាសជិត ១ពាន់រួមមាន រោងចក្រផលិតទំនិញនាំចេញជាង ៥២០ (GMAC, 2015a; MoLVT, 2014; BFC, 2014) ជាប្រការគួរកត់សម្គាល់ វិស័យនេះ ត្រូវបានចាត់ថ្នាក់ថា មានការលូតលាស់បំផុត ក្នុងការភ្ជាប់ជាមួយការប្រើប្រាស់សិទ្ធិ ក្នុងទំនាក់ទំនងវិជ្ជាជីវៈកម្ពុជា ពោលគឺ ការអនុវត្តសកម្មភាពរួម និងដំណើរការនៃការដោះ ស្រាយវិវាទការងារ។ មូលនិធិក្រុមប្រឹក្សាការងារ ក៏បានកត់សម្គាល់ដែរ កូដកម្មធំក្នុង ឧស្សាហកម្ម បានកើតឡើងកាលពីឆ្នាំ ២០១៣ និង២០១៤ បង្កការរំខានបំផុតផងដែរ ក្នុងប្រវត្តិឧស្សាហកម្ម ហើយវាជាផ្នែកមួយ នៃការធ្វើកូដកម្ម ដែលបានប៉ះពាល់ ដល់វិស័យ កាត់ដេរសំលៀកបំពាក់ និងផលិតស្បែកជែង ចាប់តាំងពីពេលដែលវិស័យនេះ រីកលូតលាស់យ៉ាងឆាប់រហ័សមក៕
Tag:
GMAC
ប្រាក់ឈ្នួលអប្បរមា
© រក្សាសិទ្ធិដោយ thmeythmey.com