កីឡាជាតិ
ជាតិ
៤ សំនួរជាមួយអ្នកជំនាញ រឿងបញ្ជូនកីឡាករចំបាប់កម្ពុជាទៅប្រកួតកីឡាបែបបុរាណរបស់កូរ៉េ
× កាលពីថ្មីៗនេះសហព័ន្ធកីឡាចំបាប់កម្ពុជា បានសម្រេចចិត្តបញ្ជូនអត្តពលិករបស់ខ្លួនចំនួន ៦ រូបទៅចូលរួមប្រកួតក្នុងព្រឹត្តិការណ៍កីឡា Ssireum កម្រិតទ្វីបអាស៊ី និង ពិភពលោក Asian Ssireum Championship លើកទី១ និង World Ssireum Championship លើកទី៥នៅប្រទេសមីយ៉ាន់ម៉ា។ Ssireum ជាកីឡាប្រពៃណីរបស់ប្រទេសកូរ៉េខាងត្បូង ដែលមានលក្ខន្តិកៈដូចកីឡាចំបាប់បូរាណខ្មែរដែរ។
លោក ប៉ែន ប៉ារ៉ាឌី អ្នកយកព័ត៌មានរបស់សារព័ត៌មានថ្មីៗ បានជួបសម្ភាសន៍ជាមួយ លោក ធិន វិចិត្រ អគ្គលេខាធិការសហព័ន្ធកីឡាចំបាប់និងជាប្រតិភូក្រុមកម្ពុជា ក្រោយពេលត្រឡប់មកដល់ប្រទេសកម្ពុជាវិញ នៅល្ងាចថ្ងៃពុធ កន្លងទៅ៖
លោក ប៉ែន ប៉ារ៉ាឌី៖ តើអាចរៀបរាប់ត្រូសៗបានទេពីកីឡាចំបាប់បែបបុរាណរបស់កូរ៉េខាងត្បូង Ssireum?
លោក ធិន វិចិត្រ៖ Ssireum គឺជាប្រភេទកីឡាចំបាប់បែបបុរាណរបស់កូរ៉េ ដោយការប្រកួតធ្វើឡើងនៅខ្សាច់ ហើយកីឡាករ-កីឡាការិនី ត្រូវបានតម្រូវឲ្យចងក្រណាត់ភ្ជាប់ពីចង្កេះទៅភ្លៅខាងស្តាំ។ អ្នកដែលធ្វើឲ្យគូប្រកួតដួលផ្ញារក្រោយ ឬ លុតជង្គង់២ដង ជាអ្នកទទួលជ័យជម្នះ។
លោក ប៉ែន ប៉ារ៉ាឌី៖ ហេតុអ្វីបានជាកម្ពុជាសម្រេចចិត្តបញ្ជូនកីឡាករចំបាប់របស់ខ្លួនទៅចូលរួមក្នុងព្រឹត្តិការណ៍នេះ?
លោក ធិន វិចិត្រ៖ តាមពិតទៅយើងត្រៀមបញ្ជូនកីឡាករយើងទៅប្រកួតក្នុងកីឡាចំបាប់លើឆ្នេរខ្សាច់នៅប្រទេសវៀតណាម នៅឆ្នាំក្រោយ ហើយស្របពេលកីឡានេះក៏ប្រកួតលើទីលានប្រភេទដីខ្សាច់ដែរនោះយើងក៏សម្រេចចិត្តបញ្ជូនទៅ។ សូមបញ្ជាក់ថាការបញ្ជូនទៅនេះគឺខាងសមាគមកូរ៉េខាងត្បូងប្រចាំនៅកម្ពុជា ជាអ្នករ៉ាប់រងទាំងអស់ រាប់ទាំងបញ្ជូនគ្រូបង្វឹកមកណែនាំដល់កីឡាករកម្ពុជា មុនចេញដំណើរផងដែរ។
លោក ប៉ែន ប៉ារ៉ាឌី៖ លោកអាចបញ្ជាក់បានទេពីព្រឹត្តិការណ៍ Asian Ssireum Championship លើកទី១ និង World Ssireum Championship លើកទី៥នៅប្រទេសមីយ៉ាន់ម៉ា?
លោក ធិន វិចិត្រ៖ ព្រឹត្តិការណ៍នេះមានអត្តពលិកមកពីប្រមាណ២០ប្រទេស ចូលរួមខណៈការប្រកួតកម្រិតអាស៊ីជាលើកដំបូង មានអត្តពលិកមកពីប្រទេសកម្ពុជា វៀតណាម ម៉ាឡេស៊ី ឥណ្ឌូនេស៊ី ឡាវ រួមទាំងម្ចាស់ផ្ទះមីយ៉ាន់ម៉ា។ ការប្រកួតធ្វើឡើងចាប់ពីថ្ងៃទី ១៩ រហូតដល់ថ្ងៃទី ២១ ខែកញ្ញា នៅកីឡដ្ឋាន Thuwunna National Indoor Stadium ក្រុងយ៉ាំងហ្គោន ប្រទេសមីយ៉ាន់ម៉ា។ សូមបញ្ជាក់ថានៅឆ្នាំក្រោយ ព្រឹត្តិការណ៍នេះនឹងរៀបចំនៅទីក្រុងសេអ៊ូល ប្រទេសកូរ៉េខាងត្បូង វិញម្ដង។
លោក ប៉ែន ប៉ារ៉ាឌី៖ ជាលទ្ធផលកម្ពុជា ទទួលបានចំណាត់ថ្នាក់ ឬ មេដាយដែរឬទេ ក្នុងឱកាសចូលរួមលើកដំបូងនេះ?
លោក ធិន វិចិត្រ៖ ក្នុងការប្រកួតក្នុងប្រភេទទម្ងន់ក្រោម៧០គីឡូក្រាម កីឡាករ ឆាំ ពិស៊ិន បានយកឈ្នះកីឡាករម៉ាឡេស៊ី Sue Boon Wee ២-០ ហើយបន្តយកឈ្នះកីឡាករវៀតណាម Ho Ngan Giang ប៉ុន្តែបានចាញ់កីឡាករអ៊ីរ៉ង់ក្នុងលទ្ធផល ២-១ ក្នុងវគ្គពាក់កណ្ដាលផ្ដាច់ព្រ័ត្រ។ ជាហេតុធ្វើឱ្យគេទទួលបានមេដាយសំរឹទ្ធ។ ក្រៅពីដណ្ដើមបានមេដាយ ខាងសមាគមកូរ៉េនៅកម្ពុជា គេគ្រោងបង្កើតសមាគមកីឡា Ssireum ហើយកីឡាប្រភេទនេះនឹងបង្ហាញជូនប្រជាជនកម្ពុជា ទស្សនាកម្សាន្តនៅក្នុងពិធីបុណ្យសមុទ្រ ចុងឆ្នាំនេះនៅខេត្តកំពត៕
© រក្សាសិទ្ធិដោយ thmeythmey.com