ពីនេះ ពីនោះ
ទស្សនវិទូ៖ យុត្តិធម៌មានន័យយ៉ាងណា?
× ពាក្យយុត្តិធម៌ ជាបញ្ញត្តិដែលមាននៅក្នុងច្បាប់ ពិសេសនៅក្នុងប្រព័ន្ធតុលាការ និងច្បាប់សង្គម។ មនុស្សភាគច្រើនតែងតែស្រឡាញ់ពាក្យថា«យុត្តិធម៌» គេមានជំនឿលើយុត្តិធម៌ ព្រោះយុត្តិធម៌ជាអ្នកស្វែងរកសច្ចភាព ពេលអ្នកទាំងនោះមានបញ្ហាកើតឡើងនៅក្នុងសង្គម។ ពួកគេត្រូវការគោលការណ៍មួយដែលអាចទទួលយកដោយស្ងប់ចិត្ត គឺ«យុត្តិធម៌»។ អ្វីជាអត្ថន័យ នៃពាក្យថាយុត្តិធម៌?
ចំពោះវចនានុក្រមសម្តេចព្រះសង្ឃរាជ ជួន ណាត៖ យុត្តិធម៌ ជាសេចក្តីទៀងត្រង់ ការគួរតាមច្បាប់ធម៌ដែលគួរកាន់ ការប្រព្រឹត្តិត្រឹមត្រូវដូចជាការវិនិច្ឆ័យក្តីប្រកបដោយយុត្តិធម៌ កាត់ក្តីដោយសុចរិតធម៌ជាដើម។
ចំណែកទស្សនៈរបស់ប្លាតុង ៖ យុត្តិធម៌គឺជាតម្លៃខ្ពស់បំផុតសម្រាប់ធ្វើឲ្យបុរីស្ថិតនៅក្នុងភាពមានលំនឹងនិងសណ្តាប់ធ្នាប់។ ដើម្បីឲ្យមានយុត្តិធម៌ត្រូវរៀបចំមនុស្សម្នាក់ៗទៅតាមទីកន្លែង និងទៅតាមអ្វីដែលមនុស្សទាំងនោះត្រូវធ្វើ ហើយមិនត្រូវរំលោភបំពានទៅលើសកម្មភាពបំពេញការងាររបស់អ្នកទាំងនោះឡើយ។
រីឯទស្សនៈរបស់លោកស៊ីសេរ៉ុង៖ យុត្តិធម៌មានន័យថា មិនបង្កផលអាក្រក់ដល់អ្នកដទៃ ហើយមិនបំពានទៅលើកម្មសិទ្ធិរបស់អ្នកដទៃ។ អ្នកដែលបានចែករំលែកនូវច្បាប់មានន័យថា អ្នកនោះបានចែករំលែកនូវយុត្តិធម៌។
ចំពោះទស្សនៈរបស់ ខុង ជឺ៖ យុត្តិធម៌មានរូបភាពពីរយ៉ាងគឺយុត្តិធម៌នៅក្នុងសង្គម និងយុត្តិធម៌នៅក្នុងគ្រួសារ។ ដំបូងឡើយ យុត្តិធម៌កើតមាននៅក្នុងគ្រួសារជាមុនសិនដែលមានន័យឆ្ពោះទៅរកការស្គាល់ពីឈ្មោះគឺនៅត្រង់ថា បងគឺបង ប្អូនគឺប្អូន ឪពុកម្ដាយគឺជាឪពុកម្ដាយ។ លោកបានលើកឡើងថា« កូនត្រូវស្តាប់បង្គាប់ឪពុកម្តាយ និងរៀមច្បងរបស់ខ្លួន»។ ក្រោយមកទើបវារីកដាលទៅដល់សង្គមរស់នៅ។ យុត្តិធម៌ពួនសម្ងំនៅក្នុងចិត្ត និងកាយវិការរបស់មនុស្ស។
ជារួមមនុស្សម្នាក់ ដែលប្រកបដោយគុណធម៌ទាល់តែអ្នកនោះមានយុត្តិធម៌ សីលធម៌ មានចំណេះដឹង ការពិចារណា និងការប្រុងប្រយ័ត្នជាប់លាប់ជានិច្ច ជាអ្នកឃ្លាំមើលនូវសកម្មភាពទាំងឡាយរបស់បុគ្គល ចៀសវាងនូវការធ្វេសប្រហែស ប្រព្រឹត្តិអំពើអាក្រក់ណាមួយដោយចេតនា ឬអចេតនា ជាអ្នកដឹងគុណ និងអត់ធ្មត់ព្យាយាម។
© រក្សាសិទ្ធិដោយ thmeythmey.com