កីឡាជាតិ
×![]()
ការប្រកួតកីឡាគុនដាវជ្រើសរើសជើងឯកប្រចាំឆ្នាំ២០១៥ ដែលធ្វើនៅសាលដំបូលទូក នៃសាកលវិទ្យាល័យភូមិន្ទភ្នំពេញពីថ្ងៃទី២៨ ដល់ថ្ងៃទី៣០ ខែកញ្ញា កន្លងទៅនេះ មានអ្នកចូលរួមប្រកួតតែ៣៥នាក់ប៉ុណ្ណោះ ខណៈចំនួនចុះឈ្មោះមានរហូតដល់ទៅ៥៩នាក់។ មូលហេតុនៃការខកខាន គឺដោយសារតែបេក្ខជនមួយចំនួនជាប់រវល់ការសិក្សា។
«អ្នកចុះឈ្មោះចូលរួមប្រកួតកីឡាគុនដាវជ្រើសរើសជើងឯកប្រចាំឆ្នាំ២០១៥ មានចំនួន៥៩នាក់ ប៉ុន្តែអ្នកចូលរួមប្រកួតជាក់ស្តែងមានតែ ៣៥នាក់ប៉ុណ្ណោះ ដោយសារអ្នកទាំងនោះជាប់រវល់នឹងការសិក្សារបស់ពួកគេ ព្រោះថាការអ្នកចុះឈ្មោះចូលរួមប្រកួតភាគច្រើនជាសិស្ស»។ នេះជាការបញ្ជាក់របស់ លោកសុខយ៉ា និមល អគ្គលេខាធិការសហព័ន្ធគុនដាវកម្ពុជា។
ការប្រកួតគុនដាវជ្រើសរើសជើងឯកប្រចាំឆ្នាំ២០១៥ បានចាប់ផ្តើមប្រកួតតាំងពីថ្ងៃទី២៨ ខែកញ្ញា ដែលមានក្លិបចំនួន ៥ ចូលរួមប្រកួត គឺក្លឹបហូសាណា-ក្លឹបអ៊ីសា-ក្លឹបសន្ធរម៉ុក-ក្លឹបសាមគ្គី និង ក្លឹបនរា លើវិញ្ញាសា ៤ គឺដាវធំបុរសឯកត្តជន-ដាវធំបុរសជាក្រុម-ដាវតូចបុរសឯកត្តជន និងដាវធំនារីឯកត្តជន។
ការប្រកួតបានបញ្ចប់ហើយកាលពីល្ងាចថ្ងៃទី៣០ ខែកញ្ញាម្សិលមិញនេះ ដោយទទួលបានលទ្ធផលដូចខាងក្រោម៖
វិញ្ញាសានារីឯកត្តជនដាវធំ មេដាយមាសបានទៅលើកីឡាការនី ឆាយ លីលី មកពីក្លឹបអ៊ីសា មេដាយប្រាក់បានទៅលើកីឡាការនីមកពីក្លឹបហូសាណា មួង ម៉ានុត និងកីឡាការនី សួង ពិសី មកបីក្លឹបហូសាណាទទួលបានមេដាយសំរឹទ្ធិ។ ឬឯវិញ្ញាសាដាវតូចបុរសឯកត្តជន មេដាយមាសបានទៅលើកីឡាករ ជីម ធារ៉ា មកពីក្លឹបហូសាណា មេដាយប្រាក់បានទៅលើកីឡាករ ឆាយ សុខលាភ មកពីក្លឹបអ៊ីសា និងមេដាយសំរិទ្ធបានទៅលើកីឡាករ សាន់ សុខសីហា មកពីក្លឹបអ៊ីសា។ ចំណែកវិញ្ញាសាបុរសដាវធំឯកត្តជន មេដាយមាសបានទៅលើកីឡាករ ឃឹម សាមាន មកពីក្លឹបសន្ធរម៉ុក មេដាយប្រាក់បានទៅលើកីឡាករ មាលា បូរិន មកពីក្លឹប នរា និងមេដាយសំរិទ្ធបានទៅលើកីឡាករ សាន់ សុខសីហា មកពីក្លឹបអ៊ីសា។ និងវិញ្ញាសាដាវធំបុរសជាក្រុម មេដាយមាសបានទៅលើក្លឹប អ៊ីសា (ដែលមានកីឡាករ សាន់ សុខសីហា-សំ សិទ្ធិបញ្ញា និង ឆាយ សុខលាភ) មេដាយប្រាក់បានទៅលើក្លឹប សន្ធរម៉ុក (ដែលមានកីឡាករឃីម សាមាន -កេត ស៊ីសុវណ្ណឧត្តម និង សរ សុវណ្ណារី) និងមេដាយសំរិទ្ធបានទៅលើ ក្លឹបនរា (ដែលមានកីឡាករមាលា បូរិន-យឹម នាគ និង ជុំ សម្បត្តិ)៕
Tag:
គុនដាវ
© រក្សាសិទ្ធិដោយ thmeythmey.com
