ក្នុងការប្រកួតក្របខណ្ឌមិត្តហ្វូនខេមបូឌានលីកឆ្នាំ២០១៥ កាលពីពាក់កណ្តាលចុងសប្តាហ៍កន្លងទៅនេះ ក្រុមចំនួន៥ គឺអគ្គស្នងការដ្ឋាននគរបាលជាតិ ណាហ្គាវើល ខេមបូឌានថាយហ្គឺរ ក្រសួងការពារជាតិ និងស្វាយរៀង នៅតែមានពិន្ទុប្រដេញគ្នាដើម្បីចូលរួមជាមួយភ្នំពេញក្រោន និងបឹងកេតអង្គរសម្រាប់ជំនួបវគ្គខ្វែង។ ជាមួយគ្នានេះ អាស៊ីអឺរ៉ុប ស៊ីម៉ាក់ វេស្ទើន និងគិរីវង់សុខសែនជ័យ ប្រឹងប្រជែងគ្នាឲ្យផុតពីតំបន់គ្រោះថ្នាក់ ខណៈបៀលប្រាយយូណាយធីតស្ថិតក្នុងតំបន់សុវត្ថិភាព។
ភ្នំពេញក្រោន និងចម្ការកៅស៊ូបឹងកេត រក្សាជ័យជម្នះរៀងៗខ្លួនក្នុងការប្រកួតក្របខណ្ឌមិត្តហ្វូនខេមបូឌានលីកឆ្នាំ២០១៥ កាលពីពាក់កណ្តាលចុងសប្តាហ៍កន្លងមក ដោយភ្នំពេញក្រោនបំបាក់បៀលប្រាយយូណាយធីត ៤-០ មុនពេលបឹងកេតអង្គរយកឈ្នះស៊ីម៉ាក់យូណាយធីត ៣-០ ។ បើទោះបីជាក្រុមខ្លាំងទាំងពីរ មានកៅអីសម្រាប់ការប្រកួតវគ្គខ្វែងក៏ដោយ ប៉ុន្តែពួកគេត្រូវប្រជែងគ្នាយកចំណាត់ថ្នាក់លេខមួយលើតារាង ដើម្បីទទួលបានកៅអីក្នុងការប្រកួតជម្រុះពានរង្វាន់ Mekong Toyota Cup នៅប្រទេសឡាវ។
បច្ចុប្បន្ន ក្រុមចំនួន១០ បានបញ្ចប់ការប្រកួតសប្តាហ៍ទី២០របស់ខ្លួនរួចរាល់ហើយ ដោយលើកលែងតែបឹងកេតអង្គរ និងក្រសួងការពារជាតិប៉ុណ្ណោះដែលនៅសល់មួយប្រកួតតាមពីក្រោយ។ បច្ចុប្បន្ន ភ្នំពេញក្រោន រក្សាចំណាត់ថ្នាក់លេខ១លើតារាង ដោយមាន៤៨ពិន្ទុស្មើបឹងកេតអង្គរ ប៉ុន្តែបឹងកេតអង្គរទើបតែប្រកួតបាន១៩លើកប៉ុណ្ណោះ។
អគ្គស្នងការដ្ឋាននគរបាលជាតិ ដែលបានយកឈ្នះវេស្ទើន ២-០ ឈរនៅចំណាត់ថ្នាក់លេខ៣ ដោយមាន៣៥ពិន្ទុ ស្មើ ណាហ្គាវើល ដែលបានបំបាក់ក្រសួងការពារជាតិ ២-០ ដូចគ្នា។ ខេមបូឌានថាយហ្គឺរ មាន៣៤ពិន្ទុ បន្ទាប់ពីបានយកឈ្នះអាស៊ីអឺរ៉ុបយូណាយធីត ២-១ ខណៈក្រសួងការពារជាតិដែលទើបបញ្ចប់ការប្រកួតសប្តាហ៍ទី១៩ នៅតែមានប្រៀបលើស្វាយរៀង បើទោះបីជាក្រុមស្វាយរៀង បានយកឈ្នះ គិរីវង់សុខសែនជ័យ ៥-០ ដើម្បីទទួលបាន៣២ពិន្ទុស្មើគ្នាក៏ដោយ។
លទ្ធផលទាំងនេះ បានបង្ហាញថា អគ្គស្នងការដ្ឋាននគរបាលជាតិ ណាហ្គាវើល ខេមបូឌានថាយហ្គឺរ ក្រសួងការពារជាតិ និងស្វាយរៀង នៅតែមានពិន្ទុប្រដេញគ្នាសម្រាប់ការប្រកួតវគ្គខ្វែងដែលមានភ្នំពេញក្រោន និងបឹងកេតអង្គរនៅរង់ចាំ។
សម្រាប់បៀលប្រាយយូណាយធីត ដែលមានត្រឹម២១ពិន្ទុ បើទោះបីជា ខកឱកាសក្នុងការប្រជែងចូលវគ្គខ្វែង ប៉ុន្តែពួកគេស្ថិតក្នុងតំបន់សុវត្ថិភាព ខណៈអាស៊ីអឺរ៉ុប ស៊ីម៉ាក់ ដែលមាន១៤ពិន្ទុ វេស្ទើនដែលមាន១៣ពិន្ទុ និងគិរីវង់ដែលមាន១១ពិន្ទុ ត្រូវប្រជែងគ្នាឲ្យផុតពីតំបន់គ្រោះថ្នាក់។
នៅរសៀលថ្ងៃអាទិត្យ ទី៤ ខែតុលា ខាងមុខនេះ បឹងកេតអង្គរ និងក្រសួងការពារជាតិ ត្រូវប្រកួតបង្គ្រប់សប្តាហ៍ទី២០របស់ខ្លួន មុនពេលដែលជំនួបក្របខណ្ឌមិត្តហ្វូនខេមបូឌានលីកត្រូវផ្អាកពីរសប្តាហ៍ ដោយសារតែកីឡាករកម្ពុជា មានកាតាព្វកិច្ចបម្រើក្រុមជម្រើសជាតិកម្ពុជា សម្រាប់ការប្រកួតវគ្គជម្រុះជុំទីពីរ ជើងទីពីរនៃព្រឹត្តិការណ៍ដណ្តើមពានរង្វាន់ពិភពលោក ជាមួយសឹង្ហបុរី។
សម្រាប់ការប្រកួតនៅលើទឹកដី សឹង្ហបុរី នាថ្ងៃទី១៣ ខែតុលា គ្រូបង្វឹកកូរ៉េខាងត្បូង លោក Lee Tae Hoon បានធ្វើការជ្រើសរើសកីឡាករ២៥រូប មានសមាសភាពមកពីស្វាយរៀង៧រូប (ប៉េង ប៊ុនឆាយ, ប្រាក់ មុន្នីឧត្តម, សឿយ វិសាល, នេន សុធារ័ត្ន, ណុប តុលា, សំអឿន ពិដោរ និងហូយ ផល្លីន) បឹងកេតអង្គរ៦រូប (ឃួន ឡាបូរ៉ាវី, ចាន់ វឌ្ឍនាកា, សុខ សុវណ្ណ, រស់ សំអឿន, ស៊ូ យ៉ាទី និងហុង ផេង) ក្រសួងការពារជាតិ៤រូប (ឈិន ឈឿន, រឿម ចាន់រឿន, ច្រឹង ពលរដ្ឋ និងអ៊ុំ សេរីរ័ត្ន) ភ្នំពេញក្រោន៣រូប (ប៊ិន ចន្ថាធារី, សុះ ស៊ូហាណា និងកែវ សុខផេង) ណាហ្គាវើល៣រូប (គួច សុគម្ភៈ, ប្រាក់ ចាន់រតនា និង ញឹម សុវណ្ណារ៉ា) និងអគ្គស្នងការដ្ឋាននគរបាលជាតិ២រូប (សាយ ពិសិដ្ឋ និងទិត ឌីណា) ។