កីឡាជាតិ
×![]()
កីឡាករជើងខ្លាំងរបស់កម្ពុជា ឡៅ ស៊ីណាត និង វង្ស ណយ ចាញ់ក្នុងកណ្តាប់ដៃកីឡាករថៃ ក្នុងការប្រកួតមិត្តភាពអន្តរជាតិដណ្តើមខ្សែក្រវ៉ាត់ ខារ៉ាបៅ នៅលើសង្វៀនបាយ័នស្ទឹងមានជ័យតែមួយកាលពីល្ងាចម្សិលមិញ។ 
កីឡាករ ឡៅ ស៊ីណាត មកពីក្លិបកងពលតូចឆ័ត្រយោង ៩១១ ថ្វាយបង្គំគ្រូបែបព្រះល័ក្ខព័ន្ធសីមា បានជួបប្រកួតជាមួយកីឡាករថៃ RARUENG LUKCHAMPACHAI វ័យ ២២ឆ្នាំ កំពស់ ១.៨១ម៉ែត្រ ធ្លាប់ប្រកួត៩១ ដង ឈ្នះ៦៨ដង ចាញ់២០ដង ស្មើ៣ដង និងផ្តួលគូប្រកួតឱ្យសន្លប់ ១១ដង ។
ទោះបីជា ឡៅ ស៊ីណាត មានកំពស់ទាបជាង RARUENG LUKCHAMPACHAI ប៉ុន្តែនៅក្នុងទឹកទី១ ស៊ីណាត បានបោះកណា្តប់ដៃ និងកែងវាយសម្រុកលើកីឡាករថៃ ចំណែកឯ RARUENG វិញបានប្រើជើងរបស់គេទាត់ចូលកីឡាករកម្ពុជាផងដែរ គ្រាន់តែទឹកទី២ឈានចូលមកដល់ ស៊ីណាត បានប្រើកែងឆ្វេង និងបោះកណ្តាប់ដៃផ្ទួនៗ ចូលផ្ទៃមុខ និងព្យាយាមប្តូរជង្គង់ជាមួយកីឡាករថៃម្នាក់នេះជាបន្តបន្ទាប់ នៅចុងទឹកទី២ កីឡាករថៃបានប្រើរន្ទះជើងរបស់គេទាត់ទៅលើកញ្ចឹងករ ស៊ីណាត ហើយបានធ្វើឱ្យដួលសន្លប់នៅក្នុងទឹកទី២នេះតែម្តង។
ចំណែកកីឡាករ វង្ស ណយ មកពីខេត្តប៉ៃលិន ប្រកួតជាមួយកីឡាករថៃវ័យ ២១ឆ្នាំ KLAK HUNSERK អ្នកទាំងពីរបានប្រកួតយ៉ាងស្វិតស្វាញរយៈពេល ៥ទឹកពេញ។
ទោះបីជាកីឡាករថៃម្នាក់នេះ ទើបតែចាញ់កីឡាករជើងខ្លាំង បឺត ខាំ ក៏ដោយ ប៉ុន្តែកីឡាករម្នាក់នេះមានប្រវត្តិប្រកួតរហូតជាង១០០ដង និងឈ្នះ៩។ ការវាយសម្រុកគ្នារបស់អ្នកទាំង២ ពិសេសការប្តូរកែង និងជង្គង់ដ៏គ្រោះថ្នាក់ចាប់ពីទឹកទី១ រហូតដល់ទឹកទី៣ កីឡាករថៃ បានធ្វើឱ្យអាជ្ញាកណ្តាលរាប់កីឡាករ វង្ស ណយ នៅចុងទឹកទី៣ ។
នៅក្នុងទឹកទី៤ កីឡាករ វង្ស ណយបានព្យាយាមប្រើកែង និងបោះកណ្តាប់ដៃចូលផ្ទៃមុខពេញៗរហូតធ្វើឱ្យកីឡាករថៃដួលទៅលើសង្វៀន ចំណែកកីឡាករថៃឯណោះវិញបានព្យាយាមប្រើជង្គង់ និងទាត់ចំគោលដៅពេញៗរហូតធ្វើឱ្យអជ្ញាកណ្តាលរាប់កីឡាករ វង្ស ណយ នៅចុងទឹកទី៤ម្តងទៀត។
គ្រាន់តែស្នូរជួងទឹកទី៥ បានចាប់ផ្តើម ណយ មិនបង្អង់បានប្រើកណ្តាប់ដៃ និងកែងវាយចូលចំផ្ទៃមុខពេញៗតែម្តង ចំណែកកីឡាករថៃបានព្យាយាមបោះជង្គង់ចួលពោះទឹកពេញៗទៅលើកីឡាករ វង្ស ណយ ផងដែរ បន្ទាប់ពីប្រកួតយ៉ាងស្វិតស្វាញអស់រយៈពេល៥ លទ្ធផលត្រូវអាជ្ញាកណ្តាល់សម្រេចលើកដៃកីឡាករថៃ ឱ្យឈ្នះលើកីឡាករ វង្ស ណយ ដោយពិន្ទុ។
ជាលទ្ធផលចុងក្រោយកីឡាករ ឡៅ ស៊ីណាត បានសន្លប់ក្រោមរន្ទះជើងកីឡាករ ថៃ ក្នុងទឹកទី២ ចំណែកកីឡាករ វង្ស ណយ ចាញ់កីឡាករថៃដោយពិន្ទុ នៅសង្វៀនតែមួយ៕
ទស្សនាវីដេអូ
© រក្សាសិទ្ធិដោយ thmeythmey.com
