ជាតិ
ពីនេះ ពីនោះ
សង្គមជាតិ
អត្ថន័យនៃការធ្វើបុណ្យ៧វត្ត
× ១- អ្វីទៅដែលហៅថា វត្ត? តើវត្តស្ថិតនៅឯណា?
វត្តមានន័យថា ការប្រកាន់នូវអំពើល្អ។ វត្តនេះ ស្ថិតនៅក្នុងចិត្តមនុស្ស គ្រប់ៗរូប។ ចំណែកវត្តអារាម ដែលយើងគ្នាទៅជួបជុំ គឺជាទីមណ្ឌល នៃបុគ្គលដែលប្រកាន់នូវអំពើល្អ សម្រាប់មកប្រជុំគ្នា ចែករំលែក នូវទឹកចិត្តល្អ ប្រកបដោយធម៌សន្តិមង្គល ចំពោះគ្នា ទៅវិញទៅមក។
នៅពេលមានពិធីបុណ្យផ្សេងៗ ជាពិសេស ពិធីបុណ្យប្រជុំបិណ្ឌ ខ្មែរយើងដែលប្រកាន់នូវអំពើល្អ តែងនាំគ្នាយកបាយសម្ល នំចំណី (ភាគច្រើនធ្វើអំពីអង្ករ) និង វត្ថុសព្វសារពើ ដែលជាផ្នែកនៃទាន ទៅវត្តអារាម ដើម្បីធ្វើបុណ្យ ចែកទានដល់អ្នកខ្វះខាត និង ដើម្បីរំលឹក ដល់អ្នកមានគុណទាំងឡាយ ដែលជួយអោយជីវិតរបស់គេ បានទទួលបុណ្យកុសល និង ភាពរុងរឿងសន្តិ នៅក្នុងចិត្ត នៅក្នុងជីវិត។ ប៉ុន្តែ នេះមិនបានន័យថា ទាល់តែនាំគ្នា ទៅដល់អារាម ទើបអាចហៅបានថា ធ្វើបុណ្យច្រើនវត្តនោះទេ។
វត្ត គឺនៅស្តិតគ្រប់កន្លែងទាំងអស់ ជុំវិញខ្លួនយើង។ ធ្វើបុណ្យ មានន័យថាជាការចែកចាយ នូវអំពើល្អ ចំពោះបុគ្គលដែលខ្វះខាត នៅជុំជិតយើង នោះគឺមានន័យ យើងបានធ្វើបុណ្យ នៅវត្តហើយ។ អារាម ជាមណ្ឌលទីប្រជុំមនុស្ស ប៉ុន្តែវត្ត គឺជាវត្ថុអរូបិយ ដែលមិនមានរូបឡើយ គឺគ្រាន់តែជា ការប្រកាន់នូវទង្វើល្អ នៃបុគ្គលគ្រប់រូបទាំងឡាយ នោះតែប៉ុណ្ណោះ។
២- តើ ៧ វត្ត មានអត្ថន័យ ដូចម្តេច?
យើងធ្លាប់ឮពាក្យថា ញាតិ៧សន្តាន គ្រប់ៗគ្នា។ តើ ៧សន្តាន មានន័យ យ៉ាងដូចម្តេច? នោះគឺជាការប្រមូលផ្តុំញាតិ ដោយពុំមានខ្វះនរណាម្នាក់ មានដូចជា ៖
1/ គ្រួសាររបស់ខ្លួនយើងផ្ទាល់
2/ គ្រួសាររបស់បងប្អូនបង្កើតមួយ (ជួនកាលជាគ្រួសារបងប្អូនបង្កើត តែម្តាយផ្សេង ឬឪពុកផ្សេង)
3/ គ្រួសាររបស់បងប្អូនជីដូន១
4/ គ្រួសាររបស់បងប្អូនជីទូត១
5/ គ្រួសាររបស់បងប្អូនជីលួត១
6/ គ្រួសាររបស់បងប្អូនជីលា១
7/ គ្រួសាររបស់សាច់ថ្លៃ១ មានឪពុកម្តាយក្មេក បងថ្លៃប្អូនថ្លៃ និងក្រុមគ្រួសាររបស់គេ។
ដួច្នេះ នៅពេលណាមាន ពិធីបុណ្យផ្សេងៗ យើងរមែងឃើញ សាច់ញាតិសន្តាន គ្រប់ប្រភេទ មកចូលរួម ស្ទើរពុំមានចន្លោះនរណាម្នាក់ឡើយ។ ហើយនៅថ្ងៃបុណ្យនិមួយៗ ខ្មែរក៏មានសេចក្តីសោមនស្ស ទទួលយកបុណ្យ និង ចែករំលែកបុណ្យ ចំពោះគ្នាទៅវិញទៅមក យ៉ាងសប្បុរសរីករាយ ដោយមិនរើសអើង ចំពោះនរណាឡើយ មិនថានៅកន្លែងណា ទីណាទេ។
សរុបសេចក្តីមក ការធ្វើបុណ្យ៧វត្ត មានន័យថា ជាការចែកចាយ នូវអំពើល្អ ជាកុសល ជូនដល់បុគ្គល ជាញាតិជិតឆ្ងាយ គ្រប់ៗគ្នា ទាំង៧សន្តាន មិនមានចន្លោះ នរណាម្នាក់ឡើយ ក្នុងសង្គម ដោយពុំមានការរើសអើស ប្រកាន់មនុស្ស ប្រកាន់ទីកន្លែង ឬ វណ្ណៈគ្រួសារសាច់ញាតិ៕
ដោយ អ្នកស្រី កែវ ច័ន្ទបូរណ៍
Tag:
កែវ ច័ន្ទបូរណ៍
បុណ្យ៧វត្ត
© រក្សាសិទ្ធិដោយ thmeythmey.com