កីឡាជាតិ
ជាតិ
×![]()
ក្រុមកីឡាបាល់ទាត់ជម្រើសជាតិកម្ពុជា កំពុងត្រៀមខ្លួនសម្រាប់ការប្រកួតជើងទីពីរនៃវគ្គជម្រុះ World Cup នៅទឹកដីរបស់សឹង្ហបុរី នាល្ងាចថ្ងៃទី១៣ ខែតុលា ឆ្នាំ២០១៥ ខាងមុខ។ កម្ពុជាដែលស្ថិតនៅក្រោមការដឹកនាំរបស់គ្រូបង្វឹកកូរ៉េខាងត្បូង លោក Lee Tae Hoon បានចាញ់ការប្រកួតទាំង៤លើកកន្លងមកនៅក្នុងពូល E រួមទាំងការចាញ់សឹង្ហបុរី ៤-០ នៅក្នុងទឹកដីខ្លួន។ សម្រាប់ការប្រកួតក្រោយពិធីបុណ្យភ្ជុំបិណ្ឌនេះ លោក Lee មានកីឡាករក្នុងជម្រើសចំនួន២៥នាក់ ។
មិនមានឡើយឱកាសទៅជួបជុំគ្រួសារនាពិធីបុណ្យភ្ជុំបិណ្ឌ សម្រាប់ថ្នាក់ដឹកនាំ និងកីឡាករនៃក្រុមកីឡាបាល់ទាត់ជម្រើសជាតិកម្ពុជា ដោយពួកគេត្រូវត្រៀមខ្លួនសម្រាប់ការប្រកួតជើងទីពីរនៃវគ្គជម្រុះកីឡាបាល់ទាត់ពានរង្វាន់ពិភពលោក ជាមួយម្ចាស់ផ្ទះសឹង្ហបុរី នាវេលាម៉ោង៧យប់ថ្ងៃទី១៣ ខែតុលា នេះពោលគឺមួយថ្ងៃក្រោយពិធីបុណ្យភ្ជុំបិណ្ឌ។
ក្រុមកីឡាបាល់ទាត់ជម្រើសជាតិកម្ពុជា ក្រោមការដឹកនាំរបស់គ្រូបង្វឹកកូរ៉េខាងត្បូង លោក Lee Tae Hoon បានរងបរាជ័យទាំង៤ប្រកួតនៅជើងទីមួយនៃពូល E ដោយចាញ់សឹង្ហបុរី ៤-០ ចាញ់អាហ្វហ្គានីស្ថាន ១-០ ចាញ់ស៊ីរី ៦-០ នៅរាជធានីភ្នំពេញ និងចាញ់ជប៉ុន ៣-០ នៅក្រុង Saitama របស់ជប៉ុន។
សូមរំលឹកថា នាជំនួបជាមួយសឹង្ហបុរី នៅពហុកីឡដ្ឋានជាតិអូឡាំពិក កាលពីថ្ងៃទី១១ ខែមិថុនា កន្លងមក ចំនួនអ្នកទស្សនាមានរហូតដល់ទៅជាង៦ម៉ឺននាក់ ដែលជាកំណត់ត្រាដ៏គួរឲ្យកត់សម្គាល់ក្នុងប្រវត្តិសាស្ត្របាល់ទាត់របស់កម្ពុជា។ សឹង្ហបុរី បានរកបាន៣គ្រាប់នៅតង់ទីមួយ ហើយបន្ថែម១គ្រាប់ទៀតនៅក្នុងតង់ទីពីរ។
ក្នុងដំណើរការប្រកួតជើងទីពីរនៅកីឡដ្ឋាន National Stadium របស់សឹង្ហបុរី នាថ្ងៃទី១៣ ខែកញ្ញា ខាងមុខ លោក Lee Tae Hoon មានជម្រើសកីឡាករចំនួន២៥នាក់ ដោយ៧នាក់មកពីស្វាយរៀង (ប៉េង ប៊ុនឆាយ, ប្រាក់ មុន្នីឧត្តម, សឿយ វិសាល, នេន សុធារ័ត្ន, ណុប តុលា, សំអឿន ពិដោរ និងហូយ ផល្លីន) ៦នាក់មកពីបឹងកេតអង្គរ (ឃួន ឡាបូរ៉ាវី, ចាន់ វឌ្ឍនាកា, សុខ សុវណ្ណ, រស់ សំអឿន, ស៊ូ យ៉ាទី និងហុង ផេង) ៤នាក់ពីក្រសួងការពារជាតិ (ឈិន ឈឿន, រឿម ចាន់រឿន, ច្រឹង ពលរដ្ឋ និងអ៊ុំ សេរីរ័ត្ន) ៣នាក់ពី ភ្នំពេញក្រោន (ប៊ិន ចន្ថាធារី, សុះ ស៊ូហាណា និងកែវ សុខផេង) ៣នាក់ពីណាហ្គាវើល (គួច សុគម្ភៈ, ប្រាក់ ចាន់រតនា និង ញឹម សុវណ្ណារ៉ា) និង២នាក់ពីអគ្គស្នងការដ្ឋាននគរបាលជាតិ (សាយ ពិសិដ្ឋ និងទិត ឌីណា) ។
ក្រៅពីកីឡាករ មន្ត្រី៩នាក់ផ្សេងទៀត ដោយ អនុប្រធានសហព័ន្ធកីឡាបាល់ទាត់កម្ពុជា លោក ខៀវ សាម៉េត ទទួលបន្ទុកជាប្រធានប្រតិភូ លោក ឆាំង ពិសិដ្ឋ ជាអ្នកចាត់ការទូទៅ។ ក្រុមការងារគ្រូបង្វឹកដែលត្រូវជួយដល់ការងារគ្រូបង្វឹកកូរ៉េខាងត្បូង លោក Lee Tae Hoon រួមមាន លោក អ៊ុង កនយ៉ានិត លោក ហោ សុខហេង និងលោក អ៊ុំ សាវង្ស ជាជំនួយការ លោក អ៊ិន សុខា ជាគ្រូចាំទី រីឯគ្រូពេទ្យ មានលោក ហៃ ស័គ្គរី និងលោក ខាត់ ចាន់ហាក់។
ក្រុមទាំង៥នៅក្នុងពូល E បានបញ្ចប់ការប្រកួតជើងទីមួយរបស់ខ្លួនអស់ហើយ ដោយជប៉ុនឈរលេខមួយបណ្ណោះអាសន្ន ដោយមាន១០ពិន្ទុ ឈរស្ថិតនៅលេខ២មាន៩ពិន្ទុ សឹង្ហបុរីលេខ៣មាន៧ពិន្ទុ អាហ្វហ្គានីស្ថានលេខ៤មាន៣ពិន្ទុ ខណៈកម្ពុជាស្ថិតនៅបាតតារាង ដោយបរាជ័យទាំង៤ប្រកួត ហើយធ្លាយសំណាញ់ទីសរុប១៤គ្រាប់ ដោយគ្មានការតបតវិញ៕
Tag:
បាល់ទាត់
World Cup
ជម្រើសជាតិកម្ពុជា
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
5 ថ្ងៃ
