អន្តរជាតិ
នយោបាយអន្តរជាតិ
ទ័ពអាកាសអ៊ីរ៉ាក់កម្ទេចក្បួនរថយន្តមេក្រុមរដ្ឋឥស្លាម
× ក្រុមទាហានអ៊ីរ៉ាក់បានអះអាងថាកងកម្លាំងជើងអាកាសខ្លួនបានកម្ទេចក្បួនរថយន្តរបស់មេដឹកនាំក្រុមរដ្ឋឥស្លាម Abu Bakr al-Baghdadi នៅថ្ងៃនេះ។ ប៉ុន្តែក្រុមយោធាមិនបានបញ្ជាក់ច្បាស់ថាតើមេដឹកនាំកំពូលក្រុមភេរវជនរដ្ឋឥស្លាមខាងលើនេះនៅក្នុងរថយន្តនោះដែរឬយ៉ាងណាឡើយ។ ជីវិតរបស់មេដឹកនាំក្រុមនេះកំពុងស្ថិតក្នុងភាពស្រពេចស្រពិលនៅឡើយ។ នេះបើយោងតាមសារព័ត៌មាន Al Jazeera។
ទាហានអ៊ីរ៉ាក់នៅថ្ងៃនេះបានចេញសេចក្តីថ្លែងការណ៍មួយបញ្ជាក់ពីជ័យជម្នះរបស់ខ្លួនដែលកម្ទេចក្បួនរថយន្តរបស់មេដឹកនាំកំពូលក្រុមរដ្ឋឥស្លាមបានជោគជ័យ។ បើតាមសេចក្តីថ្លែងការណ៍របស់ក្រុមយោធា កងកម្លាំងជើងអាកាសអ៊ីរ៉ាក់បានចាប់ផ្តើមប្រតិបត្តិការលួចវាយឆ្មក់លើក្បួនរថយន្តក្រុមភេរវជននេះនៅថ្ងៃអាទិត្យដែរ។
យ៉ាងណាក៏ដោយ ទាហានអ៊ីរ៉ាក់មិនបានបញ្ជាក់ច្បាស់ថាជោគវាសនាប្រមុខក្រុមរដ្ឋឥស្លាមនេះយ៉ាងណានោះទេ តែគេជឿជាក់ថា Baghdadi នៅក្នុងរថយន្តពិតប្រាកដមែន។ ការស្ទាក់វាយប្រហារនេះកើតឡើងនៅពេលដែលក្បួនរថយន្តនេះធ្វើដំណើរឆ្ពោះទៅទីក្រុង Karabla ដើម្បីចូលរួមក្នុងកិច្ចប្រជុំមេបញ្ជាការយោធារបស់ក្រុមរដ្ឋឥស្លាម៕
© រក្សាសិទ្ធិដោយ thmeythmey.com