កីឡាជាតិ
កែវ រំចង់ នឹងប៉ះជើងខ្លាំងថៃ ក្នុងកម្មវិធី Thai Fight នៅវៀតណាម
×
កីឡាករ កែវ រំចង់ ជាកីឡាករកម្ពុជាតែមួយគត់ ដែលនឹងទៅចូលរួមប្រកួត Thai Fight នៅវៀតណាម ថ្ងៃទី២៤ ខែតុលា ខាងមុខនេះ។ នៅក្នុងការប្រកួតនេះដែរ កីឡាករ កែវ រំចង់ នឹងប៉ះជាមួយកីឡាករថៃ Iquezang Kor Rungthanakeat ដែលធ្លាប់យកឈ្នះកីឡាករជួរមុខកម្ពុជា ពេជ្រ សីហា និង វង្ស ណយ។
«ការប្រកួត Thai Fight នៅវៀតណាមម្តងនេះ កីឡាករ កែវ រំចង់ នឹងប៉ះ កីឡាករថៃ ហើយខ្ញុំសង្ឃឹម និងរំពឹងយ៉ាងមុតមាំថា រំចង់ នឹងយកឈ្នះលើកីឡាករថៃរូបនេះ វាជាលើកទី២ហើយសម្រាប់ រំចង់ ពេលនេះគេបានត្រៀមខ្លួនរួចហើយ ទោះបីកាលពីលើកមុន ក្នុងកម្មវិធី Thai Fight នៅក្នុងប្រទេសថៃ កាលពីថ្ងៃទី២៤ ខែកុម្ភៈ ឆ្នាំ២០១៤ កីឡាករ កែវ រំចង់ បានសន្លប់ក្រោមកណ្តាប់ថៃនៅក្នុងទឹកទី២ ដោយសារគេមិនដឹងពីលក្ខខ័ណ្ឌនៃការប្រកួត និងមិនបានត្រៀមខ្លួន»។ នេះបើយោងតាម លោក កែវ សំអាង គ្រូបង្វឹកកីឡាករ កែវ រំចង់ បានប្រាប់សារព័ត៌មានថ្មីៗតាមទូរស័ព្ទកាលពីពេលថ្មីៗនេះ។
លោកគ្រូបង្វឹកម្នាក់នេះបានឱ្យដឹងទៀតថា កីឡាករ កែវ រំចង់ ជាកីឡាករដែលមានសមត្ថភាព និងបច្ចេកទេសខ្ពស់ក្នុងការប្រកួត ខណៈពេលគេជាកីឡាករដែលកំពុងមានឈ្មោះល្បី និងជាកិឡាករដែលមានលក្ខណៈគ្រប់គ្រាន់ទើបគណៈកម្មការរៀបចំការប្រកួត Thai Fight សម្រេចឱ្យគេទៅចូលរួមប្រកួតលើកនេះ។
ការប្រកួត Thai Fight ម្តងនេះជាការប្រកួតលក្ខណៈមិត្តភាព ប៉ុន្តែប្រសិនបើ កីឡាករ កែវ រំចង់ ឈ្នះក្នុងការប្រកួត គេនឹងមានឱកាសចូលរូមប្រកួតវិលជុំ Thai Fight នៅចុងខែវិច្ឆិកាខាងមុខនេះ៕
© រក្សាសិទ្ធិដោយ thmeythmey.com