ការគ្រប់គ្រងក្មេងមិនមែនជារឿងងាយស្រួលទេ ជាពិសេសនៅពេលដែលអ្នកនាំកូនទៅកន្លែងដែលមានមនុស្សច្រើន។ អ្នកគួរតែប្រាប់កូនឲ្យដឹងថា កូនអាចនឹងវង្វេងបាត់ បើគេចេញឆ្ងាយពីរូបអ្នក។ អ្នកអាចយករឿងហេតុដែលធ្លាប់កើតឡើងក្នុងសង្គមអំពីករណីវង្វេងបាត់កូននេះមកប្រាប់គេឲ្យបានដឹង។ វាមិនមែនជាការបំភ័យទេ តែវាជាការបញ្ជៀបព័ត៌មាន។ អ្នកត្រូវបង្រៀនកូនឲ្យត្រៀមខ្លួនជាស្រេចប្រឈមមុខនឹងបញ្ហានេះ ដែលអាចនឹងកើតឡើងចំពោះរូបគេនៅថ្ងៃណាមួយ។ ខាងក្រោមនេះជាចំណុចសំខាន់ៗដែលអ្នកគួរតែបង្រៀនកូន៖
1. ស្គាល់ឈ្មោះឪពុកម្តាយ និងលេខទូរស័ព្ទ
កូនក្មេងដែលមានអាយុចាប់ពី ៣ ឆ្នាំទៅ គឺអាចស្គាល់ឈ្មោះឪពុកម្តាយរបស់គេបានស្ទាត់។ អ្នកត្រូវបង្ហាត់ឲ្យគេនិយាយឈ្មោះអ្នកឲ្យញឹកញាប់ រហូតដល់កូនចងចាំ។ ទន្ទឹមនឹងនោះ អ្នកត្រូវឲ្យកូនស្គាល់លេខទូរស័ព្ទរបស់អ្នក ដោយការតែងជាចម្រៀងដើម្បីឲ្យក្មេងងាយចងចាំលេខទូរស័ព្ទនោះ។
2. មិនត្រូវឃ្លាតឆ្ងាយពីក្រសែភ្នែករបស់អ្នកឡើយ
បើចៀសមិនផុតពីការត្រូវព្រលែងដៃកូននោះ អ្នកអាចឲ្យគេលែងដៃអ្នកបាន តើមិនត្រូវបណ្តោយឲ្យគេឃ្លាតឆ្ងាយពីក្រសែភ្នែកឡើយ។
3. បើកូនវង្វេង ត្រូវនៅឲ្យស្ងៀមមួយកន្លែង ហើយស្រែកខ្លាំងៗ
ជាធម្មតា កូនក្មេងមិនត្រូវបានអនុញ្ញាតឲ្យស្រែកខ្លាំងៗទេ ប៉ុន្តែនេះជាករណីលើកលែង។ អ្នកត្រូវប្រាប់កូនឲ្យស្រែកហៅឈ្មោះអ្នកខ្លាំងៗឲ្យច្រើនដង។ ការស្រែកហៅរបស់កូនអាចប្រាប់អ្នកឲ្យដឹងថា កូនស្ថិតនៅកន្លែងណា។
4. ស្វែងរកស្ត្រីជាម្តាយផ្សេងទៀត ដើម្បីសុំជំនួយ
ត្រង់នេះហើយ ទើបអ្នកចាំបាច់ត្រូវតែឲ្យកូនស្គាល់ឈ្មោះ និងលេខទូរស័ព្ទរបស់អ្នក នៅពេលដែលគេស្វែងរកជំនួយពីអ្នកដទៃ។ អ្នកគួរតែប្រាប់កូនឲ្យរកជំនួយពីស្ត្រីជាម្តាយដូចគ្នា ដែលអាចសម្គាល់បានត្រង់ស្ត្រីនោះមានកូនក្មេងនៅជាមួយ។ ហេតុអី្វបានជាត្រូវរកស្ត្រីជាម្តាយដូចគ្នា ព្រោះវាជាជម្រើសដ៏ល្អបំផុត។ ប៉ុន្តែ បើកូនស្ថិតនៅក្នុងហាងលក់ទំនិញ កូនអាចទៅសុំជំនួយពីបេឡាករបាន។
5. មិនត្រូវលាក់ខ្លួន ដោយសារតែភ័យទេ
អ្នកត្រូវប្រាប់កូនថា កូននឹងរកឃើញអ្នកវិញ ដើម្បីកុំឲ្យកូនតក់ស្លុត។ ប្រាប់កូនថា បើកូនវង្វេង កូនមិនត្រូវលាក់ខ្លួន ដោយសារតែការភ័យទេ។ មិនត្រូវចាកចេញពីកន្លែង ហើយដើររកអ្នកដោយគ្មានគោលដៅឡើយ។