តើអ្នកធ្លាប់ងឿងឆ្ងល់ដែរឬទេថា តើប្រទេសណាខ្លះក្នុងពិភពលោកដែលឲ្យប្រាក់ខែបុគ្គលិកខ្ពស់ជាងគេ ? មាន ១០ ប្រទេសដែលប្រជាជនរីករាយនឹងបៀវត្សរបស់ខ្លួន ហើយចំណាត់ថ្នាក់នេះធ្វើឡើងដោយផ្អែកលើការសិក្សារបស់អង្គការសហប្រតិបត្តិការ និងអភិវឌ្ឍន៍សេដ្ឋកិច្ច (OECD) ចំពោះបុគ្គលិកនៅលីវដែលពុំមានប្រពន្ធកូន។
1. សហរដ្ឋអាមេរិក
ពលរដ្ឋអាមេរិកទទួលបានប្រាក់បៀវត្សរ៍ប្រចាំឆ្នាំចំនួនប្រមាណ ៤១ ៣៥៥ ដុល្លារបន្ទាប់ពីដកពន្ធអាករចំនួន ៣១,៦ % ។ ប៉ុន្តែ មនុស្សជាច្រើនក្នុងប្រទេសនេះពុំមានធានារ៉ាប់រងសុខភាពទេ។ ប្រទេសនេះសិ្ថតក្នុងលំដាប់ទីមួយនៃប្រទេសដែលចំណាយច្រើនទៅលើការថែទាំសុខភាព ប៉ុន្តែស្ថិតនៅលំដាប់ថ្នាក់ក្រោយគេសម្រាប់សេវាធានារ៉ាប់រងសង្គម។
2. លុចសំបួរ
លុចហ្សង់បួរគឺជាមជ្ឈមណ្ឌលហិរញ្ញវត្ថុនៃអឺរ៉ុប។ ប្រាក់បៀវត្សប្រចាំឆ្នាំគិតជាមធ្យមបន្ទាប់ពីដកពន្ធ ៣៧,៧% រួចគឺ ៣៨ ៩៥១ ដុល្លារអាមេរិក។
3. ន័រវេស
នរវេសគឺជាប្រទេសមួយក្នុងចំណោមប្រទេសផ្សេងៗទៀត ដែលសម្បូណ៌ធនធានធម្មជាតិជាងគេក្នុងពិភពលោក។ ពលរដ្ឋនរវេសទទួលបានប្រាក់បៀវត្សរ៍ប្រចាំឆ្នាំចំនួន ៣៣ ៤៩២ ដុល្លារបន្ទាប់ពីដកពន្ធជាង ៣៧% រួច ហើយពួកគេធ្វើការត្រឹមតែ ៣៣,៤ ម៉ោងប៉ុណ្ណោះក្នុងមួយសប្តាហ៍។
4. ស្វីស
ប្រទេសនេះល្បីល្បាញនៅក្នុងការផលិតផលិតផលថែទាំសុខភាព ឱសថ និងផលិតផលគីមីផ្សេង។ បៀវត្សរ៍ប្រចាំឆ្នាំក្នុងប្រទេសនេះគឺ ៣៣ ៤៩១ ដុល្លារ ហើយពលរដ្ឋធ្វើការប្រមាណ ៣៥ ម៉ោងក្នុងមួយសប្តាហ៍។
5. អូស្ត្រាលី
អូស្ត្រាលីគឺជាប្រទេសមួយក្នុងចំណោមប្រទេសផ្សេងទៀត ដែលមានសេដ្ឋកិច្ចរឹងមាំជាងគេក្នុងពិភពលោក។ ប្រទេសនេះជាអ្នកនាំចេញដ៏ធំមួយនៃចំណីអាហារ ប្រេងកាត និងរ៉ែ ហើយនាំចូលទំនិញតិចតួចប៉ុណ្ណោះ។ ប្រទេសនេះដកពន្ធ ២៧,៧% នៃប្រាក់ចំណូលសម្រាប់សេវាសុខភាព និងការសិក្សា។ បន្ទាប់ពីដកពន្ធរួច ប្រាក់បៀវត្សរ៍ប្រចាំឆ្នាំគឺ ៣១ ៥៨៨ ដុល្លារ។ ពលរដ្ឋអូស្ត្រាលីធ្វើការ ៣៦ ម៉ោងក្នុងមួយសប្តាហ៍។
6. អាល្លឺម៉ង់
អាល្លឺម៉ង់គឺជាប្រទេសមហាអំណាចសេដ្ឋកិច្ចធំជាងគេនៅអឺរ៉ុប។ ប្រទេសនេះជាប់ចំណាត់ថ្នាក់លេខមួយខាងដកពន្ធច្រើនជាងគេលើចំណូលរបស់ពលរដ្ឋខ្លួន ដោយទាមទារដក ៤៩,៨% ។ ពោលគឺជិតពាក់កណ្តាលទៅហើយ។ ទោះបីជាយ៉ាងនេះក៏ដោយ ប្រាក់ចំណូលប្រចាំឆ្នាំបន្ទាប់ពីដកពន្ធរួចគឺ ៣១ ២៥២ ដុល្លារ។
7. អូទ្រីស
ប្រទេសនេះដកពន្ធ ៤៩,៤% ដោយរួមបញ្ចូលទាំងពន្ធលើបៀវត្សរ៍ និងបដិភាគសម្រាប់សេវាសន្តិសុខសង្គម។ បើទោះជាយ៉ាងនេះក៏ដោយ ពលរដ្ឋទទួលបានបៀវត្សរ៍ជាមធ្យមប្រចាំឆ្នាំគឺ ៣១ ១៧៣ ដុល្លារ។ គួរបញ្ជាក់ថា ពន្ធ ៤៩,៤% នេះគ្របដណ្តប់លើការថែទាំសុខភាពជាសកល និងការសិក្សាជាន់ខ្ពស់ផងដែរ។
8. កាណាដា
បៀវត្សរ៍ប្រចាំឆ្នាំជាមធ្យមនៃពលរដ្ឋកាណាដាគឺ ២៩ ៣៦៥ ដុល្លារ បន្ទាប់ពីដកពន្ធ ៣១% ។ ពន្ធ ៣១% នេះគឺសម្រាប់ចំណាយទៅលើការថែទាំសុខភាពសកល និងការសិក្សាសាធារណៈ។ ចំនួនម៉ោងធ្វើការជាមធ្យមប្រចាំសប្តាហ៍គឺ ៣៦ ម៉ោង។
9. ស៊ុយអែត
ប្រទេសនេះដកពន្ធ ៤២,៤% លើប្រាក់ចំណូល ដើម្បីចំណាយទៅលើសេវាថែទាំសុខភាពសកល និងការសិក្សាជាន់ខ្ពស់សម្រាប់ពលរដ្ឋខ្លួន។ បន្ទាប់ពីដកពន្ធរួច ពលរដ្ឋស៊ុយអ៊ែដមានចំណូលប្រចាំឆ្នាំគឺ ២៩ ១៨៥ ដុល្លារ។
10. បារាំង
ប្រទេសនេះយកពន្ធ ៤៩,៤% លើប្រាក់ចំណូល។ ពលរដ្ឋបារាំងមានប្រាក់ចំណូលប្រចាំឆ្នាំជាមធ្យមគឺ ២៨ ៧៩៩ ដុល្លារបន្ទាប់ពីដកពន្ធរួច។ ចំនួនម៉ោងធ្វើការប្រចាំសប្តាហ៍គឺ ៣៥ ម៉ោង៕