កីឡាជាតិ
ជាតិ
World Cup៖ កម្ពុជា ប៊ូតាន់ ឥណ្ឌា និងយ៉េមែន អស់ឱកាសឈានទៅជុំទីបី ចាន់ វឌ្ឍនាកា ជាអ្នកបង្កើតឱកាសឲ្យ សុះ ស៊ូហាណា ស៊ុតបាល់បញ្ចូលទី។ រូបថត Ismail Sulaiman (FAS
× ក្រុមកីឡាបាល់ទាត់ជម្រើសជាតិកម្ពុជា ស្ថិតក្នុងចំណោមក្រុមចំនួន៤ដែលអស់ឱកាសក្នុងការឈានទៅកាន់ជុំទីបីនៃវគ្គជម្រុះប្រចាំតំបន់អាស៊ីនៃព្រឹត្តិការណ៍ដណ្តើមពានរង្វាន់ពិភពលោក បន្ទាប់ពីពួកគេបានរងបរាជ័យ៥លើកជាប់ៗគ្នានៅក្នុងពូល។
នាជំនួបពូល E នៅលើទីលាន Singapore Sport Hub កាលពីល្ងាចថ្ងៃទី១៣ ខែតុលា កម្ពុជា បានចាញ់ម្ចាស់ផ្ទះសឹង្ហបុរី ២-១ ។ Faris Ramli បានគ្រាប់បាល់នាំមុខឲ្យសឹង្ហបុរី នៅនាទី ទី១៦ ។ អ្នកចាំទី អ៊ុំ សេរីរ័ត្ន បានសង្គ្រោះបាល់ពិន័យ១១ម៉ែត្រ របស់ Amri នៅចុងតង់ទីមួយ ប៉ុន្តែដើមតង់ទីពីរ Fazrul Nawaz បានសម្រេចលទ្ធផល ២-០ សម្រាប់ម្ចាស់ផ្ទះ។
ខណៈការប្រកួតដំណើរការបានជាងមួយម៉ោង ចាន់ វឌ្ឍនាកា បានអូសចូលប្រអប់គ្រោះថ្នាក់ ហើយបញ្ជូនទៅឲ្យ សុះ ស៊ូហាណា ដើម្បីរកគ្រាប់បាល់ដំបូងសម្រាប់កម្ពុជា ក្នុងការប្រកួតវគ្គជម្រុះ World Cup ជុំទីពីរ។ នេះក៏ជាការស៊ុតបាល់បញ្ចួលទីលើកដំបូងផងដែររបស់ សុះ ស៊ូហាណា បន្ទាប់ពី ខ្សែបម្រើភ្នំពេញក្រោនរូបនេះ ចូលលេងឲ្យក្រុមជម្រើសជាតិចាប់តាំងពីឆ្នាំ២០១២ មក។
មកដល់ពេលនេះ កម្ពុជាគឺជាក្រុមទីមួយនៅក្នុងពូល E ដែលបាត់បង់ឱកាសក្នុងការឈានទៅកាន់ជុំទី៣នៃវគ្គជម្រុះ World Cup ឆ្នាំ២០១៨ ខណៈស៊ីរី ឈរលេខមួយបណ្តោះអាសន្ន ជប៉ុន និងសឹង្ហបុរី ស្ថិតនៅលេខរៀងបន្តបន្ទាប់ រីឯអាហ្វហ្គានីស្ថាន អាចមានវាសនា ដូចកម្ពុជា។
ក្រុម៣ផ្សេងទៀត ដែលមិនអាចឈានទៅកាន់ជុំទីបីរួមមាន ប៊ូតាន់នៅក្នុងពូល C ឥណ្ឌានៅក្នុងពូល D និងយ៉េមែន នៅ ក្នុងពូល H។
សូមបញ្ជាក់ថា លេខមួយនៃពូលនីមួយៗ នឹងឈានទៅកាន់ជុំទីបីនៃវគ្គជម្រុះ World Cup ខណៈក្រុមលេខ២ ត្រូវធ្វើការប្រៀបធៀបពិន្ទុរវាងពូលទាំង៨ ។ ទោះបីជាយ៉ាងណាក៏ដោយ កម្ពុជានៅមានឱកាសចូលប្រកួតវគ្គជម្រុះ Asian Cup ៕
© រក្សាសិទ្ធិដោយ thmeythmey.com