អន្តរជាតិ
នយោបាយអន្តរជាតិ
×![]()
នៅថ្ងៃពុធ ម្សិលមិញ រដ្ឋាភិបាលតួកគីបានដកហូតតំណែងមេប៉ូលិសក្រុងអង់ការ៉ា និងមន្ត្រីជាន់ខ្ពស់ចារកិច្ច និងសន្តិសុខពីររូបទៀត ក្នុងទិសដៅសម្រួលការស៊ើបអង្កេតទាក់ទងអំពើភេរវកម្មចំនួន២ ដែលបានកើតឡើង នៅក្រុងអង់ការ៉ា កាលពីថ្ងៃសៅរ៍។ ការផ្ទុះគ្រាប់បែកទាំងនេះ បានសម្លាប់មនុស្សយ៉ាងហោច៩៧នាក់ និងបង្ករបួសដល់ជាង៥០០នាក់ទៀត។ 
រដ្ឋាភិបាលតួកគីបានប្រកាសដកហូតតំណែងលោក Kadri Kartal ជាមេប៉ូលិសក្រុងអង់ការ៉ា និងមន្ត្រីជាន់ខ្ពស់ចារកិច្ចពីររូបទៀត តែប៉ុន្មានម៉ោងប៉ុណ្ណោះ ក្រោយប្រធានាធិបតី រីសេប តៃយីប អ៊ែរដូហ្កាន ទទួលស្គាល់ថា សេវារដ្ឋាភិបាលមានកំហុសជាយថាហេតុណាមួយ មុនពេលមានហេតុការណ៍ផ្ទុះគ្រាប់បែក។ ការផ្ទុះគ្រាប់បែកកាលពីថ្ងៃសៅរ៍ កើតឡើងចំពេលក្រុមគាំទ្រកៀឌីស្តង់ និងក្រុមឆ្វេងនិយមកំពុងធ្វើបាតុកម្មបរិហារពីហិង្សានៅ ភាគខាងត្បូងប្រទេស។
ក្រោយភេរវកម្ម ប្រធានាធិបតីតួកគីបានប្រកាសបើកការស៊ើបអង្កេតដើម្បីរកចន្លោះប្រហោង ផ្នែកសេវាការពារសន្តិសុខ។ រដ្ឋាភិបាលបានផ្តោតការសង្ស័យខ្លាំងជាងគេ ទៅលើក្រុមជីហាតរដ្ឋអ៊ីស្លាម។ យោងតាមសារព័ត៌មានHürriyet គេបានរកឃើញអត្តសញ្ញាណជនដាក់គ្រាប់បែកអត្តឃាតទាំង២នាក់ ដែលបានដាក់គ្រាប់បែក កាលពីថ្ងៃសៅរ៍នោះ ឃើញហើយ។
ក្នុងចំណោមជនសង្ស័យទាំង២រូប ម្នាក់ជាបងប្អូនប្រុសរបស់មេខ្លោងភេរវកម្មក្រុងSuruç។ ភេរវកម្មនេះបានកើតឡើងកាលពីខែមករាដើមឆ្នាំ នៅជិតព្រំដែនជាមួយស៊ីរី សម្លាប់មនុស្សជាង៣៤នាក់។ ជនសង្ស័យម្នាក់ទៀត ធ្លាប់បានទៅប្រឡូកសមរភូមិសង្គ្រាមនៅស៊ីរី។
ភេរវកម្ម កាលពីថ្ងៃសៅរ៍ បានធ្វើអោយក្រុមប្រឆាំងរិះគន់រដ្ឋាភិបាលជាខ្លាំង ពិសេសក្រុមគាំទ្រកៀឌីស្តង់ មកពីបក្សប្រឆាំង ដែលជាគូប្រជែង របស់លោកអ៊ែរដូហ្កាន សម្រាប់ការបោះឆ្នោតសភា ថ្ងៃ១វិច្ឆិកាខាងមុខ។ ក្រុមប្រឆាំងបានចោទរដ្ឋាភិបាលថា មិនយកចិត្តទុកដាក់លើសុវត្ថិភាពសន្តិសុខរបស់សកម្មជនដែលគាំទ្រ កៀឌីស្តង់៕
© រក្សាសិទ្ធិដោយ thmeythmey.com
