ជាតិ
×![]()
ទោះបីជាស្រឡាងអ្នកលឿងត្រូវបានដកចេញ ជំនួសមកវិញនូវស្ពានអ្នកលឿង ឬស្ពានត្សឹបាសា (Tsubasa) ដ៏វែងអន្លាយបោះរំលងដងទន្លេមេគង្គក្តី ក៏អាជីវករដែលធ្លាប់លក់ដូរនៅស្រឡាងអ្នកលឿងពីមុន នៅតែអាចរកចំណូលនៅតំបន់អ្នកលឿងបានដដែល នោះគឺនៅតំបន់គល់ស្ពានអ្នកលឿង។ ក្នុងឱកាសពិធីបុណ្យភ្ជុំបិណ្ឌ រយៈពេល ៣ថ្ងៃ ចាប់ពីថ្ងៃទី១១ ដល់ថ្ងៃទី១៣ តុលា ឆ្នាំ២០១៥នេះ ទាំងអាជីវករនៅត្រើយខាងលិច និងខាងកើតស្ពានអាចទទួលបានចំណូលច្រើនគួរសមពីការលក់ទំនិញ វត្ថុអនុស្សាវរីយ៍ នំបុ័ង ម្លូស្លា ម្ហូបអាហារ ភេសជ្ជៈដល់អ្នកដំណើរឆ្លងកាត់ស្ពានចំណង មិត្តភាពជប៉ុន-កម្ពុជាមួយនេះ។
អាជីវករលក់ម្ហូបអាហារម្នាក់នៅត្រើយខាងលិចនៃស្ពានអ្នកលឿង អ្នកស្រី ស៊ុំ សារ៉េត អាចរកចំណូលជាមធ្យមពី ២០ម៉ឺន ទៅ៤០ម៉ឺនរៀលក្នុងមួយថ្ងៃៗ ឱកាសពិធីបុណ្យភ្ជុំបិណ្ឌ។ ស្រី្តវ័យជាង ៤០ឆ្នាំរូបនេះ និយាយថា ទោះបីជាស្រឡាងអ្នកលឿងឈប់ដំណើរក៏ដោយ ក៏អាជីវករនៅតែអាចរកចំណូលពីការលក់ទំនិញបានដដែល ដោយអ្នកស្រីអះអាងថា អ្នកដំណើរដែលឆ្លងកាន់ស្ពានភាគច្រើន តែងឈប់សំចតសម្រាកនៅត្រើយម្ខាងៗនៃគល់ស្ពាន មុននឹងបន្តដំណើរទៅមុខទៀត។ «មីងលក់បាយបានច្រើន នៅពេលពិធីបុណ្យទានម្តងៗហ្នឹង ព្រោះអ្នកដំណើរ ទៅមកពេលច្រើន។ ឯថ្ងៃធម្មតាវិញ អ្នកតិចបានក៏ចំណូលតិចដែរ ពី ១០ម៉ឺន ទៅ ២០ម៉ឺនទេ»។ នេះជាការបញ្ជាក់របស់ស្រី្តសម្បុរខ្មៅស្រអែម ប្រកបរបរលក់បាយម្ហូបអស់ជាង ៣ឆ្នាំ។
អ្នកស្រី ឆាយ សារឹម អាជីវករលក់ផ្លូវក្រូច នំបុ័ង ម្លូស្លា នៅត្រើយខាងលិចដែរនោះ ក៏អាចរកចំណូលបានច្រើនគួរសម បើប្រៀបធៀបនឹងថ្ងៃធម្មតា។ អ្នកស្រីនិយាយទាំងញញឹម ថា អ្នកស្រីអាចរកចំណូលមធ្យមពី ១០ ទៅ ៤០ម៉ឺនរៀលដែរ អំឡុងបុណ្យភ្ជុំបិណ្ឌ ដោយសារអ្នកដំណើរភាគច្រើន ឈប់យានជំនិះ ដើម្បីសម្រាកយកកម្លាំងមុនបន្តដំណើរ ទៅលំនៅឋានរបស់ពួកគេ។ លោកស្រីថា៖«រកចំណូលបានគ្រាន់ទប់ជីវភាពប្រចាំថ្ងៃ ឲ្យកូនរៀនសូត្រប៉ុណ្ណឹង បើរកឲ្យសល់គឺមិនសល់ទេ ព្រោះមីងរកបានតែរដូវបុណ្យម្តង។ បើទូទាត់នឹងថ្លៃទិញឥវ៉ាន់ចូលសល់បានជាង ១០ ទៅ២០ម៉ឺនដែរ ក្នុងមួយថ្ងៃៗ ពេលបុណ្យនេះ»។
សម្រស់ និងទិដ្ឋភាពនៅលើស្ពានមិត្តភាពកម្ពុជា ជប៉ុន ត្សឹបាសា ឬស្ពានអ្នកលឿង កំពុងទាក់ចិត្តអ្នកធ្វើដំណើរឆ្លងកាត់ជាច្រើននាក់ ឲ្យឈប់ទស្សនាកម្សាន្ត និងថតរូបទុកជាអនុស្សាវរីយ៍ មុនពេលដែលពួកគេបន្តដំណើរឆ្ពោះទៅកាន់ស្រុកកំណើតដើម្បីចូលរួមក្នុង ឱ្យកាសបុណ្យភ្ជុំបិណ្ឌ។ អ្នកលក់ភេសជ្ជៈ និងសម្ភារៈប្រើប្រាស់ វត្ថុអនុស្សាវរីយ៍ ដូចជា វ៉ែនតា នាឡិកា ខ្សែដៃ កន្ត្រៃកាត់ក្រចក និងប្រេងខ្យល់ជាដើម ក៏អាចរកចំណូលបានច្រើនផងដែរ។
យុវជន រ៉ន សារី វ័យជាង ១៨ឆ្នាំ បានឆ្លៀតឱកាសទំនេរពីការសិក្សា ដើរលក់វត្ថុអនុស្សាវរីយ៍ បាននិយាយថា រដូវបុណ្យភ្ជុំបិណ្ឌនេះ គេអាចរកចំណូលបានពីជាង ៥ ទៅ១០ម៉ឺនដែរ ក្នុងមួយថ្ងៃ។ យុវជនសម្បុរខ្មៅស្រអែមជាអ្នកខេត្តព្រៃវែងរូបនេះ និយាយមួយៗថា៖ «លក់ដាច់ដែរបង ខ្ញុំលក់បានច្រើនតែពេលបុណ្យនេះទេ។ ក្រៅពីការសិក្សា ពេលទំនេរ ខ្ញុំតែងមកលក់ឥវ៉ាន់នៅទីនេះ។ ខ្ញុំលក់បានចំណូលមិនទៀងទេ ថ្ងៃខ្លះ៥ម៉ឺន ថ្ងៃខ្លះ១០ម៉ឺន ហើយពេលខ្លះពុំមានសោះក៏មានដែរ»។
គួរបញ្ជាក់ថា ស្ពានអ្នកលឿង ឬស្ពាន ត្សឹបាសា (Tsubasa) ចាប់ផ្តើមសាងសង់នៅ ថ្ងៃទី ៧ ខែធ្នូ ឆ្នាំ២០១០ មានបណ្តោយ ៥,៤ គីឡូម៉ែត្រ និងទទឹងជាង ១៣ ម៉ែត្រ វែងជាងគេនៅប្រទេសកម្ពុជា ត្រូវបានសម្ពោធដាក់អោយប្រើប្រាស់ជាផ្លូវការ កាលពីថ្ងៃទី ០៦ ខែ មេសា ឆ្នាំ ២០១៥ ។ ពាក្យថា ត្សឹបាសា ភាសាជប៉ុននេះ មាននយ័ជាភាសាខ្មែរថា ស្លាប។ វាជាប្រភេទស្ពានខ្សែកាបយោងទី១ធំជាងគេនៅកម្ពុជា ដែលស្ពាននេះ កសាងឡើងក្រោមជំនួយឥតសំណងពីរដ្ឋាភិបាលជប៉ុន ដែលចំណាយទឹកប្រាក់សរុបចំនួន ៩៥ លានដុល្លារអាមេរិក ជាស្ពានតភ្ជាប់ស្រុកពីរ ស្ថិតនៅត្រើយម្ខាងៗនៃទន្លេមេគង្គក្រោម គឺស្រុកលើកដែក ខេត្តកណ្ដាល និងស្រុកពាមរ ខេត្តព្រៃវែង៕
© រក្សាសិទ្ធិដោយ thmeythmey.com
