នៅខែវិច្ឆិកាខាងមុខនេះ នាយករដ្ឋមន្ត្រីអង់គ្លេសដាវីត ខាំម៉ឺរ៉ុន នឹងដាក់សំណើកំណែទម្រង់ដល់ក្រុងព្រុចសែល។ ជាកំណែទម្រង់ដែលសហភាពអឺរ៉ុបត្រូវអនុវត្តតាម ដើម្បីអោយលោកខាំម៉ឺរ៉ុនព្រមគាំទ្រអោយអង់គ្លេសបន្តស្ថិតក្នុងសហភាពអឺរ៉ុប។ យ៉ាងយូរបំផុត នៅឆ្នាំ២០១៧ អង់គ្លេសត្រូវបោះឆ្នោតប្រជាមតិសម្រេចថា តើត្រូវស្ថិតនៅអឺរ៉ុបទៀត រឺយ៉ាងណា។ បើលោកខាំម៉ឺរ៉ុនហ៊ានបង្ហាញការគាំទ្រអោយអង់គ្លេសបន្តខ្លួនជាសមាជិកអឺរ៉ុប ប្រជាជនអង់គ្លេសភាគច្រើនគ្មានបំណងដូចលោកខាំម៉ឺរ៉ុននោះទេ។
អ្នកនាង ព្រំសឿន សូលីណា លម្អិតព័ត៌មាននេះ
នាយករដ្ឋមន្ត្រីអង់គ្លេស ពិតជាថ្លើមធំណាស់ ដែលហ៊ានប្រកាសដាក់សំណើកំណែទម្រង់ទៅអោយសហភាពអឺរ៉ុប ដើម្បីអោយអឺរ៉ុបសង្ឃឹមថា អង់គ្លេសអាចព្រមបន្តខ្លួនធ្វើជាសមាជិកអឺរ៉ុបតទៅទៀត។ យោងតាមលោកខាំម៉ឺរ៉ុន ប្រធានបទពាក់ព័ន្ធកំណែទម្រង់ ដែលលោកនឹងបង្ហាញទៅក្រុងព្រុចសែល នៅដើមខែវិច្ឆិកាខាងមុខ ទាក់ទងនឹងបូរណភាពអង់គ្លេស ភាពស្វ័យតនៃបណ្តាប្រទេសដែលមិនចាយលុយអឺរ៉ូ រឺក៏លទ្ធភាពរបស់អង់គ្លេសទាក់ទងនឹងរឿងជនអន្តោប្រវេសន៍អឺរ៉ុបជាដើម។
សំណើកំណែទម្រង់ លក្ខខណ្ឌដែលលោកខាំម៉ឺរ៉ុន ចង់អោយសហភាពអឺរ៉ុបគោរពតាមនោះ បើស្តាប់ទៅ គ្រប់គ្នាអាចគិតថា អង់គ្លេសពិតជាអស្ចារ្យណាស់ ដែលហ៊ានគ្រហឹមគំរាមអឺរ៉ុប រឺក៏ថា សហភាពអឺរ៉ុបពិតជាអន់ណាស់ដែលត្រូវអោនលំទោនតាមអង់គ្លេស ព្រោះខ្លាចអង់គ្លេសឈប់ធ្វើជាសមាជិកខ្លួនតទៅទៀត។ ប៉ុន្តែ មើលអោយដិតដល់ រឿងអង់គ្លេសចង់នៅ រឺក៏ចង់ចេញពីអឺរ៉ុបនោះ បញ្ហាមិនស្ថិតលើអឺរ៉ុបទេ។ បញ្ហាគឺស្ថិតលើអង់គ្លេសខ្លួនឯងនឹងតែម្តង។ មិនមែនមានន័យថា លោកខាំម៉ឺរ៉ុនគាំទ្រអោយអង់គ្លេសបន្តនៅអឺរ៉ុប ទើបអង់គ្លេសត្រូវតែនៅនោះទេ។ លោកត្រូវប្រឈមបកស្រាយពីសំណើនេះ ជាមួយពលរដ្ឋអង់គ្លេស និងបក្សអភិរក្សរបស់លោក ដែលមិនពេញចិត្តនឹងនយោបាយអឺរ៉ុបទៅវិញទេ។ ការស្ទង់មតិចំនួន២ ក្នុងពេលថ្មីៗនេះ បង្ហាញថាប្រជាជនភាគច្រើនមិនចង់អោយអង់គ្លេសស្ថិតក្រោមនយោបាយអឺរ៉ុបតទៅទៀតឡើយ។
លោកខាំម៉ឺរ៉ុន ហ៊ានដាក់លក្ខខណ្ឌទៅក្រុងព្រុចសែល ផ្ទុយពីការចង់បានរបស់ប្រជាជនដូច្នេះ គឺមានន័យថា លោកក្លាហានណាស់ ដែលហ៊ានយកប្រទេសជាតិទៅភ្នាល់លេងជាមួយអឺរ៉ុប។ មិនដឹងថា លោកត្រូវដោះស្រាយប្រាប់ប្រជាជនពីល្បែងភ្នាល់នេះយ៉ាងដូចម្តេចទេ! នេះ គេនៅមិនគិតពីការទាស់ទែងគ្នា ក្នុងបក្សអភិរក្សនិយមផងទេ។ អ្នកនយោបាយបក្សកាន់អំណាចក៏មិនពេញចិត្តនឹងអោយអង់គ្លេសបន្តនៅក្រោមនយោបាយអឺរ៉ុបដែរ។ នាយករដ្ឋមន្ត្រីអង់គ្លេសប្រហែលគិតថា សំណើលោកអាចបំពេញចិត្តក្រុមប្រឆាំងនយោបាយអឺរ៉ុប។ ហើយបើក្រុងព្រុចសែលព្រមអនុវត្តតាមសំណើលោក ប្រហែលជាប្រជាជនអង់គ្លេសអាចប្តូរចិត្ត ទៅបោះឆ្នោតបន្តអោយអង់គ្លេសស្ថិតក្នុងសហភាពអឺរ៉ុបហើយមើលទៅ!
ដោយឡែក ល្បែងភ្នាល់រវាងលោកខាំម៉ឹរ៉ុន និងក្រុងព្រុចសែល មិនមែនស្រួលសម្រាប់អង់គ្លេសទេ។ ក្នុងល្បែងនេះ សហភាពអឺរ៉ុបក៏អាចមានបៀសន្លឹកអាត់ ផ្តួលអង់គ្លេសបានដែរ។ ព្រោះថា បើអឺរ៉ុបបដិសេធលក្ខខណ្ឌលោកខាំម៉ឺរ៉ុន ហើយបើអង់គ្លេសដើរចេញពីអឺរ៉ុប សេដ្ឋកិច្ចអង់គ្លេសអាចត្រូវដើរថយក្រោយ និងខាតបង់ធ្ងន់ធ្ងរទៅវិញទេ។ យោងតាមក្រុមអ្នកជំនាញសេដ្ឋកិច្ច ករណីអង់គ្លេសចាកចេញពីសហភាពអឺរ៉ុប រនាំងពន្ធគយនឹងមានឡើងវិញរវាងអង់គ្លេសនិងអឺរ៉ុប។ ពន្ធលើទំនិញដូចជាថ្នាំពេទ្យ អាចនឹងកើនដល់ជាង៤,៥ភាគរយ ពន្ធលើរថយន្តអាចឡើងដល់ជាង១០ភាគរយ ហើយពន្ធចំណីអាហារនិងថ្នាំជក់អាចកើនជាង២០ភាគរយផងដែរ។
គួររំលឹកថា តាំងពីចូលជាសមាជិកអឹរ៉ុប ឆ្នាំ១៩៧៣មក អង់គ្លេសបានទទួលប្រយោជន៍ច្រើនណាស់។ ទំនិញអង់គ្លេសហូរចូលស្រួលក្នុងបណ្តាប្រទេសសមាជិកអឺរ៉ុប។ ការផ្តោះប្តូរពាណិជ្ជកម្មរវាងអង់គ្លេសនិងអឺរ៉ុបគឺមានច្រើនលើសលុបនឹងគ្នា។ បើដើរចេញពីអឺរ៉ុប អង់គ្លេសអាចខាតថវិកាដល់ទៅ៧៨ពាន់លានអឺរ៉ូឯណោះ សម្រាប់រយៈពេល១០ឆ្នាំ។ ទោះយ៉ាងនេះក្តី បើអង់គ្លេសដើរចេញពីអឺរ៉ុប អឺរ៉ុបក៏ខាតបង់ប្រយោជន៍សេដ្ឋកិច្ចជាមួយអង់គ្លេសដែរ។ ដោយឡែក សេដ្ឋកិច្ចអឹរ៉ុបមានឥទ្ធិពលខ្លាំង ក្នុងពិភពលោក ជួយយឹតយោងមុខមាត់អង់គ្លេសមិនតិចទេ។
ប៉ុន្តែ ប្រជាជនអង់គ្លេសមិនបានគិតពីផលវិបាកសេដ្ឋកិច្ចនៅចំពោះមុខទេ។ សម្រាប់ពួកគេ បញ្ហាដែលរឹតកអង់គ្លេស គឺបញ្ហាជនអន្តោប្រវេសន៍។ ពលរដ្ឋអង់គ្លេសគិតថា ប្រៀបនឹងប្រទេសអឺរ៉ុបនានា ជនអន្តោប្រវេសន៍ចាប់អារម្មណ៍ រត់ទៅរកការងារធ្វើ នៅអង់គ្លេសច្រើនជាងគេ។ បើអង់គ្លេសចេញពីអឺរ៉ុប អង់គ្លេសក៏អាចស្រួលសម្រេចនយោបាយអន្តោប្រវេសន៍ដោយខ្លួនឯងបានដែរ។ ហើយអង់គ្លេសក៏មិនចាំបាច់នឹងបន្តបង់ថវិកាប្រចាំឆ្នាំជិត១៤ពាន់លានអឺរ៉ូ ជួយអឺរ៉ុបទៀតដែរ។ សម្រាប់ក្រុមប្រឆាំងនយោបាយអឺរ៉ុប បើបន្តខ្លួនជាសមាជិកអឺរ៉ុប គឺអង់គ្លេសទៅវិញទេ ដែលខាតបង់ធ្ងន់។
បើនាយករដ្ឋមន្ត្រីអង់គ្លេសចង់អោយអង់គ្លេសបន្តស្ថិតនៅអឺរ៉ុប ទាល់តែលោកខំធ្វើយ៉ាងណាអោយលក្ខខណ្ឌកំណែទម្រង់ដែលលោកត្រូវដាក់ទៅក្រុងព្រុចសែល ក្នុងពេលខាងមុខនេះ លោកត្រូវលៃលកយ៉ាងណាអោយលក្ខខណ្ឌទាំងនេះ ស្របតាមបំណងពលរដ្ឋក្នុងស្រុកអង់គ្លេសខ្លះដែរ ក្រែងឆ្នាំ២០១៧ ពលរដ្ឋអង់គ្លេសអាចប្តូរចិត្តបោះឆ្នោតបន្តអោយអង់គ្លេសស្ថិតជាសមាជិកអឺរ៉ុបទៀត៕