អន្តរជាតិ
នយោបាយអន្តរជាតិ
ចិនបន្តប្រឆាំងការប្រើកម្លាំងយោធាដោះស្រាយវិបត្តិស៊ីរី
× ជាថ្មីម្ដងទៀត ប្រទេសចិនបានប្រកាសប្រឆាំងនឹងការប្រើប្រាស់កម្លាំងដើម្បីដោះស្រាយបញ្ហារ៉ាំរ៉ៃក្នុងប្រទេសស៊ីរី ដោយលើកឡើងថា ដំណោះស្រាយនយោបាយគឺជាផ្លូវចេញតែមួយគត់។ នេះបើយោងតាម ការដកស្រង់សម្ដីរបស់រដ្ឋមន្ត្រីការបរទេសចិន។
រដ្ឋមន្ត្រីការបរទេសចិនលោក វ៉ាង យី បានប្រកាសជាថ្មីម្ដងទៀតពីគោលជំហរបស់ប្រទេសចិិន ដែលមិនគាំទ្រទាល់តែសោះនូវចំណាត់ការយោធាក្នុងប្រទេស៊ីរី។ ខណៈកំពុងទស្សនកិច្ចក្នុងប្រទេសប៊ុលហ្គារី លោក វ៉ាង យី និយាយថា៖ ចិនគាំទ្រប្រតិបត្តិការរបស់អន្តរជាតិក្នុងការប្រឆាំងក្រុមភេវរជន ដែលធ្វើឡើងក្នុងក្របខ័ណ្ឌច្បាប់អន្តរជាតិនិងមានការចូលរួមពីបណ្ដាប្រទេសពាក់ព័ន្ធ។
ការប្រកាសនេះបានធ្វើឡើងក្រោយការវាយប្រហារយោធាក្នុងទឹកដីស៊ីរី ដោយរុស្សីនិងអាមេរិក ជាមួយនិងបណ្ដាប្រទេសសម្ព័ន្ធមិត្តរៀងៗខ្លួន។ សហរដ្ឋអាមេរិកនិងសម្ព័ន្ធមិត្តបានធ្វើការវាយប្រហារដែនអាកាសប្រឆាំងក្រុមរដ្ឋឥស្លាម និងបានគាំទ្រក្រុមឧទ្ទាមប្រឆាំងនឹងលោកអាសាដ។
ចំណែកឯ រុស្សីក៏បានវាយប្រហារដែនអាកាសក្នុងប្រទេសស៊ីរីផងដែរ តែត្រូវលោកខាងលិចរិះគន់ថា ប្រតិបត្តិការនេះមានគោលបំណងជួយលោកអាសាដ ជាជាងវាយប្រហារលើក្រុមរដ្ឋឥស្លាម បើទោះជារុស្សីអះអាងថាការវាយប្រហារកន្លងមក បានចំលើទីតាំងរបស់ក្រុមជ្រុលនិយមរដ្ឋឥស្លាម។
មិនតែប៉ុណ្ណោះ លោកយី ក៏បានលើកឡើងពីវិធីតែមួយគត់សម្រាប់ជម្លោះនេះ គឺដំណោះស្រាយនយោបាយ។ លោកថា៖ សហគមន៍អន្តរជាតិគួរតែរួមគ្នាដើម្បីប្រយុទ្ធប្រឆាំងក្រុមភេវរជន ដោយមិនគួរចង្អុលដាក់គ្នានោះទេ។
គួររម្លឹកថា នៅឯក្រុមប្រឹក្សាសន្តិសុខ ប្រទេសចិននិងរុស្សីតែងតែបោះឆ្នោតប្រឆាំងនឹងដំណោះស្រាយនានាក្នុងរឿងរបស់ស៊ីរី។ ប៉ុន្តែថ្មីៗនេះ ចិនបានសម្ដែងការព្រួយបារម្ភ ចំពោះការរំលោភបំពានកិច្ចការផ្ទៃក្នុងរបស់ស៊ីរី និងទទូចឱ្យមានដំណោះស្រាយនយោបាយសមស្របសម្រាប់ស៊ីរី។ ប្រទេសចិន ដែលពឹងផ្អែកលើការនាំចូលប្រេងពីមជ្ឈិមបូព៌ា ជឿថាការប្រើកម្លាំងមិនអាចដោះស្រាយបញ្ហាបានទេ តែវានឹងធ្វើឱ្យបញ្ហាកាន់តែផុងជ្រៅ។
© រក្សាសិទ្ធិដោយ thmeythmey.com