ពីនេះ ពីនោះ
×![]()
ដោយ: ថ្មីៗ
មន្ត្រីរដ្ឋគឺជាបុគ្គលសាធារណៈដែលមានតួនាទី និងកាតព្វកិច្ចដើម្បីធ្វើការបម្រើប្រជាពលរដ្ឋ និង ទៅកាន់ការងារស្រុកទេស ដើម្បីធ្វើយ៉ាងណាឲ្យប្រទេសមានការរីកចម្រើនលើគ្រប់វិស័យ។បើនិយាយពីការងាររដ្ឋគឺ ជាបន្ទុកដ៏ធំសម្រាប់បុគ្គលិករដ្ឋគ្រប់រូប ត្រូវធ្វើដើម្បីបំពេញទៅតាមមុខនាទី និងតំណែងរបស់ខ្លួន។ និយាយពីរដ្ឋមួយគឺ មានការងារច្រើនណាស់ដែរត្រូវធ្វើ មិនថារឿងសេដ្ឋកិច្ច ពាណិជ្ជកម្ម សុខាភិបាល អប់រំ ទេសចរណ៍ វប្បធម៌ សិល្បៈ កសិកម្ម សន្តិសុខ និងការងារអភិវឌ្ឍន៍ជាតិជាដើម ដែលសុទ្ធតែជាការងារបន្ទុកសម្រាប់មន្ត្រីរដ្ឋធ្វើ។
តែមានមន្ត្រីរដ្ឋមួយចំនួន ហាក់ដូចជាមិនសូវមានការរវល់ ដូចអ្វីដែលប្រជាពលរដ្ឋ និងរដ្ឋត្រូវការនោះទេ? ហើយមន្ត្រីរដ្ឋមួយចំនួនហាក់មិនមានការមមារញឹកទាល់តែសោះ មើលទៅដូចជានៅស្ថាប័នរដ្ឋមួយទាំងមូលមិនមានការងារដែលត្រូវបំពេញជាដើម។ ចំណែកមន្ត្រីមួយចំនួន ព្យាយាមប្រឡងចូលជាមន្ត្រីរដ្ឋ សូកលុយដើម្បីក្លាយជាមន្ត្រីរដ្ឋ គឺមិនមែនចង់ធ្វើការងារដើម្បីជួយជាតិនោះទេ។ ប៉ុន្តែគឺព្រោះតែយល់ថាពេលដែលខ្លួនបានក្លាយជាមន្ត្រីរបស់រដ្ឋហើយ ខ្លួនអាចយកមុខនាទី និងដំណែងរបស់ខ្លួនទៅប្រកបរបរផ្សេង ឬអាជីវកម្មផ្សេងៗបានយ៉ាងងាយក្រោមឥទ្ធិពលនៃអំណាច។ ចំណែកមន្ត្រីមួយចំនួនទៀតចង់ក្លាយជាមន្ត្រីរដ្ឋព្រោះតែគិតថា ការងាររដ្ឋគឺមិនប្រឈមនិងហានិភ័យការងារ ទោះខ្លួនមិនបានមកធ្វើការ ខ្លួនឈឺ ខ្លួនចង់ឈប់សំរាក់ ឬទៅរកការងារក្រៅក៏មិនភ័យព្រួយខ្លាច គេបញ្ឈប់ពីការងារ កាត់ប្រាក់ខែ ពិន័យ ឬស្ដីបន្ទោសជាដើម។ ហើយជារឿយៗមន្ត្រីទាំងនោះតែងតែគិតទៅលើបញ្ហាអាជីវកម្មរបស់ខ្លួនក្រោមស្លាកមន្ត្រីរដ្ឋ ជាជាងគិតថាពេលខ្ញុំទៅកាន់មុខនាទីក្នុងរដ្ឋគឺ ខ្ញុំត្រូវធ្វើអ្វី? ខ្ញុំត្រូវបង្កើតផែនការជាតិបែបណា? ខ្ញុំត្រូវដោះស្រាយបញ្ហាជាតិបែបណា? ខ្ញុំត្រូវធ្វើបែបណាទើបធ្វើឲ្យស្ថាប័នរីកចម្រើន? តើខ្ញុំត្រូវធ្វើបែបណាដើម្បីក្លាយជាមន្ត្រីគំរូ និងជាមន្ត្រីមានស្នាដៃល្អសម្រាប់ប្រទេសជាតិ?
បើមិនដឹងថាពេលទៅធ្វើការងាររដ្ឋ ខ្លួនត្រូវទទួលបន្ទុកដើម្បីដោះស្រាយបញ្ហាជាតិ ប្រហែលជាមិនបញ្ហាទេ។ តែគ្មានមន្ត្រីរដ្ឋណាមួយដែលមិនដឹងថាខ្លួនត្រូវធ្វើការអីនោះទេ ពេលខ្លួនចូលទៅធ្វើការងារនោះ។ បើជាគ្រូបង្រៀន គឺមាននាទីបង្រៀនសិស្ស អភិវឌ្ឍនសិស្ស។ ជាគ្រូពេទ្យត្រូវតែព្យាយាមពង្រឹងសេវាសុខាភិបាល និងសុខភាពប្រជាពលរដ្ឋ។ ជាមន្ត្រីសាធារណៈ ត្រូវតែផ្ដល់សេវាសាធារណៈឲ្យទាន់ពេលវេលា និងយុត្តិធម៌។ ជាមន្ត្រីនគបាល ទាហាន កងខេមរៈភូមិន្ទត្រូវធានាសុវត្ថិភាពជូនប្រជាពលរដ្ឋ។ ជាមន្ត្រីតាមក្រសួងស្ថាប័នត្រូវតែបំពេញកាតព្វកិច្ចរបស់ខ្លួនឲ្យបានពេញលេញ។ល។
តែពេលបច្ចប្បន្ន នៅតែមានមន្ត្រីដែលអសកម្មចំពោះការងាររបស់ខ្លួន។ ឬមួយមន្ត្រីទាំងនោះពិតជាមិនដឹងពីតួនាទី និងកាតព្វកិច្ចរបស់ខ្លួនមែន? ឬនៅក្នុងស្ថាប័នរដ្ឋពិតជាមិនសូវមានការងារត្រូវធ្វើមែន? ឬមួយមកពីប្រព័ន្ធគ្រប់គ្រងរដ្ឋ និងវិន័យនៅក្នុងស្ថាប័នរដ្ឋមានភាពធូរលុង? ដែលនាំឲ្យមន្ត្រីរដ្ឋទាំងនោះកាន់តែបានចិត្ត និងគ្មានម្ចាស់ការចំពោះកិច្ចការរបស់ខ្លួន។ កត្តាទាំងនេះពិតជាមិនយល់ ថាមកពីបញ្ហាណាមួយ៕
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
5 ថ្ងៃ
