យ៉ាងហោច៦០នាក់ស្លាប់ព្រោះរញ្ជួយដីកម្រិត៧.៥រ៉ិចទ័នៅអាស៊ីខាងត្បូង

អន្តរជាតិ

យ៉ាងហោច៦០នាក់ស្លាប់ព្រោះរញ្ជួយដីកម្រិត៧.៥រ៉ិចទ័នៅអាស៊ីខាងត្បូង

26, Oct 2015 , 6:41 pm

រូបភាព

ដោយ: ថ្មីៗ

រញ្ជួយដីកម្រិត៧.៥ រ៉ិចទ័របានសម្លាប់មនុស្សយ៉ាងហោចណាស់៤០នាក់នៅក្នុងប្រទេសប៉ាគីស្ថាន ២០នាក់ផ្សេងទៀតនៅអាហ្វហ្កានីស្ថាន និងបណ្តាលឲ្យមនុស្សរាប់រយនាក់ទៀតរងរបួស។ រលករញ្ជួយដ៏ខ្លាំងក្លានេះក៏មានឥទ្ធិពលដល់ឥណ្ឌាផងដែរ។ នេះបើយោងតាមសារព័ត៌មាន BBC។

មនុស្សយ៉ាងហោចណាស់៦០នាក់បានស្លាប់បាត់បង់ជីវិតដោយសារគ្រោះមហន្តរាយរញ្ជួយដីកម្រិត ៧.៥ រ៉ិចទ័រ នៅក្នុងតំបន់អាស៊ីខាងត្បូួងនៅថ្ងៃចន្ទនេះ។ មនុស្សយ៉ាងហោចណាស់៤០ នោះជាជនជាតិប៉ាគីស្ថាន ហើយជនរងគ្រោះ២០នាក់ផ្សេងទៀតនោះស្ថិតនៅក្នុងតំបន់ភាគខាងជើងប្រទេសអាហ្វហ្កានីស្ថាន។ បើតាមព័ត៌មានដែលផ្តល់ដោយអាជ្ញាធរតំបន់ រលករញ្ជួយមហិមារនេះក៏មានឥទ្ធិលដល់តំបន់មួយចំនួននៃប្រទេសឥណ្ឌាផងដែរ។ មនុស្សរាប់រយនាក់ផ្សេងទៀតត្រូវបានគេរាយការណ៍បានរងរបួសដោយសារគ្រោះរញ្ជួយដីនេះដែរ។

គ្រោះមហន្តរាយរញ្ជួយដីដ៏ខ្លាំងក្លានេះ វាយប្រហារតំបន់ភាគពាយ័ព្យប្រទេសប៉ាគីស្ថាន និងខេត្ត Punjab ហើយគេឃើញអាគារនិងសំណង់ផ្សេងទៀតជាច្រើនបាក់ខ្ទេចខ្ទីក្រោយការរញ្ជួយដី។ ចំណែកនៅអាហ្វហ្កានីស្ថានឯណោះវិញរលករញ្ជួយនេះបានបង្កផលប៉ះពាល់ដល់តំបន់ភ្នំ Hindu Kush និង Feyzabad ផងដែរ។ បើតាមសម្តីមន្ត្រី សិស្សសាលាជាច្រើននាក់បានស្លាប់បាត់បង់ជីវិតនៅអាហ្វហ្កានីស្ថាន ស្របពេលដែលពួកគេកំពុងរត់គេចខ្លួនពីគ្រោះថ្នាក់ដែលបង្កឡើងដោយគ្រោះមហន្តរាយរញ្ជួយដីនេះ។ ប៉ុន្តែគេមិនទាន់បានទទួលរបាយការណ៍ជាក់ច្បាស់ជុំវិញតួរលេខអ្នកស្លាប់និងអ្នករបួសនៅឡើយទេ។

សូមរម្លឹកថា ករណីរញ្ជួយដីកម្រិត ៧.៥ ពេលនេះ ក្លាយជាគ្រោះមហន្តរាយធម្មជាតិធ្ងន់ធ្ងរទី២នៅ អាស៊ីខាងត្បូងបន្ទាប់ពី មានគ្រោះមហន្តរាយរញ្ជួយដីនៅណេប៉ាល់ កាលពីដើមឆ្នាំ២០១៥នេះ ដែលសម្លាប់មនុស្សជិត១ម៉ឺននាក់៕