ជាតិ
សង្គមជាតិ
ភ្ញៀវទេសចរអាចមើលថ្ងៃលិចនៅអង្គរវត្តត្រឹមម៉ោង៥កន្លះចាប់ពីឆ្នាំ២០១៦ទៅ
× សៀមរាប៖ ចាប់ពីដើមខែមករា ឆ្នាំ២០១៦តទៅ ពេលវេលាទស្សនានៅតាមប្រាសាទ ក្នុងរមណីយដ្ឋានអង្គរ ខេត្តសៀមរាប នឹងមានការផ្លាស់ប្តូរ។ យោងតាមសេចក្តីជូនដំណឹងរបស់អាជ្ញាធរអប្សរា ក្នុងនោះវេនទស្សនានៅប្រាសាទអង្គរវត្ត គឺចាប់ពីម៉ោង ៥ព្រឹក ដល់ម៉ោង ៥កន្លះល្ងាច។ គេដឹងថា អង្គរវត្តក៏ជាទិសដៅមួយ សម្រាប់ភ្ញៀវទេសចរ ដែលចូលចិត្តមើលថ្ងៃលិចនៅទីនោះដែរ។ តើការកំណត់ពេលវេលាត្រឹមម៉ោង ៥កន្លះ អាចគ្រប់គ្រាន់សម្រាប់ភ្ញៀវមើលថ្ងៃលិចបានឫយ៉ាងណា?
ក្នុងសេចក្តីជូនដំណឹងរបស់អាជ្ញាធរអប្សរា ដែលចេញផ្សាយកាលពីថ្ងៃទី២២ តុលា ឆ្នាំ២០១៥ បានកំណត់ម៉ោងទស្សនានៅតាមប្រាសាទនានា ចាប់ពីម៉ោង៥ព្រឹក ដល់ម៉ោង៧ល្ងាច។ ក្នុងនោះ ប្រាសាទអង្គរវត្ត និងស្រះស្រង់ ពេលវេលាទស្សនា គឺចាប់ពីម៉ោង ៥ព្រឹក ដល់ម៉ោង ៥ និង៣០នាទីល្ងាច។ ប្រាសាទបាខែង និងប្រាសាទប្រែរូប ម៉ោងទស្សនា ចាប់ពីម៉ោង ៥ព្រឹក ដល់ម៉ោង ៧ល្ងាច។ ក្រៅពីនេះ ប្រាសាទផ្សេងៗទៀត មានបាយ័ន តាព្រហ្ម នាគព័ន្ធ ព្រះខ័ន ជាដើម ម៉ោងទស្សនាចាប់ពី ៧កន្លះព្រឹក ដល់ម៉ោង ៥កន្លះល្ងាច។
តាមការពន្យល់របស់អ្នកនាំពាក្យអាជ្ញាធរអប្សរា ការរៀបចំឡើងវិញនៃម៉ោងទស្សនានៅតាមប្រាសាទនេះ ក្នុងបំណងដើម្បីការពារសណ្តាប់ធ្នាប់ សុវត្ថិភាពភ្ញៀវទេសចរ ដែលមកកម្សាន្តក្នុងតំបន់ប្រាសាទ។ ចំណុចមួយទៀត គឺកង្វះបុគ្គលិកប្រចាំការក្រៅម៉ោងធ្វើការជាដើម។
សូមស្តាប់ការពន្យល់បន្ថែមរបស់លោក ឡុង កុសល ប្រធាននាយកដ្ឋានផ្សព្វផ្សាយ និងជាអ្នកនាំពាក្យនៃអាជ្ញាធរអប្សរា។
យ៉ាងណាម៉ិញ វាអាចប៉ះពាល់តិចតួចសម្រាប់ភ្ញៀវដែលនិយមមើលថ្ងៃលិចនៅប្រាសាទអង្គរវត្ត។ ត្រឹមម៉ោង ៥កន្លះ វារៀងប្រថុចញ៉ុចបន្តិច សម្រាប់ភ្ញៀវទេសចរខ្លះ។
សូមស្តាប់ការលើកឡើងរបស់មគ្គុទ្ទេសក៍ភាសាជប៉ុន លោក វ៉ាន់ដា
© រក្សាសិទ្ធិដោយ thmeythmey.com