ជាតិ
សង្គមជាតិ
សមត្ថកិច្ចបន្តឃាត់ខ្លួនវៀតណាមខុសច្បាប់ ១៥នាក់ទៀត នៅសង្កាត់បឹងសាឡាង
× ជនអន្តោប្រវេសន៍វៀតណាម ចំនួន ១៥នាក់ទៀត ត្រូវបានសមត្ថកិច្ចឃាត់ខ្លួន ស្ថិតនៅផ្លូវ២៤៧ សង្កាត់បឹងសាឡាង ខណ្ឌទួលគោក នៅថ្ងៃទី២៨ ខែតុលា ម្សិលមិញ។ នេះបើតាមការបង្ហោះលើទំព័រហ្វេសប៊ុក នៃនាយកដ្ឋានស៊ើបអង្កេត និងអនុវត្តនីតិវិធី។
យោងតាមប្រភពដដែល ជនជាតិវៀតណាមចំនួន ១៥ (ស្រី១០នាក់) ដែលចូលមកស្នាក់នៅ និងធ្វើការដោយខុសច្បាប់ក្នុងព្រះរាជាណាចក្រកម្ពុជា ត្រូវបានសមត្ថកិច្ចឃាត់ខ្លួន នៅសង្កាត់បឹងសាឡាង ខណ្ឌទួលគោក។ ក្រោយពីការសាកសួរ ទើបដឹងថា ជនជាតិវៀតណាមទាំងនោះលួចស្នាក់នៅ និងរកស៊ីដោយខុសច្បាប់ គ្មានលិខិតឆ្លងដែន និងឯកសារស្រប់ច្បាប់អ្វីទាំងអស់ ហើយបន្ទាប់មកត្រូវបានបញ្ជូនទៅកាន់អគ្គនាយកដ្ឋានអន្តោប្រវេសន៍ដើម្បី សាកសួរបន្ថែម។
ទាក់ទងនឹងបញ្ហានេះ កន្លងមក លោក អ៊ុក ហៃសីលា ប្រធាននាយកដ្ឋានស៊ើបអង្កេតនិងអនុវត្តនីតិវិធី បានលើកឡើងថា ប្រជាពលរដ្ឋកម្ពុជា មិនទាន់មានសកម្មភាពខ្លាំងក្លានៅឡើយ ក្នុងការសហការជាមួយសមត្ថកិច្ច ដើម្បីឃាត់ខ្លួនជនបរទេស ជាពិសេសជនជាតិវៀតណាម ដែលមករស់នៅដោយខុសច្បាប់។ ដូច្នេះរូបលោកនៅតែបន្ត អំពាវនាវឲ្យប្រជាពលរដ្ឋ ចូលរួមសហការជាមួយអាជ្ញាធរទាំង២៥រាជធានីខេត្ត ដោយផ្តល់ដំណឹងពីជនអន្តោប្រវេសន៍ខុសច្បាប់ ដែលលួចមកស្នាក់នៅ និងរកស៊ីដោយខុសច្បាប់នៅកម្ពុជា។
យោងតាមរបាយការណ៍ក្នុងខែកញ្ញា ឆ្នាំ២០១៥ ពីនាយកដ្ឋានស៊ើបអង្កេត និងអនុវត្តនីតិវិធី ជនអន្តោប្រវេសន៍ខុសច្បាប់សរុបចំនួន២៤២០នាក់ រួមមាន៤៦សញ្ចាតិ ត្រូវបានសមត្ថកិច្ចឃាត់ខ្លួន និងបណ្តេញចេញពីកម្ពុជា។ ក្នុងចំណោមជនអន្តោប្រវេសន៍ទាំងនោះ មានជនជាតិវៀតណាមចំនួន២២២៨នាក់ ក្នុងនោះស្រីចំនួន៤០៦នាក់៕
© រក្សាសិទ្ធិដោយ thmeythmey.com